21
Ka pegsuli te matig-Gibyun te kabuhalan ni Saul
1 Te timpu te peghari ni Dabid, due bitil te tatelu ne leg‑un. Purisu mig-inse si Dabid te Magbebaye ne Manama meyitenged kayi. Ne migtabak ka Magbebaye, “Due bitil ne migginguma tenged su impangimatayan ma ni Saul wey te me pamilya rin ka me matig-Gibyun.”
2 Ka me matig-Gibyun kene ne me matig-Israil, ke kene, me kabuhalan sikandan ni Amun. Migsaad ka keet-etawan te Israil ne kene sikandan egmenuwen, piru migpakannekal si Saul te pegpangimatey kandan tenged te geyinawa rin te Israil wey Huda.
3 Purisu, impeumew ni Dabid ka me matig-Gibyun wey ingkahiyan, “Nekey‑a ka eggimuwen ku para kaniyu eyew egkabayaran ka sale ne neyimu ni Saul due te kaniyu, wey eyew egpanalanginan e man‑e te Magbebaye ne Manama ka keet-etawan?”
4 Ne migtabak ka me matig-Gibyun, “Kene egkewusey te pelata, te bulawan wey ke peggimatey naa te matig-Israil ka pegpeehetey ney ki Saul wey te pamilya rin.”
Ne mig-inse si Dabid, “Nekey naa ka igkeupii niyu ne eggimuwen ku para kaniyu?”
5 Ne migtabak sikandan, “Si Saul ka etew ne mig-eleg-eleg miggule wey ka migplanu te pegdereet kanami su eyew warad e egkasame kanami kayi te Israil.
6 Sikan naa, ibehey nu kanami ka pitu te me anak din ne me lukes su eyew egbitinen ney sikandan diye te tangkaan te Magbebaye ne Manama, diye te Gibiya, ka lungsud ni Saul ne Hari ne in-alam te Magbebaye.”
Ne migkahi si Dabid, “Uya, igbehey ku sikandan kaniyu.”
7 Piru ware ilagkes te Hari si Mipibusit, ne anak ni Diyunatan ne anak ni Saul tenged te kasabutan ni Dabid wey ni Diyunatan diye te tangkaan te Magbebaye ne Manama.
8 Ne imbehey rin ka daruwa ne me anak ne lukes ni Saul ne si Armuni wey si Mipibusit ne iyan iney si Rispa ne anak ni Aya. Ne imbehey rin degma ka lalimma ne anak ne lukes ni Mirab. Si Mirab, anak ni Saul ne malitan wey asawa sikandin ni Adriyil ne anak ni Barsilay ne matig-Mihula.
9 Ne imbehey e sikandan ni Dabid diye te me matig-Gibyun wey imbitin dan e sikandan diye te bubungan diye te tangkaan te Magbebaye ne Manama, wey nekeglegse sikandan se pitu ne nammatey. Innimatayan sikandan te timpu te pegbunsud te peggaani te sibada.
10 Ne ka duwey ni Saul ne si Rispa ne anak ni Aya, migkuwa te saku wey imbelat din e seini diye te batu diye te imbitinan te seeye se me etew. Imbelat din seini eyew eggibatan din. Ne diye sikandin mig-uugpe te pegbunsud te peggaani taman te ting-uran. Intamengan din ka me minatey ne kene egkeyilabetan te me bayaku te maaldew wey ke me mananap naa te marusilem.
11 Te nahuhuran e si Dabid te inggimu te duwey ni Saul ne si Rispa ne anak ni Aya,
12 miggendiyad e sikandin te me matig-Habis-Gilyad wey imbuyu din e ka me tul‑an ni Saul wey ni Diyunatan. (Te neyimatayan e si Saul wey si Diyunatan te me Pilistihanen diye te Gilbuwa, imbitin e ka me lawa ran te me Pilistihanen diye te plasa te Bitsan, wey innelhelesan seini kua te me matig-Habis-Gilyad.)
13 Ne in-uyan e ni Dabid ka me tul‑an ni Saul wey ni Diyunatan, wey inlimud din e degma ka me tul‑an te seeye se pitu ne etew ne impamitin.
14 Ne inlebeng dan e ka me tul‑an dan diye te inlebengan ni Kis ne amey ni Saul diye te Sila, ne diye te inged te Binhamin wey inggimu ran ka langun ne insuhu te Hari. Te neimpusan e seeye, intabak e te Magbebaye ne Manama ka me peg-ampu dan para te nasud.
Ka pegpakiggira te me Pilistihanen ki Dabid
(1 Kru. 20:4-8)
15 Ne duen e man‑e gira te Israil wey te me Pilistihanen. Ne miggipanew e si Dabid duma te me etew rin eyew te pegpakiggira te me Pilistihanen. Piru nabeley sikandin te sasangan sikandan ne egpahiggireey.
16 Ne si Isbi-Binub ne sabeka te me kabuhalan te me eleggasi, nakasuman-suman te peggimatey ki Dabid. Ne ka kabehat te kelaab te kalawit din ne burunsi, me tatelu wey liware ne kilu, wey migsiniket sikandin te iyam ne kampilan.
17 Piru impangabangan si Dabid ni Abisay ne anak ni Siruya wey inggimatayan din ka Pilistihanen. Ne ingkahiyan si Dabid te me etew rin, “Kene kad e duma kanami diye te giraanan. Iling ka te sulu te Israil, wey kene key egkeupian ne egkaawe ka.”
18 Te neimpusan e seeye, duen e man‑e gira te me Pilistihanen wey te Israil diye te Gub. Ne inggimatayan ni Sibikay ne matig-Husa si Sap ne kabuhalan te me eleggasi.
19 Ne duen e man‑e gira te Israil wey te me Pilistihanen diye te Gub. Ne inggimatayan e degma ni Ilhanan ne anak ni Haari-Urigim ne matig-Bitlihim si Gulayat ne matig-Gat. Mabehat wey makepal ka deldeg ni Gulayat.
20 Ne duen e man‑e gira diye te Gat. Ne due dakel ne etew diye ne due hen‑em se me kemel te tagse belad din wey tagse paa rin. Kabuhalan degma sikandin te eleggasi.
21 Piru te inlemetan din ka Israil, inggimatayan e sikandin ni Diyunatan ne anak ni Simayas ne suled ni Dabid.
22 Ne neyimatayan enni Dabid wey te me etew rin seini se hep‑at ne me kabuhalan te me eleggasi diye te Gat.