22
Ka peg-ulahing ni Dabid meyitenged te kapanaluwan
(Salmu 18)
1 Te pegluwas te Magbebaye ne Manama ki Dabid puun te langun ne me kuntere din wey puun ki Saul, mig-ulahingan din ka Magbebaye te seini ne ulahingen:
2 Ne miggenendue sikandin, “Sikeykew Magbebaye ne Manama ka manluluwas ku
iling ka te batu wey malig‑en ne inged.
3 Manama iling ka te batu ne egkaaputan ku,
ka kalasag ku, wey ka maresen ne manluluwas ku,
ka maresen ne inged ku wey ka aputanan ku.
Sikeykew ka manluluwas ku ne migluwas keddi puun te mabbulut ne me etew.
4 Migpangananey a keykew te Magbebaye ne Manama
ne likes ne egdeyrayen,
wey inluwas a nikeykew puun te me kuntere ku.
5 “Ka kamatayen egpekeiling te me luwak ne miglingut keddi.
Ka karereetan egpekeiling kabeheng te baggiyu ne nakalened keddi.
6 Ka lebenganan egpekeiling te lubid ne nakabelebed keddi
wey paluwak ne nakateen te dalan ku.
7 Purisu te kalaggew ku, migpangananey a keykew,
Magbebaye ne Manama ne iyan ka Manama ku.
Diye te timplu nu, indineg nu ka laheng ku
wey ka pegpangananey ku.
8 “Nataman miglilinug e ka inged wey nawelwel,
wey nawegweg ka me pabunsuran te langit.
Uya su nabelu ka Magbebaye ne Manama.
9 Ne due ebel ne miglihawang te irung nu,
wey due hapuy ne migkanlabkanlab
wey me baha ne miglihawang te be‑be nu.
10 Inlukatan nu ka langit wey migpamaneug ka.
Ne makepal ne kibel ka diye te diralem te paa nu.
11 Ne mig-untud ka te kirubin wey miglayang e seini.
Ne iiyali seini ne miglayang iling te banug.
12 Imbukusan nu ka pegkeetew nu te karusileman wey te makepal ne gapun.
13 Due migkikilat due te tangkaan nu,
ne nanlihawang puun te kalayag te tangkaan nu.
14 “Ne miglalag ka se Magbebaye ne Manama puun te langit,
wey nekeiling te luhung ka laheng nu.
15 Migpakikilat ka te egpekeiling te me tunud,
wey nenekegsuwey-suwey ka me kuntere nu.
16 Tenged te subla ne langet nu Magbebaye ne Manama te me kuntere nu,
insuhu nu ka kinariraleman te dahat wey ka pabunsuranan te kalibutan ne egkalekisan.
17 Ne duen ka te langit ka migtinawe keddi
wey impahakap a nikeykew puun te maralem ne weyig.
18 Inluwas a nikeykew puun te maresen ne kuntere ku,
wey puun te eg-ehet keddi ne manmanekal pad keddi.
19 Inlusuran a nikandan te timpu te nakasalerep a te karereetan,
piru impangabangan a nikeykew, Magbebaye ne Manama.
20 In-uyan a nikeykew diye te inged ne ware karereetan;
inluwas a nikeykew tenged su nahale ke ma keddi.
21 “Indasahan a nikeykew Magbebaye ne Manama tenged te pegkamatareng ku,
wey impanalanginan a nikeykew tenged su wara a miggimu te sale.
22 Intuman ku ka me pamaahi nu Magbebaye ne Manama,
wey wara a mig-engked keykew Manama eyew eggimu te mareet.
23 Intuman ku ka langun ne suhu nu,
wey ware ku supaka ka me tulumanen nu.
24 Nakataha ka ne ware igpakarew‑ey keddi
su migpanalliye e ma te sale.
25 Indasahan a nikeykew Magbebaye ne Manama tenged te katareng ku
wey tenged su nakataha ka ne ware sale ku.
26 “Impapitew nu ka keupiya nu diye te matinumanen keykew,
wey in-upianan nu seeye se etew ne ware igkarew‑ey.
27 Meupiya ka te seeye se me malinis se me pusung
wey impapitew nu degma ne mareet ka te seeye se maddeet ne etew.
28 Egluwasen nu ka me mapariralemen,
piru tabid nu re igpariralem ka me hambuhen.
29 “He Magbebaye ne Manama, sikeykew ka sulu ku,
wey sikeykew ka kalayag ku ke marusilem ka dalan ku.
30 Ne egpakasukul a te sabeka ne punduk te sundalu,
tenged su egbulihan a nikeykew.
Egkasalampew ku ka batu ne alad te siyudad ne matikang wey makepal,
uya su egbulihan e ma nikeykew Manama ku.
31 “Ware seyyup te pamaahi nu, Manama.
Napamalehetan ne malehet ka me saad nu.
Egpekeiling ka te kalasag ne egpaandilungan,
te langun ne eg-aput keykew.
32 Su ware lein ne Manama, ke kene sikeykew re Magbebaye ne Manama.
Ne ware lein ne batu ne aputanan, ke kene sikeykew re se Manama ney.
33 Sikeykew se Manama ka malig‑en ne aputanan ku
wey ka mig-awe te me balabag te dalan ku.
34 Ne inlig‑en nu ka me paa ku iling te paa te usa
wey impariyu a nikeykew te karereetan diye te kabubunganan.
35 Imbasbas nu ka me belad ku te pegpakiggira
su eyew egpekeuyamu a te piet ne burunsi.
36 “He Magbebaye ne Manama, impangabangan a nikeykew wey inluwas,
wey neyimu a ne mabantug tenged te bulig nu.
37 Inggiluahan nu ka dalan ku
wey wara a nakarugsu.
38 Impanalukunan ku ka me kuntere ku wey indereetan ku sikandan,
wey ware ku sikandan peen-enengi taman te nahule sikandan.
39 Indereetan ku sikandan patamtamani wey kenad e sikandan egpakasasindeg.
Nenakabahed de sikandan kayi te paa ku.
40 Tenged su imbehayan a nikeykew te keseg te pegpakiggira,
wey impepanimbuel nu ka me kuntere ku kayi te tangkaan ku.
41 Impepallahuy nu ka me kuntere ku,
wey indereetan ku seeye se migdumut keddi.
42 Migpamitew sikandan te egpakaluwas kandan, piru ware nakita ran;
migpangananey sikandan keykew Magbebaye ne Manama piru ware nu sikandan tabaka.
43 Ne inlupet ku sikandan iling kareisek te alinepung.
Intami ku sikandan wey intamisak iling te basak diye te me dalan.
44 “Inluwas a nikeykew puun te migribildi ne keet-etawan ku;
inggimu a nikeykew ne pangulu te me nasud.
Ne migpasakup keddi ka me etew ne ware ku neileyi.
45 Emun ke egkarineg ad te me lapu,
eglangkeb sikandan wey egtuman te suhu ku.
46 Nenaawaan sikandan te kabulut,
wey migmanlihawang sikandan puun te immangelesan dan ne impangelkel.
47 “Manekal ka, Magbebaye ne Manama.
Egdayanen ka se aputanan ku.
Egsayeen ku sikeykew Manama ne talagluwas ku.
48 Ne sikeykew Manama ka migsuli te seeye se me kuntere ku,
wey impasakup nu keddi ka nalein-lein ne me tribu.
49 Impariyu a nikeykew puun te seeye se eg-ehet keddi.
Impatalu nu keddi ka me kuntere ku,
wey inluwas a nikeykew puun te me etew ne mabbulut.
50 “Purisu egdeyrayen ku sikeykew Magbebaye ne Manama taliware te me nasud,
wey eg-ulahingan ku ka mabantug ne ngaran nu.
51 Impepanalu a layun nikeykew se in-alam nu ne Hari.
Impapitew nu keddi ka geyinawa nu ne kene egkabalbalawan
wey te kabuhalan ku te ware egtamanan.”