12
Ka egginguma ne kaluwasan te Huda wey Israil
1 Seini ka lalag te Magbebaye ne Manama meyitenged te Israil, “Sikeddiey ka Magbebaye ne Manama ka miggimu te langit wey migtumpi te tane, wey migbehey te umul te etew.
2 Mahaan kud e eggimuwa ka Hirusalim ne egpekeiling te binu ne egpekewubug te me inged ne nakalingut dutu. Minsan ka duma ne me siyudad te Huda egkalagkes degma ke eglusuran ka Hirusalim.
3 Piru te pegginguma kangkuwa te seeye ne aldew, eggimuwen ku ka Hirusalim ne egpekeiling te mabehat ne batu para te langun ne etew. Ne ka minsan hentew ne eggeram eggenat kayi, egluehan de iya. Ne egsabbeka ka langun ne inged eyew peglusud te Hirusalim.
4 Piru te seeye kangkuwa ne aldew, egginalatan ku ka langun ne kudde, wey egkengalibeg e ka nanguntud. Egbantayan ku ka keet-etawan te Huda piru egbuturen ku ka me kudde te me kuntere dan.
5 Ne egkahi diye te suman-suman dan ka me pangulu te Huda, ‘Me maresen ka nangugpe te Hirusalim tenged su iyan dan Manama ka Amana ne Maresen ne Magbebaye.’
6 “Te sika kangkuwa ne aldew, eggimuwen ku ka me pangulu te Huda ne egpekeiling te baha diye te intemehan, wey egpekeiling te sulu ne indullit diye te me lahami. Egdereetan dan ka langun ne keet-etawan te inged ne nakalingut kandan. Piru ka keet-etawan te Hirusalim, kene mule egkamenu diye te nangugpaan dan.
7 “Ne eggun‑aan ku egpepanaluwa ka me matig-Huda eyew kene egkeilingan ka kabantug dan te kabantug te kabuhalan ni Dabid wey te me matig-Hirusalim.
8 Te sika kangkuwa ne aldew, egpangabangan ku ka me matig-Hirusalim, wey minsan ka me malletey, egmemakeseg e iling ki Dabid. Ne ka me kabuhalan ni Dabid egpekeiling e te Manama, wey egpekeiling e te Panalihan te Magbebaye ne egpangulu te me matig-Hirusalim.
9 Te sikan ded kangkuwa ne aldew, egdereetan ku ka langun ne nasud ne eglusud te Hirusalim.
10 “Eggipenuen ku te panisingan ne hiimenawen wey maampu-ampu ka me kabuhalan ni Dabid wey ka me matig-Hirusalim. Egtengtengan a nikandan se innimatayan dan wey egmakapandalawit sikandan, iling te etew ne impatayan te sabsabeka ne anak wey ke egdamag naa te panganey ne anak din.
11 Te sika kangkuwa ne aldew, egmanaman-taman egmandalawit ka me matig-Hirusalim iling te pegdamag ki Hadad-Rimun diye te napu te Migidu.
12-14 Egmandalawit ka tagse talaanak diye te inged te Israil: ka me pamilya te kabuhalan ni Dabid, ni Natan, ni Libi, ni Simii, wey ka duma pad ne me pamilya. Egsuwey re due egmandalawit ka me lukes, wey egsuwey-suwey re due degma ka me asawa ran.”