13
Ka peglinis te me sale te matig-Israil
1 Ne migkahi pad man‑e ka Amana ne Maresen ne Magbebaye, “Te sika ne aldew, due weyig ne egtulayas diye te me kabuhalan ni Dabid wey te me matig-Hirusalim, eyew egkalinisan sikandan te me sale dan wey te kalindit dan.
2 “Te seeye kangkuwa ne aldew, eg-aween ku ka langun ne diyus-diyus diye te inged te Israil wey kenad e seini egkatanuran. Ne egpandeldelen ku ka kene ne mallehet ne me prupita wey ka me tumanud dan.
3 Ke duen pad man‑e egpanagne, ka amey wey ka iney e te egpanagne ka egkahi kandin, ‘Keilangan ne egpatey ka su migpangguhud ka te inlalag kun te Magbebaye ne Manama, kunaleg te ubat bes.’ Ne emun ke egpabulus-bulus pad sikandin, eggimatayan e sikandin te amey rin wey te iney rin.
4 Te sika kangkuwa ne aldew, igkeyilew e te me prupita ka igmangguhud dan ne impakita kun kandan. Kenad sikandan egsaluub te bulbulen ne kumbale eyew egpakapanlimbung pad.
5 Purisu egkahi naan de sikandan, ‘Kene key ma ne prupita. Talagbasukan key wey sikan en iya ka himu ney minsan te bate key pad.’
6 Ne emun ke due eg-inse kandan, ‘Mania te napalpalian ka lawa niyu?’ Ne egtabak sikandan, ‘Napalpalian key diye te baley te alukuy ney.’ ”
Ka pegkapatey te talagtameng te me karniru
7 Ne migkahi ka Amana ne Maresen ne Magbebaye,
“Himata ka, kampilan.
Lusuri nu ka impatameng ku te me karniru,
ka etew ne in-alam ku ne pangulu te keet-etawan ku.
Himatayi nu sikandin
eyew egmemekegsuwey-suwey e ka me karniru.
Egdereetan ku ka keet-etawan ku.
8 Te intiru ne inged te Israil,
daruwa ne baad te keet-etawan ka egpatey,
wey sabeka naan de ne baad ka egkengeuyag.
9 Ne eglinisan ku egpaay-ayari seeye se nenasame,
iling te pelata wey bulawan ne eglalaben te hapuy.
Ne egpangananey sikandan keddi,
wey egtabaken ku sikandan.
Ne egkahi a, ‘Sikaniyu ka keet-etawan ku,’
wey egkahi degma sikandan,
‘Sikeykew Magbebaye ka Manama ney.’ ”