4
Ka tahuanan te sulu wey ka daruwa ne ulibu
1 Ne miglibed e man‑e ka panalihan ne migpakiglalag keddi wey impukew a nikandin su hendue te nakalipereng a.
2 Ne mig-insaan a nikandin, “Nekey ka nakita nu?”
Ne migtabak a, “Nakakita a te tahuanan te sulu ne neelin ne bulawan, wey due nekeuntud ne yahung ne egtahuan te tubil. Nakalingut degma te bibig te yahung ka pitu ne sulu ne tigsalimbeka te pebilu.
3 Ne due daruwa ne kayu ne ulibu diye te dangdang te sulu: ka sabeka diye te igkakawanan wey ka dangeb diye te igkahibang te sulu.”
4 Ne mig-insaan ku ka panalihan ne migpakiglalag keddi, “Ahalen, nekey‑a ka igpasabut due?”
5 Ne migtabak ka panalihan, “Ware ke bes nakataha ke nekey ka igpasabut due?”
Ne migtabak a, “Ware, ahalen.”
6 Ne ingkahiyan e pad te panalihan ne egguhuran ku si Sirubabil te due iglalag kandin te Amana ne Maresen ne Magbebaye ne miggenendue, “Egkeimpusan nu iya te eggimu ka timplu puun te bulig te Panisingan ku, wey kene ne puun te kanekal wey keseg nu.
7 Ware egpakabalabag keykew ne minsan nekey, minsan ke iling karakel te bubungan ka egbalabag keykew, su henduen iya te egmapatag ka langun. Ne emun ke igtahu nud ka katammanan ne batu eyew egkeimpusan e ka timplu, egmanguleyi e ka me etew ne egkahi, ‘Tetelesi naan de iya!’ ”
8 Ne duen pad man‑e impanengneng keddi te Magbebaye ne Manama ne miggenendue,
9 “Si Sirubabil ka migtahu te pabunsuran te seini ne timplu, wey sikandin ded man‑e ka eg-impus. Ne emun ke egkeimpusan e sika, egkatahaan e te keet-etawan ku ne sikeddiey iya ka migsuhu keykew ne eggendiye te kandan.
10 Due me etew ne eglemet te amana ne deisek ka imbaye te pegbalew-balew te timplu. Piru egkengahale ded sikandan keureme ke egkakita ran ne ig-untud e ni Sirubabil ka katammanan ne batu eyew egkeimpusan e ka timplu.”
Ne ingkahiyan a te panalihan, “Ka sika se pitu ne sulu, iyan ka mata te Magbebaye ne Manama ne egpakakita te intiru ne kalibutan.”
11 Ne mig-insaan ku ka panalihan, “Nekey‑a ka igpasabut te sika se daruwa ne kayu ne ulibu ne dangdang te sulu: ka sabeka due te igkakawanan wey ka sabeka due te igkahibang te sulu?”
12 Mig-inse e pad man‑e, “Nekey naa man‑e ka igpasabut te sika se daruwa ne sugpang te ulibu ne lenged te sulu, wey due egtulayas ne lana ne igtubil peendiye te daruwa ne bulawan ne tubu te sulu?”
13 Ne migtabak ka panalihan, “Ware ke bes nakataha ke nekey ka igpasabut due?”
Ne migtabak a, “Ware, ahalen.”
14 Ne migkahi ka panalihan, “Ka daruwa ne sugpang, iyan sika ka daruwa ne etew ne in-alam te Manama eyew egpamakey kandin isip Magbebaye te intiru ne kalibutan.”