5
Ka eglulunen ne baseen ne miglayang
1 Te pegleng‑ag ku man‑e, iyan kud iya se baseen ne miglayang.
2 Ne mig-insaan a te panalihan, “Nekey ka nakita nu?”
Ne migtabak a, “Iyan ku nakita ka baseen ne miglayang ne nabelat; me lalimma ne depa ka kalayat, wey me daruwa ne depa wey liware ka kaluag.”
3 Ne ingkahiyan a te panalihan, “Nasulat te sika ne baseen ne egdilusen e ka keet-etawan te intiru ne inged te Israil. Nasulat diye te limang te baseen ne seeye se me takawen, egguleen. Ne nasulat degma diye te limang te baseen ne seeye se egpamalehet te ubat, egguleen ded degma.”
4 Migkahi ka Amana ne Maresen ne Magbebaye, “Egdilusen ku iya seeye se me takawen wey egpamalehet te ubat ne eggamit te ngaran ku. Kene egkaawe ka dilus ku kandan taman te egkatamtamanan e egkahuhus ka me baley ran.”
Ka malitan ne diye te lukung
5 Ne miglepew e man‑e ka panalihan ne migpakiglalag keddi wey migkahi, “Tengtengi nu ke nekey sika se egpeendini.”
6 Ne mig-insa a, “Nekey sika?”
Ne migtabak sikandin, “Lukung. Impahunsiling sika te sale te keet-etawan te intiru ne inged te Israil.”
7 Nataman, nabeke e ka insupe dutu ne timehe, wey due malitan ne migpinnuu diye te seled.
8 Ne migkahi ka panalihan, “Ka seini ne malitan, impahunsiling te mareet ne hinimuwan.” Ne indasek te panalihan ka malitan wey insupaan din e man‑e ka lukung.
9 Te pegleng‑ag ku man‑e, iyan kud man‑e se daruwa ne malitan ne miglayang ne egparani keddi. Due pakpak dan ne dakel iling te pakpak te dakel amana ne banug. Ne inggenat dan e ka lukung wey in-uyan dan e te eglayang.
10 Ne mig-insaan ku ka panalihan ne migpakiglalag keddi, “Hendei ran naa eg-uyana seeye?”
11 Ne migtabak ka panalihan keddi, “Diye dan seeye eg-uyana te Babilunya, wey eggimuwan dan diye te panubaran. Ne emun ke egkeimpusan dan e ka panubaran, igtahu dan e seeye diye eyew egsimbeen.”