8
Ka saad ne igpasasindeg ded ka Hirusalim
1 Ne ingkahiyan e man‑e te Amana ne Maresen ne Magbebaye si Sakariyas,
2 “Amana ku geyinawei ka Hirusalim wey igkeipeng, sikan naa ka igkabelu kud iya ka kuntere din.
3 Eglibed a diye te Hirusalim, ka matulus ne siyudad ku, wey diya a eg-ugpe. Ne ka Hirusalim, egngaranan te matinumanen ne siyudad, wey matulus ne bubungan te Amana ne Maresen ne Magbebaye.
4 Ne diyad e man‑e egpaminpinnuu te ilis te me plasa te Hirusalim ka me buyag ne egmanutuked naan de su buyag e amana.
5 Ne egkeempet e man‑e te me bate ne egmangekelag ka deralanen te siyudad.
6 “Emun ke egkengeinu-inu ka keet-etawan ku ne nasame te seini ne timpu, kena a mule egkeinu-inu.
7 Su egpangabangan ku ka keet-etawan ku ne impandakep wey impanguyan diye te me inged ne diye te igsile wey diye te iglineb.
8 Igpalibed ku sikandan igpeugpe diye te Hirusalim. Ne egkeyimu sikandan ne keet-etawan ku, wey egkeyimu a ne Manama ran wey egtumanen ku ka insaad ku kandan wey egmatareng a kandan.”
9 Ne kahi te Amana ne Maresen ne Magbebaye, “Pakannekal kew! Iling ded ka imbanasal te me prupita dengan te sikan pad himuwa ka pabunsuran te timplu ku ne egbalbalawan. Ne kuntee narineg niyud degma seini.
10 Masumpit dengan ka egkeula-ula niyu te ware kew pad man‑e migbunsud ka egbalew-balew te timplu. Ware bayad te etew wey ayam ne igtrabahu, wey egngilam degma ka langun ne etew ke eggipanew te minsan hendei su impegkuntere ku ka me etew.
11 Piru kuntee, sikaniyu se nenasame, kene kud e igpasalerep te karereetan.
12 Egpamula kew ne warad igkangilam. Ne egpamehas ka me paras niyu, wey ka duma ne me pinamula niyu, wey egpeuranan ku degma. Igbehey ku seini se langun kaniyu te nenasame ne keet-etawan.
13 Me keet-etawan te Huda wey te Israil, indilus kew te duma ne nasud. Piru egpangabangan ku sikaniyu wey egkeyimu kew ne panalangin te duma. Purisu pakannekal kew wey kene kew kaaldek.”
14 Migkahi ka Amana ne Maresen ne Magbebaye, “Inlegparan ku sikaniyu puun su impasagkilan a te me kabuybuyahan niyu ne egkalangetan, wey wara ad iya neyid‑u kaniyu.
15 Piru kuntee, nakasuman-suman a ne eg-upianan kud e man‑e ka Hirusalim wey ka Huda. Purisu kene kew kaaldek.
16 Seini ka eleg ne eggimuwen niyu: Pahuhurey kew te malehet, wey ikula niyu ka eleg ne peggukum su seini ka egpakabehey kaniyu te keupianan.
17 Kene kew suman-suman ne egdereet te duma niyu, wey kene kew pamalehet te ubat su igkeepes ku sika.”
18 Ne ingkahiyan e man‑e te Amana ne Maresen ne Magbebaye si Sakariyas,
19 “Ka pegpuasa te igkeep‑at ne bulan, te igkalimma, te igkapitu, wey te igkasapulu ne bulan, egkeyimu ne pegsahakeen te keet-etawan te Huda. Purisu ipapitew niyu ka malehet wey peup-upianey kew.”
20 Seini ka inlalag te Amana ne Maresen ne Magbebaye, “Egmangendiye te Hirusalim ka masulug ne me etew ne egpuun te masulug ne siyudad.
21 Ne egpangginggat ka me mahinged te sabeka ne siyudad te me mahinged te duma ne siyudad ne eggenendue, ‘Apas kew e! Eggendiye ki te Hirusalim! Egsimba ki te Amana ne Maresen ne Magbebaye, wey eghangyu ki kandin ne egpanalanginan ki. Eggendiye key iya degma!’
22 Masulug ka me etew ne egpuun te maresen ne me nasud ne eggendiye te Hirusalim eyew egsimba te Amana ne Maresen ne Magbebaye, wey eyew eghangyu te panalangin din.
23 Te seeye ne me timpu due sapulu ne etew ne egpuun te nalein-lein ne me nasud wey ware nenekeg-iling se linalahan, ne eggen-gen te kumbale te sabeka ne Hudiyu wey egkahi, ‘Egduma key keykew su nakarineg key ne indumaan ka te Magbebaye ne Manama.’ ”