7
Ka kene ne malehet ne pegpuasa
1 Te igkeep‑at ne leg‑un te peghari ni Daryu, migpanengneng ki Sakariyas ka Magbebaye ne Manama; igkeep‑at seeye ne aldew te igkasiyam ne bulan te Kislib.
2 Te seeye ne timpu, insuhu te me matig-Bitil si Sarisir wey si Rigim-Milik duma te me etew ran ne eggendiye te timplu te Amana ne Maresen ne Magbebaye eyew te pegpeyimmimenew kandin,
3 wey te peg-inse te me talagpanubad diye wey te me prupita ke keilangan naan pad sikandan ne egparahas-dahas eglungku wey egpuasa te tagse igkalalimma ne bulan te tagse leg‑un eyew te pegsuman-suman te pegkahuhus dengan te timplu te Magbebaye, iling te inggimu ran dengan.
4 Ne seini ka inlalag ki Sakariyas te Amana ne Maresen ne Magbebaye:
5 “Kahii nu ka langun ne matig-Israil wey ka me talagpanubad, te kene ne sikeddiey ka impuasaan dan te igkalalimma wey te igkapitu ne bulan. Migpuasa iya sikandan wey miglungku seled te pitu ne pulu (70) ne leg‑un, piru ware dan sika himuwa para keddiey.
6 Ne minsan ka pegsahakeen dan, inggimu ran de sika para te kandan ne kahalaan.
7 Sikan ded degma dengan ka impahuhud ku kandan te me prupita ku te timpu te matubung pad ka Hirusalim wey duen pad nangugpe kayi lagkes ka maddani ne me siyudad, ka Nigib, wey ka lenlen te me bubungan te Huda.”
Ka pegkeuripen dan tenged te pegsupak dan
8 Ne impanengneng e man‑e te Amana ne Maresen ne Magbebaye si Sakariyas:
9 “Seini ka ignangen ku te keet-etawan ku: ‘Ipeikul niyu te eleg ka peggukum niyu. Peup-upianey kew wey peyimmimenawey kew.
10 Kene niyu de-deeha ka me balu, ka me ilu, ka me lapu wey ka egkaayu-ayu. Kene kew suman-suman te mareet diye te duma.’ ”
11 “Piru ware dan linglingaa ka inlalag ku kandan. Migpakehal sikandan te me ulu ran wey ware sikandan migpammineg.
12 Impakehal ran ka me ulu ran iling te batu, wey imbalahad dan de ka me balaud ku wey ka me suhu ku ne impahuhud te Panisingan ku te me prupita dengan. Purisu amana a nabelu.
13 Ne tenged su ware sikandan migpammineg te inlalag ku, kene ku degma sikandan egpamminehen ka egpangumew keddi.
14 Nekeiling a te balisusu ne migmegsuwey-suwey kandan diye te nalein-lein ne me nasud ne ware dan pad nabayei. Purisu neengkeran dan e ka meupiya ne me inged dan, wey warad e nangugpe diye.”