1 Ne migpahiggireey ka me Pilistihanen wey me matig-Israil diye te bubungan te Gilbuwa. Ne masulug ka migpatey ne me matig-Israil diye wey nenakapallahuy ka duma kandan. 2 Impatamtamanan lupuha te me Pilistihanen si Saul wey ka anak din ne me lukes wey neyimatayan dan ka anak din ne si Diyunatan, si Abinadab, wey si Malkisuwa. 3 Masumpit ka gira enni Saul wey nakita sikandin te me talagpane. Ne dutu, impepane dan e sikandin wey napalian sikandin. 4 Ingkahiyan ni Saul ka talag-uyan te panganiban din, “Hulabuta nu ka kampilan nu wey himatayi a nikeykew, su kema ke iyan egpekeyimatey keddi sika se me etew ne malindit.* Te Hibruwanen: ware natulii. Ne puun due, egngingisiyan ad nikandan.” Piru naaldek ka talag-uyan te panganiban din wey ware din seeye himuwa, sikan naa ka ingkuwe e ni Saul ka kampilan din wey inteen din e diye te tane, wey migpahumpepeled e sikandin dutu. 5 Te pegkakita te talag-uyan te panganiban te migpatey e si Saul, inteen din e degma diye te tane ka kampilan din wey migpahumpepeled e degma sikandin, wey migpatey e degma. 6 Purisu migpatey si Saul wey ka tatelu ne anak din ne me lukes ne iyan egpuunan ne nataman ka kabuhalan din. 7 Te pegkarineg te seeye se me matig-Israil ne diye te bangalug ne namallahuy e ka sundalu wey napatey e si Saul wey ka me anak din, in-engkeran dan e ka me lungsud dan, wey migpamallahuy e degma sikandan. Ne migmanlepew e ka me Pilistihanen wey iyan e mig-ugpe diye.

8 Te seup ne aldew, te peggendiye te me Pilistihanen te bubungan te Gilbuwa eyew te pegpanguwa te me kasangkapan te nenapatey, nakita ran diye si Saul wey ka me anak din ne me lukes ne migpatey e. 9 Ne inluungan dan e si Saul wey intempug dan e ka ulu rin wey impanguwa ran e ka me panganiban din. Ne migsuhu sikandan te me etew diye te intiru ne tane te me Pilistihanen eyew te pegpanengneng te meupiya ne panugtulen diye te timplu te me diyus-diyus dan wey diye te me etew. 10 Ne intahu dan ka panganiban din diye te timplu te me manama ran wey insanggat dan ka ulu rin diye te timplu ni Dagun. 11 Te pegkarineg te me matig-Habis-Gilyad te langun ne inggimu te me Pilistihanen ki Saul, 12 nangipanew e ka langun ne bahani wey ingkuwa ran e ka lawa ni Saul wey lawa te me anak din wey in-uyan dan e diye te Habis. Ne inlebeng dan e ka me tul‑an† Tul‑an naan de enni Saul wey te me anak din ne me lukes ka nakalebeng su insilaban ma ka lawa ran te matig-Gilyad. diye te lebut te dakel ne kayu wey ware migkeen sikandan taman te pitu ne aldew. 13  ✡ 1Sam 13:8-14; 15:1-24; Lib 19:31; 20:6; 1Sam 28:7-8.Migpatey si Saul tenged te pegkamasinupaken din. Ware sikandin migtuman te me paney-paney te Magbebaye ne Manama. Nasi sikandin migpanginginse te manenagne, 14 wey ware diye te Magbebaye ne Manama. Purisu impeyimatayan sikandin te Magbebaye ne Manama wey imbehey e ka migharian din diye te ki Dabid ne anak ni Hisi.