1 Ne migsuhu ka Hari te Tiru ne si Hiram te me suluhuanen peendiye ki Dabid, wey migpeuyan te me kayu ne sidar, me talagperi te batu, wey me talagbebaley eyew eggimu te palasyu ni Dabid. 2 Ne nanengnengan ni Dabid ne ka Magbebaye ne Manama ka miggimu kandin ne Hari te Israil wey ka amana migpanalangin te migharian din para te keupianan te keet-etawan din ne me matig-Israil.

3 Ne migpangasawa pad si Dabid te masulug ne me malitan diye te Hirusalim, wey migmasalig pad ka me lukes wey me malitan ne me anak din. 4 Seini ka me ngaran te me anak ni Dabid ne neetew diye te Hirusalim: si Samuwa, si Subab, si Natan, si Sulumun, 5 si Ibhar, si Ilisuwa, si Ilpilit, 6 si Nuga, si Nipig, si Hapiya, 7 si Ilisama, si Biilyada, wey ka lein ne Ilipilit.

8 Te pegkanengnengi te me Pilistihanen ne si Dabid e ka naalam ne Hari te Israil, nanakereg e sikandan langun eyew egdakep kandin. Piru nanengnengan seeye ni Dabid, wey insinug-ung din sikandan te egpakiggira. 9 Ne miggingume e ka me Pilistihanen wey miglusuran dan e ka Bangalug te Ripaim. 10 Purisu mig-inse si Dabid te Magbebaye ne Manama, “Eglusuran ku naa ka me Pilistihanen? Igpareeg nu naa sikandan keddi?”

Ne migtabak ka Magbebaye ne Manama, “Uya, hipanew kad su igpareeg ku iya sikandan keykew.”

11 Purisu miggendiyaan e enni Dabid ka me Pilistihanen diye te Baal-Pirasim* Ka ngaran ne Baal-Pirasim, iyan igpasabut te Hibruwanen se “Magbebaye ne Manama te pegkabusi-si”. wey natalu ran sikandan diye. Ne migkahi si Dabid, “Imparereetan keddi te Magbebaye ne Manama ka me kuntere ku iling te nabusaye ne weyig.” Sikan naa ka ingngaranan seeye ne inged te Baal-Pirasim. 12 Ne neengkeran e te me Pilistihanen ka me diyus-diyus dan diye wey impepanilaban e seeye ni Dabid.

13 Ne nataman, miglusud e man‑e mig-abey ka me Pilistihanen, diye te Bangalug te Ripaim. 14 Ne mig-abey e man‑e mig-inse si Dabid te Manama wey migtabak ka Manama, “Kene niyu sikandan sinug-unga te eglusud, ke kene, linguti niyu sikandan wey diye niyu sikandan lusuri te egkatangkaan te me kayu ne balsamu. 15 Emun ke egkarineg niyu ka egwekes-wekes diye te uud te me kayu ne balsamu, lusud kew naan e su sika ka ilaan ne miggun‑a a kaniyu ka egdereet te me Pilistihanen.” 16 Purisu intuman ni Dabid ka insuhu te Manama kandin wey impangimatayan dan ka me Pilistihanen puun te Giba taman te Gisir. 17 Purisu nekeempet te minsan hendei ne inged ka kabantug ni Dabid, wey inggimu te Magbebaye ne Manama ne egkaaldek kandin ka langun ne nasud.