1 Ne migpabebaley si Dabid te masulug diye te siyudad din. Ne mig-andam sikandin te egtahuan te Tahuanan te Kasabutan te Manama, wey inggimuwan din seini te balungbalung. 2  ✡ Diy 10:8.Ne migsuhu sikandin ne keilangan ne ka me Libita re ka eg-uyan te Tahuanan te Kasabutan te Manama, su sikandan ma ka in-alam te Magbebaye ne Manama ne eg-uyan kayi, wey ka egpamakey kandin te ware egtamanan. 3 Ne impalibulung ni Dabid diye te Hirusalim ka langun ne keet-etawan te Israil eyew eg-uyan te Tahuanan te Kasabutan te Manama diye te in-andam din ne egtahuan kayi. 4 Ne impeumew degma ni Dabid ka me talagpanubad wey ka me Libita. 5 Ne due 120 ne etew ne egpuun te karumaan ni Kuhat ne impanguluwan ni Uril. 6 Ne due 220 ne etew ne egpuun te karumaan ni Mirari ne impanguluwan ni Asayas. 7 Ne due 130 ne etew ne egpuun te karumaan ni Girsum ne impanguluwan ni Huwil. 8 Ne due daruwa ne gatus (200) ne etew ne egpuun te karumaan ni Ilisapan ne impanguluwan ni Simaya. 9 Ne due walu ne pulu (80) ne etew ne egpuun te karumaan ni Hibrun ne impanguluwan ni Ilil. 10 Ne due 112 ne etew ne egpuun te karumaan ni Usil ne impanguluwan ni Aminadab. 11 Ne impeumew ni Dabid ka me talagpanubad ne si Saduk, si Abiyatar, wey ka me Libita ne si Uril, si Asiyas, si Huwil, si Simaya, si Ilil, wey si Aminadab. 12 Ne ingkahiyan din sikandan, “Me pangulu te me pamilya te me Libita, keilangan ne egmatulus kew te pegkeetew niyu wey ka langun ne duma niyu ne me Libita, eyew eg-uyan te Tahuanan te Kasabutan te Magbebaye, ka Manama te Israil, diye te in-andam ku ne egtahuan kayi. 13 Te an-anayan ne timpu kene ne sikaniyu ka mig-uyan te Tahuanan te Kasabutan, sikan naa ka inlegparan ki te Magbebaye ne Manama ta su ware ki ma mig-inse kandin te eleg ne paahi te peg-uyan kayi.”

14 Purisu immatulus te me talagpanubad wey te me Libita ka pegkeetew ran eyew egkeuyan dan ka Tahuanan te Kasabutan te Manama te Israil. 15  ✡ Iks 25:14.Ne inyayungan te me Libita ka Tahuanan te Kasabutan te Manama, sumale te insuhu te Magbebaye ki Muwisis.

16 Ne imbanasalan ni Dabid ka me pangulu te me Libita ne eg-alam te me karumaan dan isip me talag-ulahing ne egbalesan te me lira, me alpa, wey me putew ne basalan. 17 Purisu in-alam te me Libita si Himan ne anak ni Huwil wey ka karumaan din ne me Libita ne si Asap ne anak ni Birikiyas, wey si Itan ne anak ni Kusiyas ne egpuun te me kabuhalan ni Mirari. 18 Ne ka naalam ne egbulig kandan iyan ka me karumaan dan ne si Sakariyas, si Hasiil, si Simiramut, si Hihiil, si Uni, si Iliyab, si Binayas, si Maasiyas, si Matatiyas, si Ilipilihu, si Makiniyas, wey ka me talagtameng te gumawan ne si Ubid-Idum wey si Hiil. 19 Ne ka me mangngulahing ne si Himan, si Asap, wey si Itan ka nenaalam ne talagparahing te putew ne basalan. 20 Ne si Sakariyas, si Asiil, si Simiramut, si Hihiil, si Uni, si Iliyab, si Maasiyas, wey si Binayas ka nenaalam ne egparahing te me alpa ne mematikang se dahing. 21 Ne si Matatiyas, si Ilipilihu, si Makiniyas, si Ubid-Idum, si Hiil, wey si Asasiyas ka nenaalam ne egparahing te me lira ne mallepet se dahing.

22 Ne si Kininiyas ne pangulu te me Libita, iyan talagpanulu ke egmenuwen te eg-ulahing su amana ma sikandin ne egkateu ne eg-ulahing. 23 Ne si Birikiyas wey si Ilkana, iyan me talagbantey te gumawan te intahuan te Tahuanan te Kasabutan te Manama. 24 Ne ka me talagpanubad ne si Sibaniyas, si Husapat, si Natanail, si Amasay, si Sakariyas, si Binayas, wey si Ilisir, iyan me talaggiyup te me trumpita diye te tangkaan te Tahuanan te Kasabutan te Manama. Ne si Ubid-Idum wey si Hihiyas pad man‑e ka me talagbantey te gumawan te intahuan te Tahuanan te Kasabutan te Manama.

25 Purisu si Dabid wey ka me pangulu te Israil wey ka me upisyal te me sundalu, nangendiyad e te baley ni Ubid-Idum ka naggale-gale ne eg-angey te Tahuanan te Kasabutan te Magbebaye. 26 Ne tenged te imbulihan te Magbebaye ne Manama ka me Libita ne mig-uyan te Tahuanan te Kasabutan te Magbebaye, migpanubad sikandan te pitu ne turu ne baka wey pitu ne lukesan ne karniru. 27 Ne migsaluub si Dabid te mahal ne hinabel wey iling ded degma ka langun ne Libita ne mig-uyan te Tahuanan te Kasabutan te Manama, ka me mangngulahing, wey si Kininiyas ne pangulu te masulug ne eg-ulahing. Migsaluub man‑e si Dabid te mateles ne kumbale ne egngaranan te ipud.* Ka ipud iyan ka kumbale ne egpekeiling te sening ne igpagket te Labew ne Talagpanubad diye te kumeng din ke egseled sikandin diye te balungbalung. Due hiket te ipud ne igsampey diye te pamanayen wey igbanggut diye te kumbale te liwaraan te talagpanubad. 28 Ne in-uyan te langun ne me matig-Israil ka Tahuanan te Kasabutan te Magbebaye wey migmanguleyi sikandan tenged te kahale, migparahing te eggiyupen ne me sungey, me trumpita, putew ne basalan, wey te meemen ne pegparahing te alpa wey te me lira.

29 Piru te nekeume e ka Tahuanan te Kasabutan te Magbebaye diye te Siyudad ni Dabid, migpantew te bintana si Mikal ne anak ni Saul ne malitan, wey nakita rin si Hari Dabid ka migsayew-sayew ne nahale-gale, wey inlemetan din te heles de.