1 Te miglihad ka timpu, natalu ni Dabid ka me Pilistihanen wey nasakup din sikandan. Naahew rin ka Gat wey ka me lungsud ne nakalingut kayi. 2 Natalu rin degma ka me matig-Muwab, wey neuripen din e sikandan, wey impabayad din sikandan te me buhis.

3 Natalu degma ni Dabid diye te Hamat si Hadadisir ne Hari te Suba, te peggendiye ni Hadadisir te Weyig ne Iyupratis eyew egsakupen din perem seini. 4 Naahew ni Dabid ka sabeka ne libu (1,000) ne karwahi, wey narakep din ka pitu ne libu (7,000) ne sundalu ne migmangudde, wey daruwa ne pulu ne libu (20,000) ne sundalu ne nangipanew re. Ne impanlepuan ni Dabid ka langun ne kudde angin e te pila-pila ne ware din menuwa eyew egsangenan te sabeka ne gatus (100) ne karwahi.

5 Te pegginguma te me matig-Sirya ne egpuun te Damasku eyew te pegbulig ki Hadadisir ne Hari te Suba, inggimatayan te me sundalu ni Dabid ka daruwa ne pulu wey daruwa ne libu (22,000) kandan. 6 Ne migpangampuwan ni Dabid ka inged te me matig-Sirya diye te Damasku, wey nasakup din sikandan wey migbayad e sikandan te buhis diye te kandin. Impepanalu si Dabid te Magbebaye ne Manama minsan hendei sikandin migbaye. 7 Ne impanguyan ni Dabid ka me bulawan ne kalasag te me upisyal ni Hadadisir wey impanlaglag din e seini diye te Hirusalim. 8  ✡ 1Har 7:40-47; 2Kru 4:11-18.Ingkuwa degma ni Dabid ka susuluhi ne burunsi puun te Tibat wey Kun ne me siyudad ni Hadadisir. Ne ka seini ne burunsi iyan inggimu ni Sulumun ne bubuyahen ne yahung ne egngaranan te Dahat, me sungkaleg, wey me kasangkapan te timplu.

9 Te pegkarineg ni Tuy ne Hari te Hamat ne natalu ni Dabid ka langun ne sundalu ni Hadadisir ne Hari te Suba, 10 impeendiye din e ka anak din ne si Huram eyew te pegsaye ki Dabid tenged te kapanaluwan te pegpakiggira din ki Hadadisir. (Tapey ne talagkuntere si Tuy wey si Hadadisir.) Ne in-uyanan din si Dabid te me kasangkapan ne inggimu puun te bulawan, pelata, wey burunsi. 11 Ne inhalad ni Hari Dabid seini ne me kasangkapan diye te Magbebaye ne Manama, duma te pelata wey bulawan ne nakuwa rin puun te langun ne me nasud, lagkes en iya ka Idum, ka Muwab, ka Amun, ka Pilistiya, wey ka Amalik.

12  ✡ Sal 60 Uluwan.Ne si Abisay ne anak ni Siruya, nakapatey te sapulu wey walu ne libu (18,000) ne me matig-Idum diye te bangalug ne egngaranan te Asin. 13 Ne impakekampuwan din te me sundalu ka intiru ne inged ne Idum wey nasakup din ka langun ne matig-Idum. Impepanalu sikandin te Magbebaye ne Manama minsan hendei sikandin egbaye.

14 Purisu mighari si Dabid te intiru ne Israil wey meupiya ka inggimu rin wey eleg ka peggukum din te langun ne keet-etawan din. 15 Ne si Huwab ne anak ni Siruya ka pangulu te me sundalu rin. Ne iyan talagsulat te egkengeyitabu si Hihusapat ne anak ni Ahilud. 16 Ne iyan me talagpanubad si Saduk ne anak ni Ahilud wey si Abimilik ne anak ni Abiyatar. Ne iyan sikritari si Sarayas. 17 Ne si Binayas ne anak ni Huyada ka pangulu te me Kiritihanen wey te me Pilitihanen ne me talagbantey ki Dabid. Ne ka me anak din ka labew ne me pangulu te me upisyal.