1 Ne migpeyimu si Sulumun te palasyu rin, wey migsapulu wey tatelu (13) ne leg‑un human seini neimpusi. 2 Ne migpeyimu sikandin te dakel ne baley ne egngaranan te Baley te Puwalas te Libanun. Hep‑at ne pulu wey lalimma (45) ne mitrus ka kalayat te baley, daruwa ne pulu wey tatelu (23) ne mitrus ka kaluag, wey sapulu wey hep‑at (14) ne mitrus ka katikang. Insungkalehan seini te sidar ne hep‑at* hep‑at: Te duma ne baseen, tatelu. ne linya. Sapulu wey lalimma (15) ka sungkaleg te tagse linya, wey impangetalan seini te hep‑at ne pulu wey lalimma (45) ne geed. 3 Due degma kisami ne sidar ne para te me sinabeng ne in-ampew te me geed. 4 Ne ka nekeglimang ne alabat te dakel ne baley, due tatelu ne linya ne me bintana ne nekegtangke. 5 Ne due degma tatelu ne gumawan ne diye te tangkaan wey liyu te baley. Kuwadradu ka me tangenan wey nekegtangke ka tagse sabeka.

6 Ne migpeyimu man‑e sikandin te maluag ne libulunganan ne egngaranan te Libulunganan te me Sungkaleg. Daruwa ne pulu wey tatelu (23) ne mitrus ka kalayat wey sapulu wey hep‑at (14) ne mitrus ka kaluag. Due likansu dapit te katangkaan ne in-atepan te manggad, wey due me sungkaleg.

7 Ne migpeyimu man‑e sikandin te dakel ne sinabeng ne egngaranan te Sinabeng te Trunu. Egngaranan man‑e seini te Sinabeng ne Hukumanan su seini ka husayanan din. Ne impangakeban ka sinabeng te tabla ne sidar, minsan ka seeg wey ka atep.

8  ✡ 1Har 3:1.Ne diye te liyu te Sinabeng te Trunu ka palasyu ni Sulumun ne impeiling te eggimu te Sinabeng te Trunu. Ne migpeyimu man‑e sikandin te baley ne iling ded due para te asawa rin ne anak te Hari te Ihiptu.

9 Ne iyan inggamit te peggimu te langun ne baley wey te maluag ne libulunganan ka tetelesi ne me batu ne impaay-ayaran te egperi wey impanapsapan, ligkat te pabunsuran taman diye te me atep. 10 Derakel wey mahal ne me batu ka inggimu ne me pabunsuran ne lalimma ne mitrus se kalayat, wey ka duma hep‑at ne mitrus se kalayat. 11 Ne in-ampawan seini te me ketal ne sidar wey tetelesi ne me batu ne impameri sumale iya te eleg ne karakel. 12 Ne in-alabatan ka maluag ne libulunganan te senge-untud ne geed ne sidar ne in-ampew te tatelu ne untud ne insapsapan ne me batu. Ne iling ded degma rue ka in-alabat te maluag ne libulunganan te timplu te Magbebaye ne Manama wey te likansu kayi.

13 Ne impaangey ni Hari Sulumun si Hiram puun te Tiru. 14 Anak sikandin te balu ne kabuhalan ni Naptali, wey matig-Tiru ka amey rin ne mangngateu te burunsi. Ne mangngateu degma amana si Hiram ne egpangimu te minsan nekey ne kasangkapan ne burunsi. Ne miggendiye sikandin ki Hari Sulumun wey inggimu rin ka langun ne impeyimu ni Sulumun kandin.

15 Ne miggimu si Hiram te daruwa ne sungkaleg ne burunsi. Tagse sungkaleg, walu ne mitrus ka kalayat, wey lalimma wey liware ne mitrus ka karakel. 16 Ne miggimu man‑e sikandin te daruwa ne ulu-ulu ne burunsi ne igtahu diye te pupul te daruwa ne sungkaleg. Tagse ulu-ulu, daruwa ne mitrus ka katikang, 17 wey indayan-dayanan te pitu ne andang te impanlalab ne sinalapid ne me keddina. 18 Imbeleberan man‑e ka tagse ulu-ulu te daruwa ne linya te burunsi ne impeiling te prutas ne granada. 19 Ne in-iling te bulak ne liryu ka me ulu-ulu te me sungkaleg ne daruwa ne mitrus se katikang. 20 Ne ka ulu-ulu te daruwa ne sungkaleg, imbeleberan te daruwa ne linya te daruwa ne gatus (200) ne burunsi ne impeiling te prutas ne granada. Intahu seini dapit te malibusen, ampew te impanlalab ne keddina.

21 Ne impasasindeg e ni Hiram ka me sungkaleg diye te tangkaan te timplu, ka sabeka diye te igkakawanan ne balabahan wey ka sabeka diye te igkahibang ne balabahan. Ne ka diye te igkakawanan ne balabahan, ingngaranan te Hakin, ne ka diye te igkahibang ne balabahan, ingngaranan te Buas. 22 Seeye naa se nekeiling te bulak ne liryu ka me ulu-ulu te daruwa ne sungkaleg.

Ne neimpusan en iya ka peggimu te me sungkaleg.

23 Ne migpeyimu man‑e sikandin te bubuyahen ne pelenggana ne burunsi ne egtahuan te weyig ne egngaranan te Dahat. Subla te hep‑at ne mitrus ka kaluag wey subla te daruwa ne mitrus ka katikang, wey subla te sabeka ne pulu wey tatelu ne mitrus ka kalibusen. 24 Ne diye te diddiralem te bibig te pelenggana, inlingutan day-rayani te daruwa ne dangdang te egpekeiling te me upu ne impareket. Me daruwa ne pulu (20) ne upu ka impareket te tagse mitrus. 25 Impapinnuu ka bubuyahen ne pelenggana ne burunsi diye te peka te sapulu wey daruwa (12) ne immangimu ne baka ne immeg-inniyug: tatelu ka nakatangke diye te igkakawanan ne balabahan, tatelu ka nakatangke diye te igkahibang ne balabahan, tatelu ka nakatangke diye te iglineb, wey tatelu ka nakatangke diye te igsile. 26 Sabeka ne dangew ka kakepal te bibig te limuranan te weyig ne iling te bibig te ubag ne nekeiling te bulak te liryu ne migpamukadkad. Egkatahuan seini te me sapulu ne libu (10,000) ne gelun ne weyig.

27 Ne miggimu man‑e si Hiram te sapulu ne burunsi ne papinnuuwan te pelenggana. Tigdaruwa ne mitrus ka kalayat te tagse sabeka, daruwa ne mitrus ka kaluag, wey sabeka ne mitrus wey liware ka katikang. 28 Ne iling kayi ka peggimu te me papinnuuwan te pelenggana: tagse sabeka due me hep‑at ne pikungan, wey impangalabatan seini 29 te ingkulitan te me liyun, me turu ne baka, wey me kirubin. Due man‑e ingkulit ne me bulak diye dapit te dibabew wey diralem te ulaula te me liyun wey me turu ne baka. 30 Ne ka tagse papinnuuwan te pelenggana, impanligiran te burunsi wey burunsi red man‑e ka me ihi te liggid. Ne ka tagse pikungan impanuley te burunsi ne impandayan-dayanan te me bulak. 31 Diye te seled te papinnuuwan te pelenggana, due sengel para te pelenggana ne malibusen se lungag. Nakatimpa seini te papinnuuwan te pelenggana te sabeka ne palapala wey liware wey indayan-dayanan degma seini te me kinulit. 32 Ne diye itangen te diralem te alabat ka hep‑at ne liggid te papinnuuwan te pelenggana ne me daruwa ne palapala wey liware se katikang. In-uney re ka me liggid wey ka me ihi diye te me sungkaleg. 33 Iling ded te me liggid te karwahi ka me liggid te papinnuuwan te pelenggana. Neneelin ne burunsi ka me ihi, me tubu, me rayus, wey me yantas. 34 Ne tagse papinnuuwan te pelenggana, due hep‑at ne suley, sabeka te tagse pikungan, wey in-uney re iya man‑e seini diye te papinnuuwan te pelenggana. 35 Ne diye te ampew te tagse papinnuuwan te pelenggana, due bibig ne subla te me senge-rangew se kaluag. Ka me suley wey me alabat, in-uney re iya diye te lawa te papinnuuwan te pelenggana. 36 Impandayan-dayanan te impangulit ne me kirubin, me liyun, wey me palmira ka me suley wey me alabat te me papinnuuwan te pelenggana. Indayan-dayanan ka minsan hendei ne egkaayun pad. Impalingutan man‑e seini te impangulit ne me bulak. 37 Ne iling naa due ka peggimu ni Hiram te sapulu ne papinnuuwan te pelenggana. Nenekeg-iling ka karakel wey ka ulaula te langun.

38  ✡ Iks 30:17-21.Ne migpangimu e man‑e si Hiram te sapulu ne pelenggana ne burunsi—sabeka ne pelenggana te tagse sabeka degma ne papinnuuwan. Daruwa ne mitrus ka kaluag te nekeglimang ne bibig te pelenggana, wey egkatahuan seini te daruwa ne gatus (200) ne gelun ne weyig. 39 Impasasindeg din ka me papinnuuwan te pelenggana, lalimma ka dapit te igkakawanan te timplu, wey lalimma degma ka dapit te igkahibang te timplu. Ne diye din ipasasindeg dapit te igkakawanan te timplu ka limuranan te weyig ne burunsi ne egngaranan te Dahat, elat-elat te igkakawanan ne balabalahan wey te igsile. 40 Miggimu degma si Hiram te kuren puun te basak, me pala, wey me yahung.

Neimpusan ded iya ni Hiram ka langun ne impeyimu ni Sulumun te timplu te Magbebaye ne Manama.

Ne seini langun ka neyimu ni Hiram: 41 ka daruwa ne sungkaleg; ka daruwa ne pupul te me sungkaleg ne egpekeiling te yahung; ka daruwa ne inlubid ne keddina ne indayan-dayan diye te pupul te me sungkaleg; 42 ka hep‑at ne gatus (400) ne me prutas ne egngaranan te granada ne burunsi ne impamitin te daruwa ne dangdang diye te inlubid ne keddina ne intahu diye te pupul te me sungkaleg; 43 ka sapulu ne egpeunturan, wey ka sapulu ne me pelenggana ne igmapinnuu; 44 ka tahuanan te weyig ne egngaranan te Dahat wey ka sapulu wey daruwa (12) ne larawan te turu ne baka ne egpeunturan te tahuanan te weyig; 45 ka me kuren ne inggimu puun te tane, ka me pala, wey me yahung.

Impasilak ka langun ne burunsi ne kasangkapan te timplu te Magbebaye ne Manama ne impangimu ni Hiram para ki Hari Sulumun. 46 Diye seini ipeyimu te Hari te napu te Hurdan ne himuwanan te kuren ne tane diye te eletanan te Sukut wey Saritan. 47 Warad e ipatimbang ni Hari Sulumun ka langun ne kasangkapan puun su amana seini ne susuluhi. Sikan naa ka ware iya nanengnengi ke pila ne kilu ne burunsi ka nahamit langun.

48  ✡ Iks 30:1-3; Iks 25:23-30.Ne migpeyimu man‑e si Sulumun te seini ne me kasangkapan para te timplu te Magbebaye: bulawan ne altar ne eg-unturan te egtutungen; ka bulawan ne lamisa ne eg-unturan te paan ne ighalad diye te tangkaan te Manama; 49  ✡ Iks 25:31-40.ka me tahuanan te sulu ne neelin ne bulawan ne diye te tangkaan te Amana ne Matulus ne Sinabeng. Lalimma ka dapit te igkakawanan, wey lalimma degma ka dapit te igkahibang; ka indayan-dayan ne neelin ne bulawan ne me bulak, me sulu, wey me sipit; 50 ka me pakawan, ka igmanempug te pebilu te sulu, ka me pelenggana, ka me tahuanan te insinsu, ka me tahuanan te baha ne neelin ne bulawan. Bulawan ded man‑e ka me bisagra te gumawan te Amana ne Matulus ne Sinabeng, wey ka me bisagre en iya te me gumawan te timplu.

51  ✡ 2Sam 8:11; 1Kru 18:11.Ne neimpusan ded iya ni Hari Sulumun ka pegpasasindeg te timplu te Magbebaye ne Manama. Ne impanines e ni Sulumun diye te sinabeng ne tinesanan te timplu te Magbebaye ka me kasangkapan ne inhalad te amey rin ne si Dabid ne iyan ka pelata, ka bulawan, wey ka duma pad ne me kasangkapan.