1 Seini ka me punduk te me talagbantey te gumawan te timplu: puun te me kabuhalan ni Kura, si Misilimiyas ne anak ni Kuri ne sabeka te me anak ni Asap. 2 Si Misilimiyas due pitu ne anak ne me lukes ne iyan si Sakariyas ka kinakakayan, si Hidiyail ka igkarangeb, si Sibadiyas ka igkatelu, si Hatanail ka igkeep‑at, 3 si Ilam ka igkalimma, si Diyuhanan ka igkeen‑em, wey si Iliyunay ka igkapitu.

4  ✡ 2Sam 6:11; 1Kru 13:14.Ne due etew ne egngaranan ki Ubid-Idum ne due walu ne anak ne lukes: si Simaya ka kinakakayan, si Husabad ka igkarangeb, si Huwa ka igkatelu, si Sakar ka igkeep‑at, si Natanail ka igkalalimma, 5 si Amil ka igkeen‑em, si Isakar ka igkapitu, wey si Pulati ka igkawalu.

6 Ne si Simaya ne kinakakayan ne anak ni Ubid-Idum, due me anak ne me lukes ne iyan me pangulu te me pamilya ran su amana ma sikandan egkasalihan ne me lukes. 7 Ne ka me anak ni Simaya ne me lukes iyan si Utni, si Rapail, si Ubid, si Ilsabad wey ka me karumaan din ne si Ilihu, wey si Samakiyas ne due me katuenan ne me lukes.

8 Hen‑em ne pulu wey daruwa (62) langun ka me kabuhalan ni Ubid-Idum, lagkes ka me anak dan wey ka me karumaan dan ne amana egkasalihan te pegtrabahu.

9 Ne si Misilimiyas due me anak ne me lukes wey me karumaan ne derakel degma se me katuenan. Sapulu wey walu (18) sikandan langun.

10 Ne si Husa ne egpuun te kabuhalan ni Mirari due hep‑at ne anak ne me lukes: si Simri, ka pangulu ran minsan kene ne sikandin ka kinakakayan, 11 si Hilkiyas ka igkarangeb, si Tibaliyas ka igkatatelu, wey si Sakariyas ka igkeep‑at. Sapulu wey tatelu (13) langun ka karumaan wey me anak ne me lukes ni Husa.

12 Ne imbaad-baad te tigsenge-punduk ka me talagbantey te me gumawan te timplu sumale te pangulu te me pamilya ran, wey impamehayan sikandan te me katungdanan diye te timplu te Magbebaye ne Manama iling te me karumaan dan ne me Libita. 13 Ne migpintut-pintut ka tagse pamilya, me bate wey se me buyag e, eyew egkanengnengan dan ke hendei ne gumawan ka egbantayan dan. 14 Ne ka dapit te igsile ne gumawan iyan napintutan ne egbantayan ni Silimiyas. Ne ka gumawan ne dapit te igkahibang ne balabahan, iyan napintutan ne egbantayan te anak din ne si Sakariyas. Si Sakariyas matagseb ne talagtambag. 15 Ne ka dapit te igkakawanan ne balabahan ne gumawan ka napintutan ne egbantayan ni Ubid-Idum wey ka baley ne tahuanan ka napintutan ne egbantayan te me anak din. 16 Ne ka dapit te iglineb ne gumawan wey ka gumawan te timplu ne peendiye te dibabew ne dalan ka napintutan ne egbantayan ni Supim wey ni Husa. Egpasubsubaley sikandan ka egbebantey. 17 Te tagse aldew, hen‑em ne Libita ka egbantey diye te gumawan ne dapit te igsile, hep‑at ka diye te gumawan ne dapit te igkahibang ne balabahan, hep‑at ka diye te gumawan ne dapit te igkakawanan ne balabahan, wey tigdaruwa ka diye te tagse baley ne tinesanan. 18 Ne due hen‑em ne migbantey diye te iglineb—hep‑at ka diye te gumawan peendiye te dibabew te timplu, wey daruwa ka diye te lama. 19 Seeye ka himu te me punduk te me talagbantey te gumawan ne me kabuhalan ni Kura wey ni Mirari.

20 Ne ka duma ne Libita ka impiyalan te me baley ne tinesanan te karatuan diye te timplu te Manama wey te me kasangkapan ne inhalad e diye te Manama. 21 Ne ka pangulu si Hihil ne egpuun te me kabuhalan ni Ladan ne kabuhalan ni Girsun. 22 Ne due daruwa ne anak ni Hihil ne me lukes ne si Sitam wey si Huwil ne iyan impiyalan te me tahuanan te karatuan diye te timplu te Magbebaye ne Manama.

23 Seeye ded ne himu ka impeyimu te me kabuhalan ni Amram, ni Isar, ni Hibrun, wey ni Usil.

24 Si Sibuwil ne kabuhalan ni Girsun ne anak ni Muwisis iyan pangulu te impiyalan diye te me baley ne tinesanan te karatuan. 25 Ne ka me karumaan din ne me kabuhalan ni Ilisir iyan si Rihabiyas, si Hisayas, si Huram, si Sikri, wey si Silumit. 26 Ne si Silumit wey ka me karumaan din, iyan impiyalan te me baley ne tinesanan te me kasangkapan ne inhalad diye te Manama—ka me kasangkapan ne inhalad ni Hari Dabid wey te me pangulu te linibu wey ginatus ne me sundalu wey te duma pad ne me upisyal. 27 Inhalad dan man‑e te Manama ka duma ne me kasangkapan ne naahew ran puun te me kuntere dan eyew eggamiten te eg-ayad-ayad te timplu te Magbebaye. 28 Ne ka langun degma ne inhalad diye te Magbebaye ne Manama ni prupita Samwil, ni Saul ne anak ni Kis, ni Abnir ne anak ni Nir, wey ni Huwab ne anak ni Siruya, wey ka duma pad ne me kasangkapan ne nakahalad e, impiyal red man‑e ki Silumit wey te me karumaan din.

29 Puun te me kabuhalan ni Ishar, si Kininiyas wey ka anak din ne me lukes ka impiyalan te katungdanan diye te lihawangan te timplu isip me upisyal wey me talaggukum te intiru ne Israil.

30 Puun te me kabuhalan ni Hibrun, si Hasabiyas wey ka sabeka ne libu wey pitu ne gatus (1,700) ne me karumaan din ne derakel degma se me katuenan, ka impiyalan ne egpangulu te tane ne diye te Weyig ne Hurdan, dapit te iglineb. Sikandan ka eggimu te me himu para te Magbebaye ne Manama wey te Hari. 31 Si Hiriyas ka pangulu te me pamilya ni Hibrun sumale te listaan te me kabuhalan. Su te igkeep‑at ne pulu (40) ne leg‑un te peghari ni Dabid, impasusi rin ka me listaan te me pamilya, wey nanengnengan dan ne duen bes me kabuhalan ni Hibrun diye te Hasir ne sakup te Gilyad, ne derakel degma se me katuenan. 32 Ne due daruwa ne libu wey pitu ne gatus (2,700) ne me karumaan ni Hiriyas ne derakel degma se me katuenan, wey me pangulu te me pamilya. Ne impamehayan sikandan ni Hari Dabid te me katenged te pegpangulu te me kabuhalan ni Rubin, ni Gad, wey te katenge te kabuhalan ni Husi ne iyan ka me kabuhalan ni Manasis eyew iyan eggimu te me himu te pegpamakey te Manama wey te Hari.