1 Ne inlibulung e man‑e ni Dabid ka langun ne mangngateu ne me sundalu te Israil, ne tatelu ne pulu ne libu (30,000) ka kasuluhan. 2  ✡ Iks 25:22.Ne nangendiye sikandan te Baali ne sakup te Huda eyew te peg-angey te Tahuanan te Kasabutan ne ingngaranan te ngaran te Amana ne Maresen ne Magbebaye. Ka Magbebaye ne Manama diye migpinnuu te taliware te daruwa ne kirubin diye te ampew te Tahuanan te Kasabutan. 3  ✡ 1Sam 7:1-2.Indulan dan te iyam ne kerumata ka Tahuanan puun te baley ni Abinadab ne diye te bubungan. Ne iyan mig-uyan te kerumata ne ingganuy te me baka ka me anak ni Abinadab ne ensi Usa wey Ahiyu. 4 Ne si Ahiyu ka miggun‑a te kerumata. 5 Ne miggale-gale diye te tangkaan te Magbebaye ne Manama si Dabid duma te langun ne matig-Israil taman te egkeyimu ran pinaahi te me ulahingen, me lira, me alpa, tambur, me kastanyita, wey me putew ne basalan.

6 Te pegginguma ran diye te inged ne diekanan te trigu ni Nakun, inggen-genan ni Usa ka Tahuanan te Kasabutan tenged su nasaligkat ka me baka. 7 Tenged dutu, nabelu amana ka Magbebaye ne Manama ki Usa, sikan naa ka inggimatayan e sikandin te Manama diye te dangdang te Tahuanan te Kasabutan. 8 Nabelu si Dabid tenged su indusaan te Magbebaye ne Manama si Usa. Sikan naa ka ingngaranan ka seeye ne inged te Piris-Usa* Te Hibruwanen: “Pegdusa ki Usa” ka igpasabut te lalag ne “Piris-Usa”. taman kuntee. 9 Ne naaldek si Dabid te Magbebaye ne Manama te seeye ne aldew wey migkahi, “Egmenuwen ku naan e te eg-uyan ka Tahuanan te Kasabutan te Magbebaye?” 10 Purisu kenad egkeupian si Dabid ne eg-uyan te Tahuanan te Kasabutan te Magbebaye ne Manama diye te siyudad din. Sikan naa ka diye din e seini uyana te baley te sabeka ne matig-Gat ne si Ubid-Idum. 11  ✡ 1Kru 26:4-5.Ne diye nakatetahu te baley ni Ubid-Idum ka Tahuanan te Kasabutan te Magbebaye ne Manama te tatelu ne bulan. Ne impanalanginan te Magbebaye ne Manama si Ubid-Idum wey ka tagse sabeka ne diye te baley rin.

12 Nahuhuran si Hari Dabid te impanalanginan te Magbebaye ne Manama ka tagse sabeka diye te baley ni Ubid-Idum wey ka langun ne kandin tenged te Tahuanan te Kasabutan te Manama. Sikan naa ka in-angey e seeye ni Dabid diye te baley ni Ubid-Idum wey in-uyan din e diye te siyudad din te nahale-gale. 13 Te nakasikal e te hen‑em ne sikal seeye se mig-uyan te Tahuanan te Kasabutan te Magbebaye ne Manama, migpanubad e si Dabid te sabeka ne turu ne baka wey sabeka ne malambeg ne nati ne baka. 14 Ne migsayew si Dabid migpanaman-taman diye te tangkaan te Magbebaye ne Manama. Migsesaya sikandin te hinabel ne egngaranan te ipud. 15 Ne migmanguleyi wey migmarahing te me trumpita si Dabid duma te me Israilita te sasangan dan ka eg-uuyan te Tahuanan te Kasabutan te Magbebaye ne Manama.

16 Te igpaseled e ka Tahuanan te Kasabutan te Magbebaye ne Manama diye te Siyudad ni Dabid, migpantew te bintana ka anak ni Saul ne malitan ne si Mikal. Ne nakita rin si Dabid ne mig-um-umbetut wey migsayew diye te tangkaan te Magbebaye ne Manama. Ne puun dutu, inlemetan din e si Dabid diye te diralem din. 17 Ne impaseled dan e ka Tahuanan te Kasabutan diye te balungbalung ne inggimu ni Dabid para kayi. Ne migpanubad e si Dabid te egtutungen ne igpanubad wey te igpanubad para te keupianan diye te tangkaan te Magbebaye ne Manama. 18 Te nekeimpus e sikandin ka migpanubad, impanalanginan din e ka me etew pinaahi te ngaran te Amana ne Maresen Magbebaye. 19  ✡ 1Kru 16:43.Ne impamehayan din e te paan, te ngalap, wey te egkakeen ne inggimu puun te behas te paras ka langun ne keet-etawan te Israil—me lukes wey me malitan. Ne nataman, nanguli e ka langun ne me etew diye te me ugpaan dan.

20 Te peg-uli ni Dabid eyew te pegpanalangin te pamilya rin, insinug-ung e sikandin ni Mikal ne anak ni Saul te migkahi, “Hari te Israil, amana ka ne mig-ungel-ungel te seini ne aldew! Mekeyilew-hilew ka inggimu nu ne migpalawas diye te tangkaan te me malitan ne suluhuanen te me upisyal nu, iling te etew ne ungel.”

21 Ne migkahi si Dabid, “Inggimu ku seeye diye te tangkaan te Magbebaye ne Manama ne mig-alam keddi labew te amey nu wey te minsan hentew te pamilya rin. In-alam a nikandin ne egmandu te keet-etawan din ne me matig-Israil. Sikan naa ka eggale-gale a diye te tangkaan te Magbebaye ne Manama. 22 Ne eggimu e pad te subla ne mekeyilew-hilew kayi. Mekeyilew-hilew a te pegtengteng nu† Te Hibruwanen: te pegtengteng ku. piru intahud a te seeye se me malitan ne egkahiyen nu.”

23 Ne ware nakaanak si Mikal taman te migpatey sikandin.