1  ✡ 1Kru 22:5.Ne migkahiyan ni Hari Dabid ka langun ne nalibulung ne keet-etawan, “Si Sulumun ne anak ku ne in-alam te Manama, bate pad wey ware pad kalintahaan. Dakel ka himu su kene ne timplu re te etew, ke kene, timplu te Magbebaye ne Manama. 2 Purisu inggimu ku ka langun ne egkeyimu ku te pegpangandam te me kasangkapan ne eggamiten te peggimu te timplu te Manama ku—me bulawan, me pelata, me burunsi, me putew, me kayu, me batu ne egngaranan te uniks, imirald, me batu ne nalein-lein se me batek, wey me mateles amana ne me pahang. 3 Ne tenged te dakel ne geyinawa ku te timplu te Manama, egbehey a te keddi mismu ne bulawan wey pelata para te peggimu kayi, timul seini te langun ne nalimud ku para te matulus ne timplu. 4 Egbehey a te sabeka ne gatus ne libu (100,000) ne kilu ne bulawan ne egpuun te Upir, wey 240,000 ne kilu ne pelata. Eggamiten seini ne igbulit te me alabat te timplu, 5 wey para te langun ne me kasangkapan ne eggimuwen te me trabahanti. Ne kuntee, hentew kaniyu ka egkeupian ne egbehey te Magbebaye ne Manama?”

6 Purisu migdasag ka me pangulu te pamilya, me pangulu te tribu, me kumandir te linibu wey ginatus ne me sundalu, wey ka me upisyal ne impiyalan te me karatuan te Hari. 7 Ne ka imbehey ran para te timplu te Manama, migginguma te 175,000 ne kilu ne bulawan, 350,000 ne kilu ne pelata, 630,000 ne kilu ne burunsi, wey 3,400,000 ne kilu ne putew. 8 Ne migbehey degma seeye se due me mahal ne batu, wey intines seini diye te tinesanan te karatuan te timplu te Magbebaye ne Manama ne impiyal ki Hihil ne kabuhalan ni Girsun. 9 Nahale-gale ka keet-etawan su migbehey ma sikandan te Magbebaye ne Manama ne egpuun te pusung dan. Ne nahale-gale degma si Hari Dabid.

10 Indayan ni Dabid ka Magbebaye ne Manama diye te tangkaan te keet-etawan ne miglibulung. Migkahi sikandin, “He Magbebaye ne Manama, Manama te kabuybuyahan ney ne si Hakub,* Te Hibruwanen: iyan inggamit ka “Israil” ne iyan ikarangeb ne ngaran ni Hakub. egdayanen ka te ware egtamanan. 11  ✡ Mat 6:13.He Magbebaye ne Manama, keykew ka kabantug, ka geem, ka katelesan, ka kapanaluwan, wey ka pegkatalahuren, su keykew ma ka langun ne diye te langit wey kayi te kalibutan. He Magbebaye ne Manama, keykew ka migharian wey labew ka te langun. 12 Migpuun keykew ka karatuan wey ka kabantug, wey sikeykew ka migmandu te minsan nekey. Due te keykew ka geem wey ka karesen, wey egpakabehey ka te kabantug wey keseg te minsan hentew. 13 Ne kuntee, egpasalamat key keykew, he Manama ney, wey egdayanen ney ka mabantug ne ngaran nu.

14 “Piru mania te keilangan ne egkahale key te pegbehey ney keykew te seini ne me dasag, te sikeykew ma ka kamuney kayi, wey iglibed ney re keykew ka tapey e ne keykew. 15 Nakanengneng ka, he Magbebaye ne Manama, ne me mahaliyug key re te seini ne tane iling te me kabuybuyahan ney. Ne ka umul ney, egpekeiling te alung ne mahaan de egkaawe. 16 He Magbebaye ne Manama ney, migpuun keykew seini se masulug ne kasangkapan ne in-andam ney eyew egkahamit te pegpasasindeg te timplu ne para te matulus ne ngaran nu. Keykew seini se langun! 17 He Manama ku, nakanengneng a ne eg-ug-ugsiyen nu ka me pusung ney wey egkahale ka ke egkakita nu ne matareng seini. Sikan naa ka matinumanen wey mabagget-bagget a ne migbehey te seini langun. Ne minsan ka keet-etawan nu degma ne kayi kuntee, nakita ku ne me mabagget-bagget degma sikandan ne migbehey keykew. 18 He Magbebaye ne Manama, ka Manama te kabuybuyahan ney ne si Abraham, si Isaak, wey ni Hakub, himuwa nu ne egkeupian layun ne egtuman keykew ka keet-etawan nu. Ne panulua nu sikandan te eggeyinawa layun keykew. 19 Ne behayi nu degma ka anak ku ne si Sulumun te kabagget te pegtuman te me suhu nu, me paney-paney nu, wey me balaud nu, wey te pegpasasindeg te timplu ne impangandaman ku.”

20 Ne ingkahiyan ni Dabid ka langun ne keet-etawan ne miglibulung diye, “Dayana niyu ka Magbebaye ne Manama niyu.” Purisu indayan dan ka Magbebaye ne Manama, ka Manama te me kabuybuyahan dan. Migpanimbuel wey mig-usengul sikandan diye te tangkaan te Magbebaye ne Manama, wey te Hari.

21 Te seup ne aldew, migpanubad sikandan diye te Magbebaye ne Manama te egtutungen ne igpanubad: sabeka ne libu (1,000) ne turu ne baka, sabeka ne libu (1,000) ne lukesan ne karniru, wey sabeka ne libu (1,000) ne nati te karniru. Mighalad man‑e sikandan te inumen wey duma pad ne susuluhi ne me halad ne para te langun ne matig-Israil. 22 Ne nangekeen sikandan wey nangiinum ne miggale-gale diye te tangkaan te Magbebaye ne Manama. Ne in-ila ran man‑e ne Hari ka anak ni Dabid ne si Sulumun wey in-itisan dan sikandin te lana diye te tangkaan te Magbebaye ne Manama isip Hari. Ne in-itisan dan degma si Saduk isip talagpanubad. 23  ✡ 1Har 2:12.Ne migpinnuu e si Sulumun te trunu te Magbebaye ne Manama isip Hari ne egsubal te amey rin ne si Dabid. Miglampus si Sulumun, wey migtuman kandin ka intiru ne keet-etawan te Israil. 24 Ne ka langun ne pangulu, ka me inila ne me etew, bahani, wey ka me anak ni Dabid, migsaad ne eglapig ki Hari Sulumun. 25 Ne impabantug te Magbebaye ne Manama si Sulumun te intiru ne Israil. Imbehayan din sikandin te kabantug ne labew pad du te an-anayan ne me Hari te Israil.

26 Si Dabid ne anak ni Hisi mighari te intiru ne Israil, 27  ✡ 2Sam 5:4-5; 1Kru 3:4.te hep‑at ne pulu (40) ne leg‑un. Mighari sikandin diye te Hibrun te pitu ne leg‑un, wey tatelu ne pulu wey tatelu (33) diye te Hirusalim. 28 Neuyag sikandin te malayat ne timpu, wey nakaangken te dakel ne karatuan wey kabantug. Ne migpatey sikandin ne buyag e amana wey migsubal kandin mighari si Sulumun ne anak din. 29 Ka guhuren meyitenged te peghari ni Dabid, puun te an-anayan taman te katammanan, nasulat diye te Sulatanan te me Guhuren ni prupita Samwil, ni prupita Natan, wey ni prupita Gad. 30 Nenasulat te sika ne libru ka guhuren meyitenged te peghari ni Dabid, ka kabantug din, wey ka langun-langun ne neyitabu kandin wey te Israil, wey te langun ne migharian ne nakalingut.