1 Ne migkahi si Dabid, “Kayi igpasasindeg ka baley te Magbebaye ne Manama, wey ka altar ne eg-unturan te egtutungen ne igpanubad te me matig-Israil.”

2 Ne migmandu si Dabid ne egpalibulungen ka langun ne lapu ne nangugpe te tane te Israil, wey in-alam din ka duma kandan ne egpasapsapen te me batu eyew eggamiten te pegpasasindeg te timplu te Manama. 3 Ne migbehey degma si Dabid te susuluhi ne putew ne eggimuwen ne lansang wey me bisagra para te me lekeb. Ne migbehey man‑e sikandin te burunsi ne kenad e egkatimbang tenged te kasulug, 4 wey te me terusu ne kenad egkaseel. (Migpanguyan te susuluhi ne kayu ne sidar ka me matig-Sidun wey me matig-Tiru diye ki Dabid.) 5 Ne migkahi si Dabid, “Ka anak ku ne si Sulumun kanakan pad, wey ware pad nabaybayaan. Ne ka timplu ne igpasasindeg para te Magbebaye ne Manama, keilangan ne dakel amana wey egkeyimu ne mabantug te intiru ne kalibutan tenged te kateles. Sikan naa, sikeddiey ka eg-andam para te pegpasasindeg kayi.” Purisu miglilimud e si Dabid te masulug amana ne kasangkapan te ware pad sikandin migpatey.

6 Ne impeumew rin e ka anak din ne si Sulumun, wey impanagtahaan din e ne igpasasindeg ka timplu te Magbebaye ne Manama, ka Manama te Israil. 7  ✡ 2Sam 7:1-16; 1Kru 17:1-14.Ne ingkahiyan ni Dabid si Sulumun, “Anak ku, egkeupian a perem amana ne sikeddi ka egpasasindeg te timplu eyew egkabantug ka Magbebaye ne Manama ku. 8 Piru impanengneng a te Magbebaye ne Manama te migkahi, ‘Nakapatey ka te masulug ne etew te pegpakiggira nu diye te giraanan. Ne tenged te nakita ku ne nakapatey ka te masulug ne etew, kene ne sikeykew ka egpasasindeg te timplu para keddi. 9 Piru egpakaanak ka te lukes ne eghari ne due keupianan. Ne kene ku sikandin igpasamuk te langun ne me kuntere din ne nakalingut kandin. Egngaranan sikandin ki Sulumun* Ka ngaran ne “Sulumun” migpuun te Hibruwanen ne lalag ne “Siyalum” ne iyan igpasabut se “keupianan wey kalinaw.” su egbehayan ku te keupianan wey kalinaw ka Israil te timpu ne sikandin ka eghari. 10 Igpasasindeg din ka timplu eyew egkabantug ka ngaran ku. Egkeyimu sikandin ne anak ku wey egkeyimu a ne amey rin, wey eghari te Israil ka me kabuhalan din te ware egtamanan.’ ”

11 Ne migpabulus si Dabid, “Ne kuntee anak ku, egdumaan ka perem te Magbebaye ne Manama nu, wey eglampus ka perem ka egpasasindeg te timplu sumale te insaad din. 12 Egbehayan ka perem te Magbebaye ne Manama te katagseb wey salabutan eyew te timpu ne egpaharien kad e nikandin te Israil, egkatuman nu ka balaud te Magbebaye ne Manama nu. 13  ✡ Huswi 1:6-9.Eglampus ka ke egtumanen nu eg-ay-ayari ka me balaud wey me suhu ne imbehey te Magbebaye ne Manama ki Muwisis para te Israil. Pakannekal ka wey bagget-bagget ka. Kene ka kaaldek wey ke egkalaggew naa.

14 “Migpakannekal a miglilimud te me kasangkapan para te pegpasasindeg te timplu te Magbebaye ne Manama. Ne nakalimud ad e te 3,500,000 ne kilu ne bulawan, me 34,000,000 ne kilu te pelata, wey me putew wey me burunsi ne kenad e egkatimbang tenged te kasulug. Mig-andam e pad man‑e te me kayu wey me batu. Ne keilangan ne egtimulan nu pad seini. 15 Masulug ka me trabahanti nu: me talagperi te me batu, me talagpeg-untud-untud te me batu, me talagbebaley, wey me mangngateu ne eggimu te me kasangkapan, 16 puun te bulawan, pelata, burunsi, wey putew. Ne kuntee, bunsuri nud e ka himu! Egduma keykew ka Magbebaye ne Manama!”

17 Ne insuhu ni Dabid ka langun ne me pangulu te Israil ne egbulihan ka anak din ne si Sulumun te seini ne himu. 18 Ingkahiyan din sikandan, “Indumaan kew te Magbebaye ne Manama niyu! Imbehayan kew nikandin te kalinaw te nakalingut kaniyu ne me nasud. Imbehey rin e sikandan keddi, wey nasakup e sikandan langun te Magbebaye ne Manama, wey te keet-etawan din. 19 Ne kuntee ibehey niyu te Magbebaye ne Manama ka intiru ne pusung wey gimukud niyu. Ne bunsuri niyud te egpasasindeg ka matulus ne baley te Magbebaye ne Manama, su eyew igpakatahu niyud diye ka Tahuanan te Kasabutan din, wey ka matulus ne kasangkapan din, diye te timplu ne igpasasindeg para egkabantug ka ngaran din.”