1 Ne migpakiglapig si Sulumun te Paraun ne Hari te Ihiptu pinaahi te pegpangasawa rin te anak te Paraun. Ne indume e ni Sulumun ka asawa rin diye te Siyudad ni Dabid taman te neimpusan din e ka palasyu rin, ka timplu te Magbebaye ne Manama, wey ka matikang wey makepal ne alad ne batu ne impalingut te Hirusalim. 2 Te seeye ne timpu, diye pad egmanubad ka me etew te me panubaran diye te me bubungan su ware mem pad iya neyimu ka timplu te Magbebaye. 3 Inggeyinawaan ni Sulumun ka Magbebaye, wey impakita rin ka geyinawa rin pinaahi te pegtuman te me suhu te amey rin ne si Dabid, piru migpanubad degma sikandin te egtutungen ne me mananap diye te me panubaran diye te me bubungan.

4 Sabeka ne aldew, miggendiye si Sulumun diye te Gibyun eyew egpanubad, su diye ma ka amana ne mabantug ne panubaran. Migpanubad sikandin te egtutungen ne sabeka ne libu (1,000) ne mananap. 5 Te seeye ne marusilem, migpakita ka Magbebaye ki Sulumun diye te taheinep din wey migkahi, “Buyu ka ke nekey ka igkeupii nu wey igbehey ku keykew.”

6 Ne migtabak si Sulumun, “Migpakita ka te dakel ne geyinawa nu ne kene egkabalbalawan diye te suluhuanen nu ne si Dabid ne amey ku tenged su matinumanen sikandin keykew, matareng wey mapahetpet ne migpalintutuu keykew. Migpabulus ka migpakita te dakel ne geyinawa nu ne kene egkabalbalawan pinaahi te pegbehey nu kandin te anak ne lukes ne mighari e kuntee subal kandin. 7 Ne kuntee, he Magbebaye ne Manama, inggimu ad e nikeykew ne Hari subal te amey ku minsan bate e pad amana, wey ware pad katuenan ku meyitenged te pegpangulu. 8 Ne seini a kuntee duma te keet-etawan ne in-alam nu. Masulug amana sikandan wey kene egkaseel! 9 Purisu behayi a ubag nikeykew te katuenan ne egkeilanganen ku te pegpangulu kandan, wey panulua a nikeykew ke nekey ka eleg wey seyyup, su hentew e naan de iya ka egmandu te keet-etawan nu ne susuluhi?”

10 Ne nahale ka Magbebaye te imbuyu ni Sulumun, 11 wey ingkahiyan din sikandin, “Puun su iyan nu ma imbuyu ka katuenan eyew eleg ka pegpangulu nu, kene ne sika se malayat ne umul, wey ke karatuan naa, wey ke karereetan naa te me kuntere nu, 12 igbehey ku keykew ka imbuyu nu. Egbehayan ku sikeykew te timul pad ne katagseb wey katuenan ne warad iya minsan hentew ne egpekeiling. 13 Igbehey ku degma keykew ka minsan ware nu buyua. Egkaratu ka wey egtahuren ka te me etew te intiru ne umul nu subla pad du te minsan hentew ne Hari. 14 Emun ke eg-ikul ka keddiey, wey ke egtumanen nu ka me balaud ku wey ka me suhu ku iling te inggimu te amey nu ne si Dabid, egbehayan ku sikeykew te malayat ne umul.”

15 Ne dutu, nekeyimate e si Sulumun wey nakamaan-maan e sikandin ne migpakiglalag ka Manama kandin diye te taheinep din. Ne miggendiyad e sikandin te Hirusalim wey migsasindeg sikandin diye te tangkaan te Tahuanan te Kasabutan te Magbebaye ne Manama. Ne migpanubad sikandin te egtutungen ne me mananap, wey mighalad man‑e sikandin para te keupianan. Pegkapenga dutu, migpasahakeen degma sikandin para te langun ne me upisyal din.

16 Sabeka ne aldew, due daruwa ne malitan ne egpamelegye te me lawa ran ne miggendiye ki Hari Sulumun. 17 Ne migkahi ka sabeka kandan, “Mahal ne Hari, migpalemungey key te seini ne malitan te sabeka ne baley, wey duen iya sikandin te inlesutan a diye te baley. 18 Peglihad te tatelu ne aldew puun te miglesutan a, miglesutan e degma sikandin. Ne sikanami re iya ka daruwa diye te baley. 19 Sabeka ne marusilem, te nanlipereng key e, neutunan din mule ka anak din wey migpatey e. 20 Te liware te marusilem te nakalipereng e pad, mig-enew e mule sikandin wey in-uyan din e ka anak ku diye te hibatanan din, wey impewulid din e keddiey ka anak din ne migpatey e. 21 Te peggimata ku te maselem, mig-enew ad e eyew egpasusu te anak ku, ne mania te migpatey e mule sikandin! Piru te in-ay-ayaran kud pitawa ka bate diye te malayag, namelmelehan kud ne kene bes ne seeye ka anak ku.”

22 Piru migkahi ka igkarangeb ne malitan, “Ubat sika! Anak ku ka manekal pad, wey iyan nu anak ka migpatey e!”

Ne migkahi e man‑e ka an-anayan ne malitan, “Ubat sika! Anak nu ka migpatey e, wey anak ku ka manekal pad!”

Ne migpa-apuley e ka daruwa ne malitan diye te tangkaan te Hari.

23 Nataman, migkahi e ka Hari, “Tagse sabeka kaniyu migkahi ne anak din ka manekal pad ne bate, wey ware sabeka kaniyu ne mig-angken te bate ne migpatey e.” 24 Ne migkahi e man‑e ka Hari, “Uyani a te kampilan.” Ne in-uyanan en iya ka Hari te kampilan 25 wey insuhu din e ka me suluhuanen din, “Sulaya niyu ka manekal pad ne bate wey peg-atula niyu ka daruwa ne malitan!”

26 Ne migkuleyi e ka malehet ne iney te bate su amana rin geyinawei ka anak din, “Mahal ne Hari, kene nu re ubag himatayi ka bate! Ibehey nud iya ka bate kandin!”

Piru migkahi ka sabeka ne malitan, “Sulaya nud iya ka bate eyew ware minsan sabeka kanami ne egpakaangken kandin!”

27 Ne migkahi e ka Hari, “Kene nu himatayi ka bate! Ibehey nu sikandin te an-anayan ne malitan su sikandin ka malehet ne iney.”

28 Te pegkanengnengi te langun ne Israilita meyitenged te peggusey te Hari, nanasnasian pad iya ka pegtahud dan kandin su nakataha sikandan ne ka Manama ka migbehey te katuenan ki Sulumun te pegbehey te eleg ne peggukum.