4
Ka me upisyal ni Sulumun
1 Mighari si Sulumun te intiru ne Israil, 2 wey seini ka labew ne me upisyal din:
Ka Labew ne Talagpanubad: si Asariyas ne anak ni Saduk.
3 Ka me sikritari: si Ilihurip wey si Ahiyas ne me anak ni Sisa.
Ka insalihan te me kasulatan te Hari: si Hihusapat ne anak ni Ahilud.
4 Ka pangulu te me sundalu: si Binayas ne anak ni Huyada.
Ka me talagpanubad: si Saduk wey si Abiyatar.
5 Ka pangulu te me gubirnadur: si Asariyas ne anak ni Natan.
Ka talagtambag te Hari: si Sabud ne talagpanubad ne anak ded man‑e ni Natan.
6 Ka impiyalan te langun ne diye te palasyu: si Ahisar.
Ne ka impiyalan te pehes ne pegtrabahu: si Aduniram ne anak ni Abda.
7 Mig-alam man‑e si Sulumun te sapulu wey daruwa (12) ne me gubirnadur te tagse distritu te intiru ne Israil. Sikandan ka egbehey te pegkeen te Hari, wey te langun ne diye te intiru ne palasyu. Tigsengebulan de ka tagse sabeka kandan ne egbehey te Hari tagse leg‑un. 8 Ne seini ka me ngaran te sapulu wey daruwa (12) ne gubirnadur wey me ngaran te me distritu ran:
Si Bin-Hur ka gubirnadur te me inged ne diye te me bubungan te Ipraim.
9 Si Bin-Dikir ka gubirnadur te siyudad te Makas, Saalbim, Bit-Simis, Ilun, wey Bit-Hanan.
10 Si Bin-Hisid ka gubirnadur te siyudad te Arubut, Suku wey te langun ne sakup te Hipir.
11 Si Bin-Abinadab ka gubirnadur te langun ne inged te Dur. (Asawa sikandin ni Tapat ne sabeka te anak ni Sulumun.)
12 Si Baana ne anak ni Alihud ka gubirnadur te siyudad te Taanak wey Migidu. Sakup din man‑e ka langun ne inged te Bit-San ne marani te lungsud te Saritan, diralem te lungsud te Hisril taman te siyudad te Abil-Mihula, wey siyudad te Hukmi-Am.
13 Si Bin-Gibir ka gubirnadur te siyudad te Ramut ne sakup te Gilyad, wey te me lungsud te Gilyad ne ingkamkamuney te pamilya ni Hair ne kabuhalan ni Manasis. Sakup din man‑e ka inged te Argub diye te Basan, ka hen‑em ne pulu (60) ne derakel ne me lungsud ne impalig‑enan te matikang wey makepal ne alad ne batu, wey impamaggulan te burunsi ka me gumawan.
14 Si Ahinadab ne anak ni Idu ka gubirnadur te inged te Mahanaim.
15 Si Ahimaas ka gubirnadur te inged te Naptali. (Asawa sikandin ni Basimat ne sabeka red degma ne anak ni Sulumun.)
16 Si Baana ne anak ni Husai ka gubirnadur te inged te Asir wey te lungsud te Alut.
17 Si Hihusapat ne anak ni Paruwas ka gubirnadur te inged te Isakar.
18 Si Simii ne anak ni Ila ka gubirnadur te inged te Binhamin.
19 Si Gibir ne anak ni Uri ka gubirnadur te Gilyad ne sakup dengan ni Sihun ne Hari te me Amurihanen wey ni Ug ne Hari te Basan.
Ne gawas te seini se sapulu wey daruwa (12) ne gubirnadur, duen pad man‑e sabeka ne gubirnadur te intiru ne inged ne sakup te Huda.
Ka katubung wey katagseb ni Sulumun
20 Amana ne susuluhi ka me etew te Huda wey Israil. Iling sikandan kasulug te pantad te ilis te dahat. Dakel ka egkakeen dan wey ka egkeinum dan, wey amana sikandan egkengaggale. 21 ✡ Hin 15:18; 2Kru 9:26.Ne mighari si Sulumun te langun ne migharian puun de iya te Weyig ne Iyupratis peendiye te tane te me Pilistihanen, taman man‑e diye te tane te Ihiptu. Ne migbayad sikandan langun te buhis ki Sulumun wey migtuman kandin taman te neuyag pad sikandin.
22 Ne seini ka me keilanganen ni Sulumun wey te langun ne etew rin diye te palasyu tagse aldew: sabeka ne gatus (100) ne saku te amana ne meupiya ne klasi te harina, daruwa ne gatus (200) ne saku te lein ne klasi te harina, 23 sapulu (10) ne impalambeg ne me baka, daruwa ne pulu (20) ne impanlekaan ne me baka, wey sabeka ne gatus (100) ne me karniru wey ke me kambing naa. Ne duen pad man‑e nenakalkalasi ne me usa wey impalambeg ne me manuk.
24 Mighari si Sulumun te langun ne nasud ne dapit te iglineb te Weyig ne Iyupratis, puun te Tipsa peendiye te Gasa, wey meupiya ka peg-al-alukuy rin te langun ne nasud ne nakalingut kandin. 25 Te intiru ne timpu te peghari din, migmalinawen ka Huda wey Israil, puun te lungsud te Dan taman diye te lungsud te Birsiba. Ne ka tagse taltalaanak nenaatul te me parasan wey me igiraan.
26 ✡ 1Har 10:26; 2Kru 1:14; 9:25.Due hep‑at ne libu (4,000) ne kulungan te me kudde ni Sulumun ne talagganuy te me karwahi rin, wey due sapulu wey daruwa ne libu (12,000) ne me kudde din. 27 Ne ka me gubirnadur te tagse distritu ka migbehey ki Hari Sulumun te pegkeen wey te langun ne diye te palasyu rin. Tigsenge-bulan de sikandan ka egbehey te Hari tagse leg‑un. Imbehey ran ka langun ne ingkeilangan din. 28 Migbehey pad man‑e sikandan te me kumpay wey me lahami te sibada para te me kudde ne talagganuy te me karwahi wey te duma pad ne me kudde. Eg-uyanen dan seini diye te intahahe ne egpatahuan kandan.
29 Ne imbehayan te Manama si Sulumun te katagseb, katuenan, wey salabutan ne kene egkeilingan.* kene egkeilingan: iling kasulug te pantad te ilis te dahat. 30 Subla pad ka katagseb din du te katagseb te langun ne etew diye te igsile wey te me matig-Ihiptu. 31 ✡ Psa 89 Uluwan.Ware etew ne egpekeiling te katagseb din. Matagseb pad sikandin ki Itan ne kabuhalan ni Isra, wey ki Hirman, Kalkul, wey ki Dara ne me anak ni Mahul. Nekeempet ka kabantug din diye te nakalingut ne me nasud. 32 ✡ Lal 1:1; 10:1; 25:1; UNS 1:1.Ne migsulat sikandin te tatelu ne libu (3,000) ne me lalahen wey subla te sabeka ne libu (1,000) ne me ulahingen. 33 Nekeila sikandin te langun ne pinamula, ligkat te sidar ne diye te Libanun taman te dereisek ne me hilamunen ne egmanubu diye te me alabat. Nekeila man‑e sikandin te langun ne nakalkalasi ne me mananap ne eggipanew, egdul‑ug, eglayang, wey te me ngalap diye te weyig. 34 Ne ka me Hari te intiru ne kalibutan ne nakarineg meyitenged te katagseb ni Sulumun, migsuhu te me etew ne egpepamminehen kandin.