1 Te igkasapulu wey walu (18) ne leg‑un te peghari ni Hirubuwam ne anak ni Nibat diye te Israil, migbunsud e mighari si Abiyas te Huda. 2 Mighari sikandin te tatelu ne leg‑un diye te Hirusalim. Si Maaka ka iney rin ne anak ni Absalum. 3 Ne in-ilingan din ded ka sale te amey rin, ware din sabekaa ka pusung din diye te Magbebaye ne Manama rin, kene ne iling te inggimu ni Dabid ne apu din. 4  ✡ 1Har 11:36.Piru tenged ki Dabid, imbehayan ded si Abiyas te Magbebaye ne Manama rin te anak ne eghari subal kandin wey eggiresen te Hirusalim. 5  ✡ 2Sam 11:1-27.Su ka inggimu ni Dabid igkeele te Magbebaye ne Manama wey intuman din ka langun ne suhu te Magbebaye ne Manama te intiru ne umul rin, angin e te neyimu rin ki Uriyas ne Hitihanen. 6  ✡ 2Kru 13:3-21.Ne layun de egpahiggireey ensi Rihubuwam wey si Hirubuwam taman te timpu te peghari ni Abiyas. 7 Ne ka duma pad ne neyimu ni Abiyas, nakasulat diye te Sulatanan te me Guhuren te me Hari te Huda. Ne nataman migpahiggireey e degma ensi Abiyas wey Hirubuwam.

8 Migpatey si Abiyas wey nekegdume e sikandin te me kaap-apuan din, wey insabal diye te Siyudad ni Dabid. Ne si Asa ne anak din ka migsubal kandin mighari.

9 Te igkararuwa ne pulu (20) ne leg‑un te peghari ni Hirubuwam diye te Israil, neyimu e ne Hari si Asa diye te Huda. 10 Ne mighari sikandin diye te Hirusalim te hep‑at ne pulu wey sabeka (41) ne leg‑un. Apu sikandin ni Maaka, ka malitan ne anak ni Absalum. 11 Inggimu ni Asa ka igkeele te Magbebaye ne Manama iling te inggimu te apu din ne si Dabid. 12  ✡ 2Kru 15:8-15.Ne impandeldel rin puun te Huda ka langun ne me lukes ne egmamelegye te lawa diye te me panubaran dan, wey impangawe din ka langun ne diyus-diyus ne impangimu te me kaap-apuan din. 13 Ne impaawe din degma ka apu din mismu ne si Maaka te pegkarayna, su migpasasindeg ma sikandin te me sungkaleg te diyus-diyus ne si Asira. Impepameled ni Asa ka me diyus-diyus ne sungkaleg wey impasilaban din e seini diye te napu te Kidrun. 14 Minsan ke ware naamin naawe ka me panubaran diye te me bubungan, insabeka red ni Asa ka pusung din diye te Magbebaye ne Manama rin te intiru ne umul rin. 15 Ne in-uyan din ka matulus ne kasangkapan ne inggimu rin wey te amey rin diye te timplu te Magbebaye ne Manama lagkes ka pelata, bulawan, wey duma pad ne kasangkapan.

16 Ne layun de egpahireey si Asa ne Hari te Huda wey si Baasa ne Hari te Israil taheed te sikandan pad ka me Hari te Huda wey Israil. 17 Sabeka ne timpu, inlusuran ni Baasa ne Hari te Israil ka Huda. In-alad ni Baasa te matikang wey makepal ne batu ka siyudad te Rama eyew ware minsan hentew ne egpakalihawang wey egpakaseled diye te inged ni Asa ne Hari te Huda. 18 Seeye naa ka ingkuwa ni Asa ka langun ne pelata wey bulawan ne nasame diye te timplu te Magbebaye ne Manama wey te palasyu rin. Impeuyan din seini te me suluhuanen din diye ki Bin-Hadad ne Hari te Sirya ne diye mig-ugpe te Damasku, ne anak ni Tabrimun wey apu ni Hisiyun. Impanahaan din si Bin-Hadad te migkahi, 19 “Eggimu ki te kasabutan ne egpalapihey ki, iling te inggimu te me amey ta. Ne kua nu naa ka impeuyan ku keykew ne pelata wey bulawan eyew igdasag ku keykew. Ne tempuha nud naa ka kasabutan nu ki Baasa ne Hari te Israil eyew eg-awe e sikandin te tane ku.”

20 Ne mig-uyun si Bin-Hadad ki Hari Asa, wey migpeuyan sikandin te me pangulu te sundalu rin ne eglusud te me siyudad te Israil, wey naahew ran ka Iyun, ka Dan, ka Abil-Bit-Maaka, wey ka inged ne marani te Lanew te Galiliya, wey ka intiru ne inged ne sakup te Naptali. 21 Te pegkarineg dutu ni Baasa, migsanggel e sikandin ka eg-alad te Rama wey miglibed e sikandin diye te Tirsa.

22 Ne immanduan ni Hari Asa ka langun ne etew te Huda ne egpanguen ka me batu wey me geed ne inggamit ni Baasa diye te Rama. Ne inggamit e degma seeye ni Hari Asa eyew eggimuwen ne matikang, wey makepal ne alad te Giba ne sakup te Binhamin wey Mispa. 23 Ne ka langun ne neyimu ni Asa, ka langun ne kapanaluwan din, ka meupiya ne me himu rin wey ka me lungsud ne impasasindeg din, nasulat langun diye te Sulatanan te me Guhuren te me Hari te Huda. Piru te nabuyag e sikandin, duen e dalu rin diye te paa. 24 Ne migpatey e si Asa wey nekegdume e sikandin te me kaap-apuan din, wey insabal e sikandin diye te Siyudad ni Dabid. Ne si Hihusapat ne anak din ka migsubal kandin mighari.

25 Te igkarangeb e ne leg‑un te peghari ni Asa te Huda, neyimu e ne Hari te Israil ka anak ni Hirubuwam ne si Nadab, wey mighari sikandin te daruwa ne leg‑un. 26 Mareet naan de iya ka inggimu ni Nadab diye te Magbebaye ne Manama—mig-ikul red sikandin te mareet ne hinimuwan te amey rin ne iyan egpuunan ne nakasale ka langun ne Israilita.

27 Ne si Baasa ne anak ni Ahiyas ne puun te kabuhalan ni Isakar, migplanu mule te mareet ki Nadab. Ne taheed te inlingutan enni Nadab duma te me sundalu rin ka siyudad te Gibitun ne sakup te me Pilistihanen, inggimatayan e sikandin ni Baasa. 28 Neyitabu seini te igkatelu ne leg‑un te peghari ni Asa diye te Huda. Sikan naa ka mighari e si Baasa diye te Israil subal ki Nadab. 29  ✡ 1Har 14:10.Te mighari e si Baasa, impangimatayan din e ka langun ne sakup te kabuhalan ni Hirubuwam. Nahule iya sikandan langun iling te impahuhud te Magbebaye ne Manama ki prupita Ahiyas ne matig-Silu. 30 Neyitabu seini su impasagkilan ma ni Hirubuwam ka Magbebaye ne Manama te Israil tenged te me sale ne inggimu rin ne iyan egpuunan ne nakasale ka me Israilita.

31 Ne ka duma pad ne neyimu ni Nadab, nakasulat diye te Sulatanan te me Guhuren te me Hari te Israil. 32 Ne layun de egpahiggireey ensi Asa ne Hari te Huda, wey si Baasa ne Hari te Israil taheed te sikandan pad ka mighari.

33 Te igkatelu e ne leg‑un te peghari ni Asa te Huda, migbunsud e mighari si Baasa ne anak ni Ahiyas te intiru ne Israil. Mighari sikandin te Tirsa te daruwa ne pulu wey hep‑at (24) ne leg‑un. 34 Ne mareet naan de iya ka inggimu rin diye te Magbebaye ne Manama, mig-ikul red sikandin te mareet ne hinimuwan ni Hirubuwam, wey sikandin ded man‑e ka egpuunan ne nakasale ka me Israilita.