1 Ne impanengneng te Magbebaye ne Manama si prupita Hihu ne anak ni Hanani ne eglalahan si Baasa te egkahi, 2 “Ware karuan nu dengan iling te basak piru in-alam ku wey inggimu ku sikeykew ne pangulu te keet-etawan ku ne me Israilita. Ne kuntee, in-iling kad te mareet ne hinimuwan ni Hirubuwam wey in-alak nud e te sale nu ka keet-etawan ku. Sikan naa ka impeyibelu a nikeykew. 3 Purisu, egdereetan kud e sikeykew wey ka me kabuhalan nu, iling te inggimu ku te me kabuhalan ni Hirubuwam ne anak ni Nibat. 4 Ne egpangeenen te me asu ka me sakup te kabuhalan nu ne egpamatey diye te siyudad, wey egpangeenen te me manuk-manuk ka egpamatey diye te unayan.”

5 Ne ka duma pad ne neyimu ni Baasa te peghari din, ka langun ne kapanaluwan din, nakasulat diye te Sulatanan te me Guhuren te me Hari te Israil. 6 Nataman, migpatey e si Baasa wey nekegdume e sikandin te me kaap-apuan din wey insabal diye te Tirsa. Ne si Ila ne anak din ka migsubal kandin mighari.

7 Ne duen pad man‑e impanengneng te Magbebaye ne Manama ki Hihu ne prupita meyitenged ki Baasa, wey te me kabuhalan din, tenged te me mareet naan de iya ne inggimu rin diye te Magbebaye ne Manama. Nalangetan pad man‑e sikandin ki Baasa su mig-iling sikandin te mareet ne hinimuwan ni Hirubuwam wey impangimatayan din pad man‑e ka langun ne kabuhalan ni Hirubuwam.

8 Te igkararuwa ne pulu wey hen‑em (26) ne leg‑un te peghari ni Asa diye te Huda, neyimu e ne Hari si Ila diye te Israil. Diye sikandin mig-ugpe te Tirsa, wey mighari sikandin te daruwa ne leg‑un. 9 Piru si Simri ne sabeka te me kumandir din ne impiyalan te baad te me karwahi rin, migplanu mule te mareet kandin. Sabeka ne aldew, newubug-hubug si Ila diye te baley ni Arsa diye te Tirsa. Si Arsa ka insalihan din te palasyu rin. 10 Ne migseled e mule si Simri diye te baley wey inggimatayan din e si Ila, wey sikandin e ka migsubal mighari. Neyitabu seini te igkararuwa ne pulu wey pitu (27) ne leg‑un te peghari ni Asa diye te Huda.

11 Te migbunsud e sikandin mighari, impangimatayan din e ka langun ne kabuhalan ni Baasa. Impangimatayan din degma ka langun ne me karumaan din ne lukes ne egpakasuli kandin wey ka me alukuy rin. 12 Ne sumale te impahuhud te Magbebaye ne Manama ki prupita Hihu diye ki Baasa, impangimatayan en iya ni Simri ka langun ne kabuhalan ni Baasa. 13 Neyitabu seini tenged te me sale ni Baasa wey te anak din ne si Ila, ne iyan egpuunan ne nakasale degma ka Israil. Impeyibelu dan ka Magbebaye ne Manama te Israil tenged te me diyus-diyus dan. 14 Ne ka duma pad ne neyimu ni Ila, nakasulat diye te Sulatanan te me Guhuren te me Hari te Israil.

15 Te igkararuwa ne pulu wey pitu (27) ne leg‑un te peghari ni Asa diye te Huda, mighari e si Simri te Israil. Mig-ugpe sikandin diye te Tirsa, piru pitu re sikandin ne aldew ka mighari. Su te seeye ne timpu, inlingutan e te me sundalu te Israil ka siyudad te Gibitun ne nasakup te me Pilistihanen. 16 Te nanengnengan e te me sundalu te Israil ne planu bes ni Simri ka peggimatey te Hari, inggimu ran e ne Hari te Israil si Umri ne pangulu te me sundalu te seeye ne aldew diye te kampu. 17 Nataman, mig-awe e si Umri diye te Gibitun wey migtakereg e sikandin duma te me sundalu rin ka eglingut te Tirsa. 18 Te nakita ni Simri ne naahew e ka siyudad, miggendiyad e sikandin te taliware te palasyu, wey insilaban din e ka palasyu su mig-ehet-ehet e sikandin. 19 Neyitabu seini tenged te me sale ne inggimu rin. Mareet naan de iya ka inggimu rin diye te Magbebaye ne Manama, wey in-ikul rin ka hinimuwan ni Hirubuwam ne iyan egpuunan ne nakasale ka langun ne Israilita. 20 Ne ka duma pad ne neyimu ni Simri, lagkes ka mareet ne planu ne inggimu rin, nakasulat diye te Sulatanan te me Guhuren te me Hari te Israil.

21 Te seeye ne timpu, nabaad te daruwa ka me etew te Israil: ka sabeka ne baad egkeupian ne si Tibni ne anak ni Ginat ka egkeyimu ne Hari, wey ka sabeka ne baad uyun ki Umri. 22 Piru natalu iya te me etew ne mig-uyun ki Umri ka me etew ne mig-uyun ki Tibni—napatey si Tibni wey iyan neyimu ne Hari si Umri. 23 Te igkatatelu ne pulu wey sabeka (31) ne leg‑un te peghari ni Asa te Huda, neyimu e ne Hari si Umri te Israil, wey mighari sikandin te sapulu wey daruwa (12) ne leg‑un. Mighari sikandin diye te Tirsa te hen‑em ne leg‑un. 24 Nataman, imbeli rin e ka bubungan te Samarya diye ki Simir te hen‑em ne pulu wey walu (68) ne kilu ne pelata. Ne miggimu e sikandin te siyudad diye ne in-alad te matikang wey makepal ne batu, wey ingaranan din te Samarya, puun te ngaran ni Simir, ka imbeliyan din te bubungan.

25 Ne mareet naan de iya ka inggimu ni Umri diye te Magbebaye ne Manama—kene iya egkeilingan ka mareet ne neyimu rin te nenekewun‑a kandin mighari. 26 In-ilingan din ded ka mareet ne me hinimuwan ni Hirubuwam ne iyan egpuunan ne nakasale ka me Israilita. Impasagkilan din ded iya ka Magbebaye ne Manama ne egkalangetan te me diyus-diyus dan. 27 Ne ka duma pad ne neyimu ni Umri, wey langun ne kapanaluwan din, nakasulat diye te Sulatanan te me Guhuren te me Hari te Israil. 28 Nataman, migpatey e si Umri wey nekegdume e sikandin te me kaap-apuan din wey insabal diye te Samarya. Ne si Ahab ne anak din ka migsubal kandin mighari.

29 Te igkatatelu wey walu (38) ne leg‑un te peghari ni Asa diye te Huda, migbunsud e mighari si Ahab ne anak ni Umri diye te Israil, wey mighari sikandin diye te Samarya te daruwa ne pulu wey daruwa (22) ne leg‑un. 30 Ne mareet ka inggimu ni Ahab diye te Magbebaye ne Manama du te nenekewun‑a kandin mighari. 31 Warad iya sikandin migduwa-ruwa ka mig-iling ki Hirubuwam ne amana ne makasesale: in-asawa rin pad man‑e si Hisibil, ka anak ni Hari Itbaal ne Hari te Sidunihanen, wey migpamakey, wey migsimba ki Baal. 32 Ne migpeyimu sikandin te timplu wey panubaran para ki Baal diye te Samarya. 33 Migpasasindeg man‑e sikandin te sungkaleg te diyus-diyus ne si Asira. Subla pad ka neyimu ni Ahab ne nakapeyibelu te Magbebaye ne Manama te Israil du te langun ne nekewun‑a kandin mighari te Israil. 34  ✡ Huswi 6:26.Te timpu te peghari ni Ahab te Israil, due degma etew ne matig-Bitil ne egngaranan ki Hil ne migpasasindeg te inged te Hiriku. Te neimpusan din e ka pabunsuran te Hiriku, migpatey e ka panganey ne anak din ne si Abiham. Te impasasindeg din e ka me gumawan, migpatey e degma ka igkalitan ne anak din ne si Sigub. Neyitabu seini se langun su seini iya ka impalalag te Magbebaye ne Manama ki Huswi ne anak ni Nun.