1 Te igkatatelu e ne leg‑un te gulabung, impanengneng te Magbebaye ne Manama si Ilyas, “Hipanew ka, wey pakita ka ki Hari Ahab su egpeuranen kud e.” 2 Ne miggendiyad en iya si Ilyas ki Ahab.

Te seeye ne timpu, mangune-kune e ka bitil diye te Samarya, 3 sikan naa ka impeumew ni Ahab si Ubadiyas, ka impiyalan din te palasyu. Amana ne matinumanen si Ubadiyas te Magbebaye ne Manama. 4 Te ware pad migpangimatey si Hisibil ne asawa ni Ahab te me prupita te Magbebaye ne Manama, indume e ni Ubadiyas ka sabeka ne gatus (100) ne me prupita, wey inggeles din e sikandan diye te daruwa ne sulung, tiglalimma ne pulu (50) te tagse sulung, wey imbehayan din sikandan te egkakeen wey weyig. 5 Ne ingkahiyan ni Ahab si Ubadiyas, “Eggipanew ki wey egpitawen ta ka langun ne sebseb wey me napu te inged ta, kema ke egpakakita ki te me hilamunen eyew kene ded egpatey te gutas ka me kudde wey ka me mula,* Sabeka seini ne ayam ne anak te lukes ne asnu wey beyan ne kudde. wey kema ke kenad ne keilangan ne egpangimatayan ka me mananap.” 6 Sikan naa ka migpasabutey e sikandan ke hendei sikandan egbaye ka egpamitew. Nataman migpasuwayey e sikandan—mig-ikul si Ahab te sabeka ne dalan ka misabsabeka, wey mig-ikul degma si Ubadiyas te lein ne dalan ka migpasabsabeka.

7 Te diyad e si Ubadiyas te dalan, nasinug-ung din e si Ilyas. Nekeila sikandin ki Ilyas, wey mig-usengul sikandin diye te tangkaan ni Iliyas wey migkahi, “Sikeykew iya seini, Ahalen Ilyas?”

8 Ne migtabak si Ilyas, “Uya, sikeddiey iya. Hendiye ka te ahalen nu wey lalahi nu sikandin te nakalibed ad e.”

9 Ne migtabak si Ubadiyas, “Ahalen, nekey‑a ka neyimu ku ne sale te igbehey ad e nikeykew ki Ahab, eyew eggimatayan ad nikandin? 10 Eglalahan ku sikeykew te malehet diye te tangkaan te manekal ne Magbebaye ne Manama nu, ne ware inged wey migharian ne ware pabayei te ahalen ku te etew rin eyew egpamitew keykew. Ne emun ke egkahi ka me pangulu te inged ne ware ka diye te inged dan, egpasaaren sikandan ni Ahab ne kene ka iya nikandin egkakita diye. 11 Ne kuntee, egsuhuen a nikeykew ne egkahiyan ka ahalen ku te kayi kad e? 12 Ne etuwey iyug-iyug ku re ne eg-uyanen kad te Panisingan te Magbebaye ne Manama diye te inged ne ware ku nataheyi, wey kene kad egkiteen ni Ahab te egkapangguhuran kud sikandin, eggimatayan a iya nikandin. Nakanengneng ka ne amana a ne matinumanen ne egpamakey te Magbebaye puun te bate e pad. 13 Ware ke bes nakanengneng te inggimu ku te sabeka ne gatus (100) ne prupita te Magbebaye ne Manama, te egpangimatayan e perem sikandan ni Hisibil? Inggeles ku sikandan te daruwa ne sulung—tiglalimma ne pulu (50) ka tagse sulung wey impakeen ku sikandan. 14 Ne mania te egsuhuen ad e nikeykew eyew eglalahan ka ahalen ku te kayi kad e? Eggimatayan a iya nikandin!”

15 Ne migtabak si Ilyas, “Igpahunlibet ku te manekal wey Amana ne Maresen ne Magbebaye ne Manama ne impamakey ku, ne egpakita a iya kandin kuntee.”

16 Ne miggendiyad en iya si Ubadiyas ki Hari Ahab wey ingkahiyan din e te due si Ilyas. Ne miglihawang e si Ahab eyew egsinug-ung ki Ilyas. 17 Te nakite e ni Ahab si Ilyas, migbalbalukan e sikandin, “Sikeykew iya seini ka talagsamuk te Israil?”

18 Ne migtabak si Ilyas, “Kene ne sikeddiey ka talagsamuk te Israil, ke kene sikeykew wey ka me kabuhalan te amey nu. Ware niyu tumana ka me suhu te Magbebaye ne Manama, su migpamakey kew te me larawan te diyus-diyus ne si Baal. 19 Ne kuntee, ipalibulung nu ka langun ne Israilita diye te Bubungan te Karmil, wey dumaa nu ka hep‑at ne gatus wey lalimma ne pulu (450) ne me prupita ni Baal, wey ka hep‑at ne gatus (400) ne me prupita te diyus-diyus ne si Asira ne imbulihan ni Rayna Hisibil.”

20 Ne impeumew en iya ni Ahab ka langun ne Israilita wey inlibulung din e ka me prupita diye te Bubungan te Karmil. 21 Ne migparani si Ilyas te langun ne etew wey migkahi, “Ken‑u kew pad egpakasuman-suman te kene egkaayun ne egdaruween ka suman-suman ta? Ke iyan iya Manama ka Magbebaye ne Manama, simbaa niyu sikandin. Piru ke si Baal ka Manama, simbaa niyu sikandin!” Piru warad iya migmanlelalag ka me etew. 22 Ne migkahi si Ilyas kandan, “Sikeddiey re iya, sikeddiey naan de iya ka nasame ne prupita te Magbebaye ne Manama, piru hep‑at ne gatus wey lalimma ne pulu (450) ka me prupita ni Baal. 23 Uyani key nikaniyu te daruwa ne turu ne baka, wey paalama niyu ka me prupita ni Baal te sabeka eyew igpanubad dan. Egpanggupalen dan seini wey ig-ampew te me kayu diye te altar dan. Piru kene dan seini egtemehan. Ne iling ded degma ka eggimuwen ku te sabeka ne turu. 24 Eg-ampu ka me prupita ni Baal te diyus-diyus dan, wey eg-ampu a degma te Magbebaye ne Manama. Ka egtabak ne egpeuyan te hapuy, sikandin iya ka malehet ne Manama.”

Ne migmanguleyi e ka me etew ne mig-uyun.

25 Ne ingkahiyan ni Ilyas ka me prupita ni Baal, “Puun su masulug niyu ma, hun‑a kew e alam te sabeka ne turu wey andama niyud e seini. Ampu kew te diyus-diyus niyu, piru kene niyu temehi ka me kayu.”

26 Ne mig-alam en iya sikandan te sabeka ne turu ne imbehey kandan. In-andam dan seini wey mig-ampu e sikandan ki Baal puun te maselem taman te meudtu ka migkahi, “He Baal, tabaka key ubag nikeykew!” Egmanesayew sikandan ka egmanlingut-lingut te altar ne inggimu ran, piru warad iya migtabak kandan.

27 Te meudtu e, migbunsud e si Ilyas ka egdali-di kandan ne migkahi, “Tamtamani niyu pa te eg-ampu! Manama buwa ma iya si Baal, kema ke duen de insuman-suman din, wey kema ke mig-indes pad sikandin, wey kema ke migleug-leug pad sikandin wey ke nakalipereng naa, wey keilangan ne egpukawen niyu!” 28 Ne migtamtamanan pad iya te me prupita ka peg-ampu dan, wey impamalian dan ka me lawa ran te me ilab wey me gepes sumale te tuluuwen dan taman te egmanihis e ka langesa. 29 Ne taman te maapun e seini ne migpabulus-bulus de due sikandan ka egpangumew te manama ran, taman te timpu e te pegpanubad te egkasagkup. Piru warad iya narineg dan ne laheng ne migtabak kandan.

30 Nataman, ingkahiyan e ni Ilyas ka me etew, “Parani kew keddi.” Ne migparani en iya ka me etew kandin, wey in-ay-ayaran din e ka nahuhus ne altar te Magbebaye ne Manama. 31  ✡ Hin 32:28; 35:10.Migkuwa si Ilyas te sapulu wey daruwa (12) ne batu, sumale te kasulug te me kabuhalan ne egpuun te me anak ni Hakub, ka etew ne impanengneng te Magbebaye ne Manama ne egngaranan te Israil. 32 Ne inggimu rin e ne altar ka me batu para te Magbebaye ne Manama, wey inlingutan din seini te egkanal te eleg ne egkatahuan te hep‑at ne gelun ne weyig. 33 Ne impanguntud din e ka me kayu diye te altar, impanggupal din ka turu wey impangampew rin e te me kayu. Ne ingkahiyan din e ka me etew, “Hipenua niyu te weyig ka hep‑at ne banga wey itisi niyu ka igpanubad wey ka me kayu.” Ne in-itisan dan en iya. 34 Ne migkahi e man‑e si Ilyas, “Abayi niyu pa itisi.” Ne in-itisan dan en iya man‑e. Ne migkahi pad iya man‑e sikandin, “Abayi niyu pa man‑e itisi.” Ne in-itisan dan en iya man‑e. 35 Ne napenu e ka kanal wey migpanulayas e ka weyig ne nakalingut te altar.

36 Te timpu e te pegpanubad te egkasagkup, migparani e si Ilyas te altar wey mig-ampu e sikandin ne migkahi, “He Magbebaye ne Manama, ka Manama ni Abraham, ni Isaak, wey ni Hakub, pamaleheti nu kuntee ne sikeykew ka Manama te Israil, ne sikeddi ka suluhuanen nu, wey inggimu ku ka langun puun su insuhu a nikeykew. 37 Tabaka a ubag nikeykew Magbebaye ne Manama, eyew egpakanengneng seini se me etew ne sikeykew iya ka Magbebaye ne Manama, wey egpaliberen nud sikandan diye te keykew.”

38 Ne sahuhune ne migpeuyan ka Magbebaye ne Manama te hapuy, wey natutung e ka impanubad, ka me kayu, ka me batu, wey ka me abu, wey apil pad iya nammara ka kanal. 39 Te nakita seini te me etew, miglangkeb e sikandan ka migmanguleyi te migkahi, “Ka Magbebaye ne Manama, iyan iya Manama! Sikandin de iya ka Manama!”

40 Ne insuhu e sikandan ni Ilyas te migkahi, “Pandakepa niyu ka me prupita ni Baal! Kene niyu tuhuti ne due egpakapallahuy kandan minsan sabeka!” Ne impandakep en iya te me etew ka langun ne prupita, wey in-uyan e sikandan ni Ilyas diye te beuhan te Kisun, wey impangimatayan din e sikandan diye.

41 Ne ingkahiyan e ni Ilyas si Hari Ahab, “Takereg kad e, keen ka wey inum ka su egkarineg kud ka lehes te makeseg ne uran.” 42  ✡ San 5:18.Te miggendiyad en iya si Ahab eyew egkeen, migtakereg e si Ilyas diye te puntul te Bubungan te Karmil. Ne diye, migpanimbuel e sikandin ka mig-usengul te me buel din. 43 Ne migkahiyan din ka suluhuanen din, “Takereg ke pa ubag wey pantew ka diye te dahat.”

Ne migtakereg en iya ka suluhuanen din. Ne miglibed e sikandin wey migkahi, “Ware ma nakita ku diye te dahat.” Ne kapapitu sikandin palibera ni Ilyas eyew egpantew diye te dahat. 44 Te igkapitu rin e te eglibed ingkahiyan din si Ilyas, “Nakakita a te gapun ne miglepew diye te ampew te dahat ne iling de iya karakel te belad te etew.”

Ne insuhu e ni Ilyas ka suluhuanen din, “Hendiye ka ki Hari Ahab wey peuntura nud e sikandin te karwahi rin. Peulia nud sikandin te kene pad egkasapenan te uran.”

45 Te nalingen-ngen de iya, kenad egkakita ka langit te makepal ne kibel. Ne migpangalamag e, wey miglugsu e ka dakel ne uran. Ne mig-untud e si Ahab te karwahi rin ka eglibed diye te Hisril. 46 Ne imbehayan si Ilyas te Magbebaye ne Manama te geem—inlunsen din ka hinabel rin taman te liwaraan wey intetabed din, wey migpallahuy e sikandin. Ne nekewun‑a pad sikandin te karwahi ni Ahab ka migpallahuy peendiye te gumawan te Hisril.