1  ✡ Hin 28:11-17.Ne migkahiyan te Manama si Hakub, “Halin ka kuntee diye te Bitil. Diya a nikeykew himuwi te altar, su sikeddi ka Manama ne migpakita keykew te pegpallahuy nu ki Isaw ne kakey nu.”

2 Sikan naa ka migkahiyan ni Hakub ka pamilya rin wey ka langun ne duma rin, “Awaa niyu ka me diyus-diyus ne egsimbeen niyu. Linisi niyu ka pegkeetew niyu wey saluub kew te meupiya ne manggad. 3 Eggalin ki diye te Bitil. Diya a eggimu te altar te Manama ne migpangabang keddiey te neyirapan a wey migduma keddiey minsan hendei a migbaye.” 4 Sikan naa ka impamehey ran e ki Hakub ka langun ne diyus-diyus dan wey me eritis dan, wey inlebeng e seeye ni Hakub diye te lenged te lebut te kayu ne uk ne diye te marani te Sikim.

5 Te peggipanew ran, ware ded sikandan lupuha te me etew ne mig-ugpe te me siyudad te seeye ne inged, su impeyinalatan te Manama ka mahinged. 6 Nataman, nekeume e ensi Hakub diye te Lus (wey ke Bitil) diye te inged te Kanaan. 7 Diye miggimu sikandin te altar ne eg-unturan te egtutungen. Migngaranan din te Il-Bitil ka inged, su diye migpakita ka Manama kandin te migpallahuyan din ka kakey rin. 8 Te seeye ne timpu, migpatey e ka buyag ne talagtanggu ki Ribika ne si Dibura. Ne diye sikandin ilebeng lenged te lebut te kayu ne matulus ne diye te diralem te Bitil. Purisu, ingngaranan te Alun-bakut* Te Hibruwanen: “kayu ne miglungkuan” ka kaluwasan te lalag ne “Alun-bakut.” ka seeye ne kayu.

9 Te pegginguma ni Hakub diye te Bitil puun te Padan-aram, migpakite e man‑e ka Manama kandin wey impanalanginan sikandin. 10  ✡ Hin 32:28.Migkahiyan sikandin te Manama, “Kenad ne si Hakub ka ngaran nu kuntee, su Israil e.” Sikan naa ka migngaranan e sikandin ki Israil. 11  ✡ Hin 17:4-8.Ne migkahiyan man‑e sikandin te Manama, “Sikeddi ka Manama ne Amana ne Maresen. Kabuhal ka wey egmannenasud ka me kabuhalan nu, wey due me kabuhalan nu ne egkeyimu ne me Hari. 12 Igbehey ku keykew wey peendiye te me kabuhalan nu ka tane ne imbehey ku ki Abraham wey ki Isaak dengan.” 13 Sikan de iya ne mig-awe e ka Manama. 14  ✡ Hin 28:18-19.Ne migpes-ek si Hakub te batu ne eglimlimuan diye te inged ne inlalahan sikandin te Manama. Imbusbusan din seeye te binu wey in-itisan din man‑e te lana te ulibu, palinneu ne imbehey rin seeye te Manama. 15 Migngaranan ni Hakub te Bitil† Te Hibruwanen: “baley te Manama” ka kaluwasan te lalag ne “Bitil.” ka seeye ne inged su diye sikandin lalahi te Manama.

16 Nataman, mig-awe e sikandan diye te Bitil. Te mariyu pad sikandan te inged ne Iprata, migbaletikan e si Rakil wey miglehenan sikandin. 17 Te nabaybayaran e amana sikandin ka egkasakitan, migkahi ka mangnguyamu, “Kene ka kalaggew su lukes ded man‑e ka anak nu.” 18 Piru hapit e egkapatey si Rakil. Te egkabigtawan e sikandin, migngaranan din ki Bin-uni ka bate, piru Binhamin ka ingngaran te amey te bate.

19 Nakatapil iya si Rakil wey diye de sikandin ilebeng te dalan ne iggendiye te inged te Iprata (wey ke Bitlihim). 20 Ne impes-ekan ni Hakub ka lebeng ni Rakil te batu ne talektek, ne diye ded kuntee. 21 Migpabulus pad si Hakub ka miggipanew wey migtagtaheed pad mig-ugpe diye te limang te titikangi ne baley ne diye te Idir.

22  ✡ Hin 49:4.Te diye pad mig-ugpe si Hakub te seeye ne inged, nakalibug si Rubin ki Bilha, ka duwey te amey rin ne uripen. Nataman, nakanengneng e si Hakub.

Sapulu wey daruwa (12) ka anak ni Hakub ne lukes. 23 Seini ka me lukes ne anak dan ki Liya—si Rubin (ka panganey ne anak ni Hakub), si Simyun, si Libi, si Huda, si Isakar, wey si Sabulun. 24 Seini man‑e ka me lukes ne anak dan ki Rakil—si Husi wey si Binhamin. 25 Seini man‑e ka me lukes ne anak dan ki Bilha, ka uripen ni Rakil—si Dan wey si Naptali. 26 Seini man‑e ka me lukes ne anak dan ki Silpa, ka uripen ni Liya—si Gad wey si Asir. Sikandan ka me anak ni Hakub ne lukes ne miglesut diye te Padan-aram.

27  ✡ Hin 13:18.Te seeye ne timpu, nekeuli e si Hakub diye te amey rin ne si Isaak diye te Mamri, ne marani te Kiryat-Arba ne egngaranan ded degma te Hibrun. Ka seini ne inged mig-ugpaan dengan enni Abraham wey ni Isaak. 28 Te miggingume e te 180 ka idad ni Isaak, 29 migpatey e sikandin ne nabuyag e amana, wey diyad degma ka gimukud din te me apu din ne migpatey e. Ne insabal sikandin te me anak din ne ensi Isaw wey si Hakub.