1 Te egkabuyag e si Samwil, inggimu rin e ne me pangulu te intiru ne Israil ka daruwa ne anak din ne me lukes. 2 Si Huwil ka ngaran te kakey wey si Abiya ka ngaran te hari. Sikandan ka me pangulu te Birsiba. 3 Piru ware sikandan mig-ikul te batasan te amey ran, ke kene, nasi sikandan migsuwey tenged te seleppi. Migdawat sikandan te seleppi ne bayad te pegsupak te eleg ne peggukum.

4 Sikan naa, miglibulung ka langun ne igdatu te Israil wey nangendiye ki Samwil diye te Rama. 5  ✡ Diy 17:14.Ne ingkahiyan dan sikandin, “Buyag kad e wey ware mig-ikul te batasan nu ka me anak nu. Purisu alam ka te Hari ne egmandu kanami iling te duma ne me nasud.” 6 Ne miglungku si Samwil te pegkahi ran, “Behayi key te Hari eyew egmandu kanami.” Sikan naa ka mig-ampu sikandin te Magbebaye ne Manama. 7 Ne ingkahiyan sikandin te Magbebaye, “Tumana nu ka langun ne egbuyuen te keet-etawan keykew su kene ma ne sikeykew ka insamsamilian dan, ke kene, sikeddi ka insamsamilian dan isip Hari dan. 8 Egsamsamilian ka degma nikandan iling te pegsamsamili dan dengan keddi. In-engkeran a nikandan wey migsimba te me diyus-diyus bunsud pad te pegluwas ku kandan diye te Ihiptu taman kuntee. 9 Sikan naa, tumana nu ka inhangyu dan keykew piru panpanayi nu sikandan te mapahetpet wey pangguhuri nu te batasanen te Hari ne egmandu kandan.”

10 Sikan naa, impanugtul e ni Samwil ka langun ne inlalag te Magbebaye diye te me etew ne migbuyu kandin te Hari. 11 Ingkahiyan din sikandan, “Seini ka batasan te Hari ne egmandu kaniyu: egkuen din ka me anak niyu ne me lukes wey eggimuwen din sikandan ne me sundalu. Ne ka duma, eggimuwen din ne talag-uyan te me karwahi wey me talagpangudde, wey igpewun‑a rin ka duma te me karwahi rin. 12 Ne eg-alam sikandin te egpangulu te libu-libu ne sundalu wey te tiglalimma ne pulu (50) ne sundalu. Egdaru ka duma wey eggaani diye te kamet din, wey ka duma pad kandan eggimu te panganiban te pegpakiggira wey himan te me karwahi rin. 13 Egkuen din ka anak niyu ne me malitan eyew eggimuwen ne talaggimu te peemut, talagsusuba, wey talaggimu te paan. 14 Egkuen din ka subla ne meupiya ne me kamet niyu, me parasan, wey me ulibuwan niyu. Ne igbehey rin seini te me suluhuanen din. 15 Egkuen din pad iya man‑e ka igkasapulu ne baad te trigu wey te behas te paras niyu wey igbehey rin seini te me upisyal rin wey te me suluhuanen din. 16 Egkuen din ka suluhuanen niyu ne me lukes wey me malitan wey ka amana ne meupiya ne me baka niyu, wey me asnu eyew eggamiten din para te himu rin mismu. 17 Egkuen din ka igkasapulu te me ayam niyu wey eg-uripenen kew e nikandin. 18 Te sika ne timpu, egpandalawit kew tenged te pegbayad-bayad te Hari ne in-alam niyu piru kene kew egpamminehen te Magbebaye.”

19 Piru ware migpammineg ki Samwil ka keet-etawan wey migkahi sikandan, “Kene! Egkeupian key te Hari ne egmandu kanami, 20 su eyew egpekeiling key e te langun ne nasud ne due Hari ne egmandu wey egpangulu kanami te pegpakiggira.” 21 Te pegkarineg ni Samwil te langun ne inlalag te keet-etawan, inlalag din e degma seini diye te Magbebaye. 22 Ne ingkahiyan si Samwil te Magbebaye, “Tumana nu ka igkeupii ran wey behayi nu sikandan te Hari.” Ne ingkahiyan e ni Samwil ka me matig-Israil, “Uya, eg-uyun a. Panguli kew e diye te tagse siyudad niyu.”