1  ✡ 2Sam 6:2-4; 1Kru 13:5-7.Sikan naa ka in-angey e te me matig-Kiryat-Hiyarim ka Tahuanan te Kasabutan te Magbebaye ne Manama wey in-uyan dan e seini diye te baley ni Abinadab ne diye te bubungan. Ne in-alam dan ka anak ni Abinadab ne si Ilisar eyew iyan egtanggu kayi.

2 Miglihad ka daruwa ne pulu (20) ne leg‑un bunsud te peg-uyan te Tahuanan diye te Kiryat-Hiyarim, wey te sika ne me leg‑un, miglungku ka keet-etawan te Israil wey migbuyu te bulig diye te Magbebaye.

3 Ne ingkahiyan ni Samwil ka langun ne etew te Israil, “Ke egpuun te pusung niyu ka peglibed niyu te Magbebaye, engkeri niyud ka me manama ne lapu wey ka larawan ni Astarut. Ne ibehey niyud ka pusung niyu diye te Magbebaye wey sikandin de simbaa niyu wey egluwasen kew nikandin puun te me matig-Pilistiya.” 4 Ne immandegpak e te me matig-Israil ka me larawan ni Baal wey ni Astarut wey iyan dan naan de insimba ka Magbebaye.

5 Ne migkahi si Samwil, “Libulung kew langun se me matig-Israil diye te Mispa su eg-ampu a te Magbebaye para kaniyu.” 6 Sikan naa ka miglibulung sikandan diye te Mispa wey migsakug te weyig wey in-itis dan seini diye te tangkaan te Magbebaye isip halad. Ne migpuasa sikandan te seeye ne aldew wey migkahi, “Nakasale key te Magbebaye.” Ne iyan migpangulu si Samwil te me matig-Israil diye te Mispa.

7 Te pegkarineg te me matig-Pilistiya ne miglibulung ka keet-etawan te Israil diye te Mispa, migtakereg e ka me pangulu ran eyew te peglusud te me matig-Israil. Te pegkarineg kayi te keet-etawan te Israil, nenaaldek e sikandan. 8 Ne ingkahiyan dan si Samwil, “Kene ka sanggel ka eg-ampu te Magbebaye ne Manama ta eyew egluwasen ki nikandin puun te me matig-Pilistiya.” 9 Sikan naa ka migkuwa si Samwil te karniru ne egsusu pad wey intutung din isip igpanubad te Magbebaye. Migpangananey sikandin te Magbebaye para te me matig-Israil wey intabak sikandin. 10 Taheed te egpanubad pad si Samwil te egtutungen, migparani e ka me matig-Pilistiya eyew te peglusud kandan. Piru te sika ne aldew, imparagsangan te Magbebaye te luhung ne amana ne makeseg ka me matig-Pilistiya wey nenaaldek sikandan wey nekegsuwey, wey natalu sikandan te me Israilita. 11 Ne migligkat e ka me matig-Israil puun te Mispa wey inlupug dan e ka me matig-Pilistiya taman diye te diddiralem te inged ne Bit-Kar, wey impangimatayan dan sikandan.

12 Ne migkuwa si Samwil te dakel ne batu wey intahu din diye te elat-elat te Mispa wey te Hisana. Ne ingngaranan din seeye te Ibinisir* Ka igpasabut kayi te Hibruwanen: batu te pegbulig. su migkahi sikandin, “Imbulihan ki te Magbebaye taman kuntee.” 13 Sikan naa ka natalu ka me matig-Pilistiya wey warad e sikandan mig-abey miglusud diye te inged te me matig-Israil tenged su ka Magbebaye ma iya ka migpakig-ehet kandan taheed te neuyag pad si Samwil. 14 Ne naawi e te me matig-Israil ka me siyudad ne naahew te me matig-Pilistiya puun te Ikrun peendiye te Gat wey ka langun ne me sakup kayi. Ne warad e degma migpeehetey ka me matig-Israil wey ka me Amurihanen.

15 Migpangulu si Samwil te Israil te intiru ne umul rin. 16 Tagse leg‑un, eggipanew si Samwil eyew te pegleuy te Bitil, Gilgal, wey te Mispa eyew te pegpangulu te me matig-Israil te sika ne me inged. 17 Ne eg-uli sikandin diye te Rama te egkeimpusan e ka himu rin su diye ma ka ugpaan din wey sikandin degma ka migmandu te me matig-Israil te sika ne inged. Ne miggimu degma sikandin te altar ne tutunganan te igpanubad diye para te Magbebaye.