1 Ne migkuwa si Samwil te intahuan te lana wey in-itis din e seini diye te ulu ni Saul. Ne inggarekan din e sikandin wey migkahiyan, “In-alam ka te Manama eyew egkeyimu ne pangulu te keet-etawan din ne Israil. Eghari ka te keet-etawan te Magbebaye ne Manama wey egluwasen nu sikandan puun te miglingut kandan ne me kuntere dan. Seini ka ilaan ne ka Magbebaye ka mig-itis keykew te lana eyew egkeyimu ka ne pangulu te keet-etawan din: 2 te peggipanew nu kuntee ne aldew, egpakasinug-ung ka te daruwa ne etew diye te lebeng ni Rakil diye te Silsa ne eletanan te inged ne Binhamin. Ne egnangenan ka nikandan te nakite e ka me asnu ne egpamitawen nu, ne sikeykew e ka igkalaggew te amey nu te migkahi, ‘Nekey buwad ka neula-ula te anak ku?’ 3 Te pegginguma nu diye te uk ne kayu diye te Tabur, duen e man‑e egkasinug-ung nu diye ne tatelu ne etew ne eggendiye te Bitil eyew egsimba te Manama. Ka sabeka kandan, mig-uyan te tatelu ne nati te kambing, ne ka igkarangeb, mig-uyan te tatelu ne timman ne paan, wey ka igkatelu, mig-uyan te binu ne diye itahu te laplap ne tahuanan. 4 Eg-alumameen ka nikandan wey egbehayan ka te daruwa ne timman ne paan, ne egdawaten nu degma seini. 5 Te egkeimpusan e sika, hendiye kad te Gibiya-Iluhim ne ingkekampuwan te me matig-Pilistiya. Te pegseled nu te siyudad, due egkasinug-ung nu ne sabeka ne punduk te me prupita ne diye egpuun te inged ne panubaran diye te bubungan. Ne egmangealpa sikandan, egmanetambur, egmamulendag, wey egmanguglung. Ne egpangguhud sikandan te impanengneng te Manama kandan. 6 Ne sahuhune ne eglene ka Panisingan te Magbebaye due te keykew wey egpangguhud kad degma te lalag te Manama duma kandan, ne egkabalbalawan ka pegkeetew nu. 7 Ne himuwa nu ka meupiya ne egkasuman-suman nu ke egkatuman e ka seini ne me ilaan due te keykew su egduma ka Manama keykew. 8 Hun‑a kad keddi diye te Gilgal. Egsundul a keykew eyew egpanubad te egtutungen wey egpanubad para te keupianan. Tahari e naa te pitu ne aldew taman te egginguma a wey egnangenan ku sikeykew te eleg ne eggimuwen nu.”

9 Te peg-inniyug e ni Saul ki Samwil eyew eggipanew e, imbalbalawan e te Manama ka pusung din. Ne neyitabu iya ka langun ne ilaan te seeye ne aldew. 10 Te pegginguma ran diye te Gibiya, insinug-ung e sikandan te sabeka ne punduk te me prupita. Ne dutu, sahuhune ne miglene ka Panisingan te Manama diye ki Saul ne migpangguhud e degma sikandin te impanengneng te Manama kandin duma te seeye se me prupita. 11 Te pegkakita te langun ne etew ne nekeila kandin dengan, migmein-inseey e sikandan, “Nekey‑a ka neyitabu te anak ni Kis? Prupita bes e degma sikandin?” 12  ✡ 1Sam 19:23-24.Ne due etew diye ne migtabak kandan, “Mani bes iya ke hentew ka amey rin, te egkaayun ma ne egkeyimu ne prupita ka minsan hentew?” Purisu sika ka egpuunan te lalahen ne, “Neyimu bes e degma ne prupita si Saul?” 13 Te nekeimpus e si Saul ka migpangguhud te impanengneng te Manama kandin, miggendiyad e sikandin te panubaran diye te bubungan.

14 Te neimpusan e seeye, nakita si Saul te anggam din wey mig-inse kandin wey diye te suluhuanen din, “Hendei kew migpuun?”

Ne migtabak si Saul, “Migpamitew key te me asnu piru te nakamaan-maan key e ne kene ney e seeye egkakita, miggendiye key e ki Samwil.”

15 Ne mig-insaan e man‑e si Saul te anggam din, “Egkaayun ne egnangenan a nikeykew ke nekey ka ingkahi ni Samwil keykew?”

16 Ne migtabak si Saul, “Innangenan key re nikandin te nakite e ka me asnu.” Piru ware din ipanugtul ka ingkahi ni Samwil ne egkeyimu sikandin ne Hari.

17 Ne impeumew ni Samwil ka me etew eyew te peglibulung diye te tangkaan te Manama diye te Mispa. 18 Ne migkahiyan din ka keet-etawan te Israil, “Seini ka ingkahi te Magbebaye, ka Manama te Israil, ‘Impalihawang ku sikaniyu puun te Ihiptu wey inluwas ku sikaniyu puun te me matig-Ihiptu wey te langun ne migharian ne migdeeg-deeg kaniyu. 19 Piru insamsamilian ad nikaniyu se Manama niyu ne migluwas kaniyu puun te langun ne me pegbayad-bayad wey me keyirapan. Ne migkahi kew, “Behayi key te Hari.” Purisu libulung kew kuntee kayi te tangkaan ku te Magbebaye sumale te tribu wey karumaan niyu.’ ”

20 Ne impeparani ni Samwil diye te kandin ka tagse kabuhalan te Israil wey iyan naalam ka me kabuhalan ni Binhamin pinaahi te pegpintut-pintut. 21 Ne impeparani rin e man‑e diye te kandin ka tagse pamilya te me kabuhalan ni Binhamin wey iyan naalam ka pamilya ni Matri pinaahi red man‑e te pegpintut-pintut. Ne puun te pamilya ni Matri iyan naalam si Saul ne anak ni Kis. Piru te impamitew ran e si Saul, ware sikandin diye. 22 Sikan naa ka mig-inse sikandan te Magbebaye ke hendei si Saul.

Ne migtabak ka Magbebaye, “Miggeles sikandin due te me kasangkapan.”

23 Sikan naa ka migpamallahuy e sikandan ka egkuwa ki Saul diye. Te pegsasindeg din e diye te taliware te me etew, subla sikandin ne malangkew te langun, ne ka duma taman de te pamanayen din. 24 Ingkahiyan ni Samwil ka me etew, “Seini ka etew ne in-alam te Magbebaye. Ware egpekeiling kandin te langun ne etew.”

Ne migmanguleyi ka langun ne etew, “Egkeuyag ka Hari!”

25 Ne innangenan ni Samwil ka me etew te katenged wey katungdanan te Hari. Ne insulat din seini diye te baseen wey diye din itahu te tangkaan te Magbebaye. Ne impeuli din e ka langun ne etew diye te me ugpaan dan. 26 Ne mig-uli e degma si Saul diye te baley rin diye te Gibiya ne migdumaan te me bahani ne imbagget te Manama.* Te Hibruwanen: insamsam te Manama se me pusung. 27 Piru due me etew ne ware gulehud ne migkahi, “Egmenuwen naa te seini ne etew te egluwas kanta?” Ne inlemetan dan si Saul wey ware dan behayi te dasag. Piru migpeeneng-eneng de sikandin.