1 Ne miglusuran te kabuhalan ni Amun ne si Hari Nahas duma te me sundalu rin ka inged ne Habis-Gilyad wey inlingutan dan seini. Ne migkahiyan si Nahas te langun ne etew diye te Habis-Gilyad, “Eggimu ki re te kasabutan wey egpasakup key e kaniyu.”

2 Piru migkahi si Nahas, “Eggimu e re te kasabutan kaniyu ke egsuhut kew ne egkulewuten ku ka igkakawanan ne mata niyu eyew egkeyilawan ka intiru ne Israil.”

3 Ne migkahi ka me pangulu diye te Habis-Gilyad, “Behayi key pa te pitu ne aldew eyew egpakasuhu key pad te egpahuhuren meyitenged due diye te intiru ne Israil. Ke ware egpakaluwas kanami ne eggural key e kaniyu.”

4 Te pegginguma te seeye se me insuhu diye te ugpaan ni Saul diye te Gibiya, impanengneng dan e diye te me etew ka ingkahi ni Nahas. Ne puun due migpandalawit e ka me etew. 5 Te seini ne timpu, sikan pad egginguma si Saul puun te kamet din ne migsinundul te me baka. Ne dutu, mig-inse sikandin, “Nekey‑a ka neyitabu te me etew? Mania te migsinehew sikandan?” Purisu impanugtulan dan e sikandin te guhuren te me etew ne egpuun diye te Habis-Gilyad. 6 Te pegkarineg kayi ni Saul, miglene e ka Panisingan te Manama diye te kandin wey migpangebel-ebel e ka langet din. 7 Ne migkuwa sikandin te daruwa ne baka wey intadtad din seini. Ne impeuyan din e seini te seeye se me insuhu peendiye te intiru ne Israil ne egpakahiyen, “Ka minsan hentew ne kene egduma ki Saul wey ki Samwil, egtadtaren degma ka baka rin iling kayi.”

Ne ingginaaldek te Magbebaye ne Manama ka me matig-Israil, sikan naa ka migpakigsabeke e sikandan kandin. 8 Inlibulung ni Saul ka me etew diye te Bisik: tatelu ne gatus ne libu (300,000) ka me matig-Israil wey tatelu ne pulu ne libu (30,000) ka me matig-Huda. 9 Ne impeuli dan e diye te Habis-Gilyad seeye se insuhu duma te seini ne lalag, “Nangeni niyu ka keet-etawan diye te egluwasen e kaaselem sikandan te kene pad egmeudtu.” Te nekeuli e diye te Habis-Gilyad seeye se me insuhu, migpangguhuran dan e ka keet-etawan diye wey nenaggale amana sikandan. 10 Ne ingkahiyan dan ka me kabuhalan ni Amun, “Eggural key e kaaselem kaniyu wey himuwa niyud kayi te kanami ke nekey ka igkeupii niyu.”

11 Te seup ne aldew, imbaad e ni Saul ka me etew te tatelu ne punduk. Te eg-ukale e ka manuk, inlusuran dan e ka me kabuhalan ni Amun diye te kampu ran wey impangimatayan dan e seini taman te meudtu. Ne nekegsuwey namallahuy ka seeye se ware nammatey wey ware minsan daruwa kandan ne nekegduma.

12 Ne ingkahiyan si Samwil te me etew, “Hentew‑a seeye se migkahi, ‘Eghari bes ubag si Saul?’ Igpaangey ta sikandan su eggimatayan ta.”

13 Piru migkahi si Saul, “Ware etew ne eggimatayan kuntee ne aldew su inluwas te Magbebaye ka Israil te seini ne aldew.” 14 Ne ingkahiyan ni Samwil ka keet-etawan, “Kuwa kew e. Eggendiye ki te Gilgal su ig-abey ta igpanengneng ne si Saul, Hari ta.” 15 Sikan naa ka nangendiyad te Gilgal ka langun ne etew wey inggimu ran e ne Hari si Saul diye te tangkaan te Magbebaye. Ne migpanubad sikandan para te keupianan wey miggale-gale amana si Saul wey ka me matig-Israil.