1  ✡ Sal 57 Uluwan; Sal 142 Uluwan.Ne mig-awe e si Dabid diye te Gat wey migpallahuy e diye te sulung te Adulam. Te pegkanengnengi kayi te me suled din wey te intiru ne pamilya te amey rin, miggendiyad e sikandan kandin. 2 Ne miglibulung e diye te kandin ka langun ne nenabaybayaran, ka me utangan, ka me etew ne nenasilag,* Te Hibruwanen: mapeit se umul. wey sikandin ka neyimu ne pangulu ran. Me hep‑at ne gatus (400) sikandan ne me etew.

3 Puun diye, miggendiyad e si Dabid te Mispa ne sakup te Muwab wey ingkahiyan din ka Hari te Muwab, “Peugpaa nu pa ubag ka amey wey iney ku kayi te keykew taman te egkanengnengan ku ke nekey ka eggimuwen te Magbebaye ne Manama para keddi.” 4 Purisu, inggaat e ni Dabid ka amey wey ka iney rin diye te Hari te Muwab wey diye pad sikandan mig-uugpe taheed te diye si Dabid te helesanan.

5 Piru ingkahiyan sikandin ni prupita Gad, “Kene ka heles kayi. Hendiye ka te Huda.” Purisu, mig-awe e si Dabid diye wey miggendiyad te katalunan te Hirit.

6 Ne nahuhuran si Saul te due nakakita ki Dabid wey te me etew rin. Te seeye ne timpu, migpinnuu si Saul diye te egdalungan te kayu ne tamarisku diye te bubungan te Gibiya wey miggehen-gen sikandin te deldeg din, wey inlingutan sikandin te me sakup din ne nanasindeg. 7 Purisu, ingkahiyan ni Saul ka me sakup din, “Pammineg kew se me sakup te pamilya ni Binhamin! Egbehayan kew naa ni Dabid te me kamet wey me parasan? Eggimuwen kew naa nikandin ne me pangulu te libu-libu wey ke gatus-gatus naa ne me sundalu? 8 Su mania te langun niyu ne migplanu te mareet meyitenged keddi? Ware minsan sabeka kaniyu ne migpanengneng keddi ne miggimu ka anak ku te kasabutan ki Dabid, wey ware minsan sabeka kaniyu ne neipeng keddiey wey ke mignangen keddi te migbanasalan bes te anak ku ka suluhuanen ku te peggepas keddi.”

9  ✡ 1Sam 21:7-9; Sal 52 Uluwan.Ne migkahi si Duig ne matig-Idum ne migsesasindeg duma te me upisyal ni Saul, “Te diya a te Nub, nakita ku si Dabid ne migpakiglalag te talagpanubad ne si Ahimilik ne anak ni Ahitub. 10 Ne mig-inse si Ahimilik te Magbebaye ne Manama para ki Dabid. Imbehayan din te pegkeen si Dabid wey imbehey rin degma ka kampilan ni Gulayat ne matig-Pilistiya.”

11 Purisu impeumew ni Saul si Ahimilik, ka talagpanubad ne anak ni Ahitub wey ka langun ne me talagpanubad ne kabuhalan te amey rin diye te Nub. Ne nangendiye sikandan langun te Hari. 12 Ne migkahi si Saul, “Kuntee, pammineg ka se anak ni Ahitub!”

Ne migtabak si Ahimilik, “Uya, ahalen.”

13 Ne mig-insaan ni Saul si Ahimilik, “Mania te migplanuwan a nikaniyu ki Dabid te mareet? Mania te imbehayan nu sikandin te egkakeen, kampilan, wey migpanginginse ka te Manama para kandin wey tenged kayi migsukul e sikandin wey eggepasan ad e kuntee nikandin?”

14 Ne migtabak si Ahimilik, “Hentew‑a te me suluhuanen nu ka matinumanen ne iling te mekaamung nu ne si Dabid ne pangulu te me talagbantey nu ne intahud te pamilya nu? 15 Kene ne seini re ne timpu ka natahaan nu ne migpanginginsa a te Manama para kandin. Sikan naa Mahal ne Hari, kena a ubag nikeykew bayungi se suluhuanen nu wey ka langun ne kabuhalan te amey ku, su sikeddi se suluhuanen nu, warad iya kalintahaan meyitenged due.”

16 Ne migkahi ka Hari, “Egpatey ka iya Ahimilik, wey ka langun ne kabuhalan te amey nu!” 17 Ne ingkahiyan te Hari ka me talagbantey ne diye te kakiliran din, “Pangimatayi niyu ka me talagpanubad te Magbebaye, su miglapig degma sikandan ki Dabid. Nakanengneng sikandan ne migpallahuy si Dabid piru wara a nikandan panengnenga.” Piru ka me suluhuanen te Hari, ware mig-aku te pegdereet te me talagpanubad te Magbebaye. 18 Purisu ingkahiyan te Hari si Duig, “Pangimateyi nu ka me talagpanubad!” Te seeye ne aldew, walu ne pulu wey lalimma (85) ne me talagpanubad ka impangimatayan ni Duig ne nanaluub te mateles ne kumbale ne egngaranan te ipud. 19 Ne in-amin din degma pangimatayi pinaahi te kampilan ka langun ne nangugpe diye te Nub, ka siyudad te me talagpanubad. Impangimatayan din ka me lukes, ka me malitan, ka me bate wey ka egsusu pad ne me bate, ka me baka, ka me asnu, wey ka me karniru.

20 Piru nakapallahuy si Abiyatar, ka sabeka te me anak ni Ahimilik ne anak ni Ahitub, wey miggendiyad e ki Dabid. 21 Ne impanugtulan din e si Dabid te impangimatayan ni Saul ka me talagpanubad te Magbebaye. 22 Ne ingkahiyan ni Dabid si Abiyatar, “Nakanengneng a te innangenan iya ni Duig si Saul, su diye sikandin te pegbehey ni Ahimilik keddi te kampilan ni Gulayat. Purisu sikeddi ka egkasenditan te kamatayen te langun ne kabuhalan te amey nu. 23 Kayi kad ugpe te keddi wey kene ka kaaldek su kene ka egkamenu kayi te keddi. Ka kuntere nu, kuntere ku red degma.”