1 Ne due nakahuhud ki Dabid ne inlusuran te me matig-Pilistiya ka Kiila, wey impanakew ran e ka me trigu diye te diekanan. 2 Purisu migpanginginse si Dabid te Magbebaye ne Manama, “Eggipanew e naa wey eglusuran ka me matig-Pilistiya?”

Ne migtabak ka Magbebaye, “Ne hipanew kad iya wey lusuri nu ka me matig-Pilistiya, wey luwasa nu ka Kiila.”

3 Piru ingkahiyan si Dabid te me etew rin, “Nenaaldek key e minsan kayi ki pad te Huda, wey naan pa iya ke eggendiye kid e te Kiila eyew te peglusud te me sundalu te matig-Pilistiya.” 4 Ne migpanginginse e man‑e si Dabid te Magbebaye, wey migtabak ka Magbebaye ne miggenendue, “Tupang ka iya diye te Kiila su igpareeg ku keykew ka me matig-Pilistiya.” 5 Purisu miggendiye te Kiila si Dabid duma te me etew rin, wey migpahiggireey te me matig-Pilistiya. Susuluhi ka neyimatayan dan wey nakaahew sikandan te me ayam. Sikan naa ka naluwas ni Dabid ka nangugpe diye te Kiila.

6 Ne due ipud ne in-uyan te anak ni Ahimilik ne si Abiyatar te pegpallahuy rin puun ki Saul peendiye ki Dabid diye te Kiila.

7 Te nahuhuran si Saul ne diye si Dabid te Kiila, migkahi e sikandin, “Imbehey en iya sikandin te Manama keddi, su migseled ma sikandin te lungsud ne in-alad te matikang wey makepal ne batu wey nalekeban ka me gumawan wey kenad sikandin egpakalihawang.” 8 Ne impeumew ni Saul ka langun ne me sundalu rin, wey migpangandam sikandan te peggendiye te Kiila eyew eglingutan dan si Dabid wey ka me sakup din diye.

9 Te pegkanengnengi ni Dabid te migplanu si Saul te pegdereet kandin, migkahiyan din e si Abiyatar, ka talagpanubad, “Uyana nu kayi ka ipud.” 10 Ne migkahi si Dabid, “Magbebaye ne Manama te Israil, nakarineg a iya se suluhuanen nu te eggendini si Saul te Kiila eyew te pegdereet te seini ne lungsud tenged keddiey. 11 Igbehey e naa te me matig-Kiila diye ki Saul? Eggendini naan iya si Saul sumale te narineg ku? Tabaka a ubag nikeykew Magbebaye te Israil!”

Ne migtabak ka Magbebaye, “Uya, eggendini sikandin.”

12 Ne mig-inse e man‑e si Dabid, “Igbehey e naa wey ka me etew ku te me matig-Kiila diye ki Saul?”

Ne migtabak ka Magbebaye, “Uya, igbehey kew nikandan.”

13 Purisu mig-awe e si Dabid wey ka hen‑em ne gatus (600) ne me etew rin diye te Kiila wey migleug-leug e te minsan hendei. Te pegkarineg ni Saul te nakapallahuy si Dabid puun diye te Kiila, ware din e migbulus diye.

14 Ne miggeles si Dabid diye te me helesanan diye te disirtu ne diye te bubungan te Sip. Ne impamitew ni Saul si Dabid te tagse aldew, piru ware sikandin ipakita te Manama ki Saul. 15 Taheed te diye si Dabid te Huris diye te disirtu te Sip, nakarineg sikandin ne egpamitawen sikandin ni Saul eyew eggimatayan. 16 Ne miggendiye si Diyunatan ki Dabid diye te Huris eyew te pegbagget kandin te pegsalig te Manama. 17 Migkahi si Diyunatan, “Kene ka kaaldek su kene ka nikandin egkakita wey kene ka nikandin egkamenu. Egkeyimu ka ne Hari te Israil wey sikeddi ka egpakasinundul keykew, wey nakataha ka amey ku meyitenged kayi.” 18  ✡ 1Sam 18:3.Ne miggimu sikandan se daruwa te kasabutan diye te tangkaan te Magbebaye ne Manama. Te neimpusan e seini, mig-uli e si Diyunatan diye te ugpaan din piru migpalunggehaat de mule si Dabid diye te Huris.

19  ✡ Sal 54 Uluwan.Due me matig-Sip ne miggendiye ki Saul diye te Gibiya, wey migkahi, “Nakanengneng key ke hendei lenged miggeles si Dabid diye te Huris. Diye sikandin miggeles te bubungan te Hakila ne dapit te igkakawanan ne balabahan te Hisimun. 20 Purisu hendiye ka, mahal ne Hari, ke ken‑u nu igkeupii. Sikanami e ka balahad ne egdakep kandin wey igbehey keykew.”

21 Migkahi si Saul, “Egpanalanginan kew te Magbebaye tenged te himenew niyu keddi. 22 Na, hipanew kew e wey pitawa niyu ay-ayari ke hendei iya sikandin miggeles. Nengnengi niyu ke hendei sikandin egbaye-baye wey ke hentew ka nakakita kandin diye. Su due nakanangen keddi ne kene ne mahaan sikandin egkasapenan. 23 Ne nengnengi niyu degma ka langun ne inged ne eggel-helesan din, wey libed kew naa kayi te keddi ke egkanengnengan niyud. Ne egdume e naan e kaniyu. Ne emun ke diye iya sikandin te sika ne inged, egtalukunan ku iya sikandan diye te intiru ne tane te Huda.”

24 Purisu miggun-e e sikandan ki Saul diye te Sip. Te seeye ne timpu, diyad e si Dabid wey ka me etew rin te disirtu diye te Maun ne diye te Araba, dapit te igkakawanan ne balabahan te Hisimun. 25 Ne miggendiyad si Saul wey ka me etew rin eyew te pegpamitew ki Dabid. Piru te nahuhuran si Dabid kayi, miggeles e sikandin diye te dalama ne diye te disirtu diye te Maun, wey diye pad sikandin mig-uugpe. Te pegkarineg kayi ni Saul, inlupug din e sikandin diye. 26 Ne nekeglimang te bubungan si Saul wey si Dabid duma te me etew rin ne egkaana-ana ne egpariyu ki Saul. Te egkasapenan e perem te egdakep ni Saul wey te me etew rin si Dabid duma te me etew rin, 27 due insuhu ne egpakahiyen ki Saul, “Ahalen, dagdahew ka libed su inlusuran te me matig-Pilistiya ka nasud ta.” 28 Purisu migsanggel e si Saul ka eglupug ki Dabid wey miglibed e eyew egpakiggira te me matig-Pilistiya. Purisu, migngaranan ka sika ne inged te, “Dalama te Impallahuyan.” 29 Puun diye, miggendiye si Dabid te In-Gidi wey diye mig-ugpe te me helesanan diye.