1 Nataman, migpatey e si Samwil wey miglibulung ka langun ne matig-Israil, wey miglungku sikandan tenged kandin. Inlebeng dan sikandin diye te ugpaan din diye te Rama.

Te neimpusan e seini, migtupang e si Dabid te disirtu diye te Paran. 2 Due sabeka ne etew diye te Maun ne amana ne meyaman wey due tane din diye te Karmil. Due tatelu ne libu (3,000) ne karniru rin wey sabeka ne libu (1,000) ne kambing. Ne impangalutan din ka me karniru rin diye te Karmil. 3 Si Nabal ka ngaran te etew wey si Abigil ka ngaran te asawa rin. Malayat se suman-suman ni Abigil wey mateles sikandin ne malitan piru mahaan mule egkabelu ka lukes wey mareet se batasan. Kabuhalan sikandin ni Kalib.

4 Taheed te diye si Dabid te disirtu, nakarineg sikandin ne migpangalut si Nabal te me karniru rin. 5 Sikan naa ka migsuhu si Dabid te sapulu ne me lukes-lukes wey ingkahiyan din sikandan, “Hendiye kew ki Nabal diye te Karmil wey ipangemuste e naa nikaniyu. 6 Kahii niyu sikandin, ‘Ka keupianan egduma keykew peendiye te pamilya nu wey te langun ne keykew. 7 Nakarineg a te impepangalutan nu ka me karniru nu. Te naruma ney dengan ka me talagtameng te me karniru nu, ware ney sikandan menuwa wey ware sikandan nalaahi te intiru ne aldew te diye sikandan te Karmil. 8 Kema insei nu ka me suluhuanen nu eyew egpanugtulan ka nikandan. Na, kuntee eghangyu a ne ipapitew nu ka keupiya nu te me lukes-lukes ne insuhu ku su pista ma kuntee. Isipa a ubag ne anak nu wey isipa nu degma ne me suluhuanen nu ka me suluhuanen ku. Behayi key nikeykew te minsan nekey ne igpakabehey nu.’ ”

9 Purisu te pegginguma te me etew ni Dabid diye ki Nabal, inlalag dan e kandin ka lalag ni Dabid. Ne migtetahad sikandan te tabak ni Nabal. 10 Ne migkahiyan ni Nabal ka me etew ni Dabid, “Hentew‑a mule si Dabid ne anak ni Hisi? Kuntee ne timpu masalig ka me suluhuanen ne namallahuy puun te me ahalen dan. 11 Kene ku igbehey ka paan ku, ka weyig ku, wey ka ngalap te inggilang ku ne ayam diye te me etew ne ware ku nanengnengi ke hendei migpuun. Intahahe ku seini te me tigpangalut te me karniru ku!”

12 Sikan naa ka miglibed e ka me etew ni Dabid. Te pegginguma ran, innangenan dan e si Dabid te langun ne inlalag ni Nabal. 13 Ne ingkahiyan ni Dabid ka me sakup din, “Isiniket niyu ka me kampilan niyu!” Purisu nanisiniket e sikandan te me kampilan dan wey iling ded degma ka inggimu ni Dabid. Me hep‑at ne gatus (400) ne etew ka migduma ki Dabid, wey migpalunggaat de ka daruwa ne gatus (200) ne etew eyew egtameng te me kasangkapan dan.

14 Piru due sabeka ne lukes-lukes ne suluhuanen ni Nabal ne migkahi ki Abigil ne asawa ni Nabal, “Migsuhu si Dabid te me suluhuanen din kayi puun te disirtu eyew egpangemusta te ahalen ney, piru imbalbalukanan din de iya sikandan eyew egpeyilawan. 15 Piru ka seeye ne me etew amana ne meupiya kanami. Ware key nikandan dereeti wey ware minsan nekey ne nalaag puun kanami te timpu ne nekegduma key diye te kamet. 16 Ka malehet, iling sikandan te alad ney te aldew wey marusilem su imbantayan key nikandan taheed te migtameng key te me karniru. 17 Kuntee, nanengnengan nud sika wey sumsumana nu ke nekey ka eleg ne eggimuwen, tenged te egginguma ne karereetan te iglukes nu wey te intiru ne pamilya rin. Mareet amana ka batasan din wey kene egkalalahan.”

18 Ne migdagdahew migkuwa si Abigil te daruwa ne gatus (200) ne paan, daruwa ne tahuanan ne laplap ne napenu te binu, lalimma ne karniru ne nahilang e, wey me sabeka ne saku ne insandag ne trigu, mahatus (100) ne hamak ne behas te paras ne indampil, wey daruwa ne gatus (200) ne timman ne egkakeen ne hinimu puun te behas te iggira ne indampil red degma. Ne imparulan din e seini te me asnu 19 wey ingkahiyan din ka me suluhuanen din, “Hun‑a kew e su egsinundul ad e.” Piru ware din nangeni kayi ka iglukes din ne si Nabal.

20 Te mig-untud e si Abigil te asnu ne diye migbaye te bangalug te bubungan, sahuhune ne egkasinug-ung din e si Dabid wey ka me etew rin ne diye egpatangke kandin. 21 Ne sikan pad iya nekeimpus si Dabid ka migkahi, “Ware karuan te pegbantey ku te langun ne kasangkapan ni Nabal diye te disirtu eyew ware egkalaag. Iyan din de insuli te keupiya ku ka mareet. 22 Egdusaan a te Manama te mangune-kune ke duen pad sabeka ne lukes te langun ne sakup din ne egkasame ku te egpangimatey taman te maselem.”

23 Te nekegsinug-ung e sikandan, migdagdahew si Abigil migpamaneug te asnu rin wey miglangkeb diye te tangkaan ni Dabid. 24 Ne migkahi sikandin, “Ahalen, sikeddi e senditi nu wey tuhuti a ubag se suluhuanen nu ne egpakiglalag keykew, wey pammineha nu ka iglalag ku. 25 Balahara nu re due ahalen, ka mareet ne etew ne si Nabal. Eleg iya kandin ka ngaran din ne si Nabal, ne ka igpasabut ‘ungel-ungel.’ Piru wara a mule nakakita te me etew ne insuhu nu, ahalen. 26 Na, kuntee tenged su imbalabahan ka te Magbebaye ne Manama te pegpangimatey wey te pegsuli, igpahunlibet ku iya keykew pinaahi te manekal ne Magbebaye, ne ka langun ne kuntere nu wey ka langun ne egdereet keykew, egdusaan te Manama iling ki Nabal te egparusaan din. 27 Ke egkaayun ahalen, dawata nu seini se me dasag ne in-uyan ku para keykew wey te me etew nu. 28 Pasayluwe e re ke due neyimu ku ne seyyup. Eggimuwen ka iya te Magbebaye ne Hari te Israil wey ka me kabuhalan nu, su migpakiggira ke ma para kandin. Meupiya perem ke ware egkeyimu nu ne seyyup taheed te neuyag ke pad. 29 Minsan pad ke due eglupug keykew eyew eggimatayan ka, egtamengan ka te Magbebaye iling te sabeka ne etew ne migtetameng te mahal ne kasangkapan. Piru igdegpak te Magbebaye ka me kuntere nu iling te batu ne imbala te lambuyug. 30 Ke egkatuman e seeye se langun ne meupiya ne saad te Magbebaye keykew, ahalen, wey egkeyimu kad ne Hari te Israil, 31 kene ka egkabantalan wey ke egpekegsendit naa su ware ke ma miggimatey wey ke migsuli naa te ware eleg ne egpuunan. Ne emun ke egpamatubungen kad e te Magbebaye, kene e re ubag nikeykew kalingawi se suluhuanen nu ne malitan.”

32 Ne migkahiyan ni Dabid si Abigil, “Egsayeen ka Magbebaye te Israil ne migpeendini keykew eyew te pegsinug-ung keddi. 33 Egpanalanginan ka tenged te meupiya ne suman-suman nu wey te pegbalabag nu keddi te seini ne aldew te peggimatey wey te pegsuli. 34 Su ke ware ke pa perem migdagdahew miggendini ka egsinug-ung keddi, egguleen kud perem te pegpangimatey si Nabal wey ka me sakup din kaaselem te maselem. Su sika ka impahunlibet ku pinaahi te manekal ne Magbebaye te Israil, ne iyan sika ka migbalabag keddi te peggimu te mareet keykew.” 35 Ne indawat ni Dabid ka in-uyan din para kandin wey migkahi, “Uli kad wey kene kad kabantali. Eggimuwen ku ka inhangyu nu keddi.”

36 Te peggingume e ni Abigil diye te baley, neumaan din e si Nabal ne migpasahakeen iling te sabeka ne Hari wey amana sikandin nahale wey newubug. Purisu, maselem din e guhuri si Nabal meyitenged te pegsinug-ung din ki Dabid. 37 Te newuwasan e si Nabal te maselem, innangenan e sikandin ni Abigil te neyitabu. Ne dutu, sahuhune ne migmasakit ka pusung din wey kenad egpakageheyinawa wey kenad e egkaweil se lawa. 38 Peglihad te sapulu ne aldew, indusaan e te Magbebaye ne Manama si Nabal, wey migpatey e sikandin.

39 Te pegkarineg ni Dabid te migpatey e si Nabal, migkahi e sikandin, “Egdeyrayen ka Magbebaye ne Manama ne migbalabag keddi te peggimu te seyyup wey ka migsuli ki Nabal te migpeyilew keddi. Indusaan din si Nabal tenged te mareet ne inggimu rin keddiey.”

Nataman, migsuhu e si Dabid te me suluhuanen din eyew te peglalag ki Abigil te igduwey rin sikandin. 40 Te pegginguma te me suluhuanen ni Dabid diye te Karmil, ingkahiyan dan e si Abigil, “Impeendini key ni Dabid eyew te peg-angey keykew su igduwey ka nikandin.”

41 Ne migsasindeg sikandin wey miglangkeb diye te tane wey migkahi, “Uya, suluhuanen a ni Dabid wey andam a ne eglu‑lu te me paa te me suluhuanen din.” 42 Ne miggaan-gaan mig-untud si Abigil te asnu wey migdume e sikandin te me suluhuanen ni Dabid. Ne migduruma sikandin te lalimma ne me malitan ne me suluhuanen. Ne induwey e sikandin ni Dabid.

43 Ne tapey e iruwey ni Dabid si Ahinuwam ne matig-Hisriil. Ne sikandan se daruwa neyimu e ne asawa ni Dabid. 44  ✡ 2Sam 3:14-16.Ne ka asawa rin ne si Mikal, impaasawaan e te anuhang din ne si Saul ki Paltil ne anak ni Lais ne matig-Galim.