1  ✡ Sal 54 Uluwan.Sabeka ne aldew, due me matig-Sip ne miggendiye ki Saul diye te Gibiya wey migkahi, “Diye miggeles si Dabid te me bubungan te Hakila ne diye te talipag te Hisimun.” 2 Sikan naa ka miggendiyad e si Saul te disirtu diye te Sip duma te tatelu ne libu (3,000) ne me etew ne in-alam puun te me matig-Israil eyew egpamitew ki Dabid diye. 3 Migkekampu ensi Saul diye te ilis te dalan peendiye te bubungan te Hakila ne talipag te Hisimun piru diye mule si Dabid te disirtu. Te pegkarineg ni Dabid te migsinundul kandin si Saul diye, 4 migsuhu e sikandin te me tahasiliban wey nanengnengan dan ne miggendiye iya si Saul. 5 Te sikan marusilem, miggendiye si Dabid te ingkekampuwan ni Saul. Ne nakita ni Dabid ke hendei miggibat si Saul duma ki Abnir ne anak ni Nir, ka pangulu te me sundalu rin. Miglipereng si Saul diye te kampu ne miglingutan te me sundalu.

6 Ne mig-inse si Dabid ki Ahimilik ne Hitihanen wey te suled ni Huwab ne si Abisay ne anak ni Siruya, “Hentew‑a ka egduma keddi diye te ingkekampuwan ni Saul?”

Ne migtabak si Abisay, “Sikeddi.”

7 Purisu te sika ne marusilem, miggendiye si Dabid wey si Abisay te ingkekampuwan ni Saul. Ne nakita ran ne miglipereng si Saul ne impes-ek ka deldeg din diye te egkeulunanan din. Ne nakalipereng degma si Abnir wey ka me sundalu ne nakalingut ki Saul. 8 Ne inna-naasan ni Abisay si Dabid, “Imbehey e keykew te Magbebaye ne Manama ka kuntere nu te seini ne marusilem. Na, tuhuti a te pegpagket kandin diye te tane pinaahi te sabeka re ne pegpilak kandin te deldeg din mismu, wey kenad keilangan ne eg-abayan pad.”

9 Piru ingkahiyan ni Dabid si Abisay, “Kene nu dereeti sikandin. Su egparusaan iya ka minsan hentew ne eggimatey te in-alam te Magbebaye. 10 Egpahunlibet a pinaahi te manekal ne Magbebaye ne sikandin mismu ka eggimatey ki Saul wey ke egkapatey re due sikandin te kabuyahi rin wey ke egpatey sikandin diye te giraanan. 11  ✡ 1Sam 24:6.Piru kene egtuhut ka Magbebaye ne sikeddi ka eggimatey te in-alam din ne Hari. Egkuen te re ka deldeg din wey ka tahuanan din te weyig ne sika te egkeulunanan din, wey eggipanew kid.” 12 Purisu ingkuwe e ni Dabid ka deldeg wey ka tahuanan te weyig ne diye te egkeulunanan ni Saul wey miggipanew e sikandan. Ware minsan sabeka ne nakakita dutu wey ke nakasahimanu naa te neyitabu, wey ke nekeyimata naa tenged su impaalineknek ma sikandan te Magbebaye.

13 Ne miggendiyad ensi Dabid te talipag wey diyad migsasindeg te puntul te sabeka ne bubungan ne madmariyu e te ingkekampuwan ni Saul. Due maluag ne eletanan diye te taliware dan. 14 Impanguleyian ni Dabid ka me sundalu wey si Abnir ne anak ni Nir te miggenendue, “Abnir, egkarineg e red nikeykew?”

Ne migtabak si Abnir, “Hentew‑a sika se migpanguleyi ne egbanggew te Hari?”

15 Ne migtabak si Dabid, “Sikeykew ma iya ka etew ne ware egpekeiling ne sundalu te Israil? Mania te ware nu tamengi ka Hari ne ahalen nu te due miggendue eyew te peggimatey perem kandin? 16 Kene ne meupiya sika se inggimu nu. Egpahunlibet a pinaahi te manekal ne Magbebaye ne eleg ka ne egkapatey wey ka me etew nu su ware niyu tamengi ka ahalen niyu ne in-alam te Magbebaye ne Hari. Kema, pitawa nu ke duen naan pad ka deldeg wey ka tahuanan din te weyig due te egkeulunanan din.”

17 Nekeila si Saul te laheng ni Dabid wey mig-inse ne migpanguleyi, “Sikeykew sika Dabid ne anak ku?”

Ne migtabak si Dabid, “Uya, sikeddi seini Mahal ne Hari. 18 Mania te eglupuhen a nikeykew se suluhuanen nu? Nekey bes ka neyimu ku ne seyyup? 19 Purisu, ahalen ne Hari, pammineha nu ka iglalag ku te suluhuanen nu. Emun ke sika se Magbebaye ka migpeyibelu keykew eyew te pegkuntere keddi, egdawaten din perem ka igpanubad ku kandin. Piru ke etew re ka egpuunan due, meupiya perem ke egkarilus sikandan diye te tangkaan te Magbebaye su indeldel a nikandan te seini ne aldew eyew warad egkapanunud ku puun te Magbebaye. Migkahi sikandan, ‘Hipanew kad wey pamakey kad te lein ne me manama.’ 20 Kene nu ubag ituhut ne egkapatey a kayi te tane ne mariyu te tangkaan te Magbebaye ne Manama ne ware ilaa wey simbaa ka Magbebaye te Israil. Mania te egpamitawen a nikeykew te Hari te Israil te nekeiling e man de te sisip? Mania te inlupug a nikeykew iling te bayaku ne puhu diye te bubungan?”

21 Ne migtabak si Saul, “Nakasala a keykew. Libed kad e kayi te keddi Dabid ne anak ku wey kene kud e sikeykew egdereetan su wara a nikeykew himatayi te seini ne marusilem. Iling a te egbusawen te inggimu ku wey naseyyup a natamtamani.”

22 Ne migkahi si Dabid, “Seini red ka deldeg nu, Mahal ne Hari. Ipakuwa nu seini te sabeka te me etew nu. 23 Egdasahan te Magbebaye ka tagse sabeka tenged te pegkamatareng din wey pegkamatinumanen. Imbehey ka te Magbebaye keddi te seini ne marusilem piru ware ku himatayi sikeykew su in-alam ka te Magbebaye ne Hari. 24 Imbehayan ku iya te karuan ka umul nu te seini ne marusilem wey meupiya perem degma ke egbehayan ded te Magbebaye te karuan ka umul ku wey egluwasen a nikandin puun te langun ne karereetan.”

25 Ne ingkahiyan ni Saul si Dabid, “Egpanalanginan ka te Manama Dabid ne anak ku. Masalig pad ka egkeyimu nu wey eglampus ka.”

Ne mig-ayun e si Dabid wey mig-uli e degma si Saul.