1 Te seeye ne timpu, inlibulung te me matig-Pilistiya ka me sundalu ran eyew egpakiggira te Israil. Ne migkahiyan ni Hari Akis si Dabid, “Keilangan ne egkanengnengan nu ne sikeykew wey ka me etew nu, egduma iya te egpakiggira.”

2 Ne migkahi si Dabid, “Uya, su eyew egkakita nu mismu ke nekey ka egkeyimu ku te suluhuanen nu.”

Ne migkahi si Akis, “Meupiya iya. Eggimuwen kud e sikeykew ne talagbantey ku te ware egtamanan.”

3  ✡ 1Sam 25:1.✡ Lib 20:27; Diy 18:10-11.Te seeye ne timpu, migpatey e si Samwil wey miglungku ka langun ne matig-Israil tenged kandin, wey diye dan sikandin ilebeng te lungsud din diye te Rama. Ne impaawe e ni Saul ka egmahehane wey ka me tumanuren te Israil.

4 Ne miglibulung ka me matig-Pilistiya wey miggendiye te Sunim, wey migkekampu diye, taheed te inlibulung degma ni Saul ka me matig-Israil wey migkekampu diye te Gilbuwa. 5 Te pegkakita ni Saul te me sundalu te matig-Pilistiya, naaldek e sikandin wey amana neenat-henat se kumeng. 6  ✡ Num 27:21.Sikan naa ka mig-inse sikandin te Magbebaye ne Manama ke nekey ka eggimuwen din. Piru ware sikandin tabaka te Magbebaye minsan pinaahi naan de te taheinep, te Urim,* Ka Urim iyan ka me kasangkapan ne eggamiten te talagpanubad te pegnengneng te igkeupii te Manama, piru ware nataheyi kuntee ke egmenuwen seini te eggamit. wey te me prupita. 7 Ne ingkahiyan ni Saul ka me suluhuanen din, “Pamitawi a nikaniyu te malitan ne egpahehane eyew eggendiyaan ku wey egkeinsaan.”

Ne migtabak ka me suluhuanen din, “Due diye te Indur.”

8 Ne migsaluub si Saul te lein ne kumbale eyew ware egpekeila kandin. Te pegkamarusilem e, miggendiyad e si Saul te malitan duma te daruwa te me suluhuanen din. Te pegginguma ran diye, migkahiyan e ni Saul ka malitan, “Ipapitew nu keddi ke nekey ka egginguma pinaahi te peg-inse te sabeka ne gimukud. Umawa nu ka gimukud te minsan hentew ne egngaranan ku.”

9 Piru migkahiyan sikandin te malitan, “Nakataha ke buwa ma ke nekey ka inggimu ni Saul? Impaawe din ka langun ne egmahehane wey me tumanuren kayi te Israil. Mania te egsahiluten a nikeykew wey eggimatayan?”

10 Ne migpahunlibet si Saul kandin pinaahi te manekal ne Magbebaye ne kene din sikandin egmenuwen te peggimu kayi.

11 Ne nataman, mig-inse e ka malitan, “Hentew gimukud te igkeupii nu ne eg-umawen ku?”

Ne migtabak si Saul, “Umawa nu ka gimukud ni Samwil.”

12 Te pegkakita te malitan ki Samwil, migpanguleyi e sikandin ne migkahi, “Mania te in-akalan a nikeykew? Sikeykew bes si Saul!”

13 Ne migkahiyan sikandin ni Saul, “Kene ka kaaldek. Nekey‑a ka nakita nu?”

Ne migtabak ka malitan, “Nakakita a te sabeka ne gimukud ne migparibabew puun te tane.”

14 Ne mig-inse si Saul, “Mamenua sikandin?”

Ne migtabak ka malitan, “Buyag ne lukes ne migkukumbale te malayat.”

Ne nanengnengan ni Saul ne si Samwil seeye. Ne dutu, miglangkeb e sikandin isip pegtahud kandin.

15 Ne mig-insaan ni Samwil si Saul, “Mania te imbanggew a nikeykew pinaahi te peg-umew nu keddi?”

Ne migtabak si Saul, “Due dakel ne igkalaggew ku. Migpakig-ehet keddi ka me matig-Pilistiya wey in-engkeran ad e te Manama. Wara ad nikandin tabaka minsan pinaahi te me prupita wey me taheinep. Sikan naa ka impeumew ku sikeykew su eyew egkanangenan a nikeykew ke nekey ka eggimuwen ku.”

16 Ne migkahi si Samwil, “Mania te eg-inse ka keddi te in-engkeran kad ma te Magbebaye wey neyimu e sikandin ne kuntere nu? 17  ✡ 1Sam 15:28.Inggimu e keykew te Magbebaye ne Manama ka ingkahi rin keddi ne eg-aween din ka migharian nu iling te eggisien ne kumbale wey igbehey rin e seini diye te sabeka te me sumbaley nu ne iyan si Dabid. 18  ✡ 1Sam 15:3-9.Inggimu seini te Magbebaye tenged su ware nu tumana ka suhu din ne egguleen nu egpangimatayi ka me Amalikanen wey ka me mananap dan. 19 Seini pad man‑e, igpareeg ka te Magbebaye wey ka me matig-Israil te me matig-Pilistiya. Ne kaaselem, sikeykew wey ka me anak nu ne me lukes, eglemung e keddi. Ne igbehey e degma te Magbebaye ka langun ne sundalu te Israil diye te me matig-Pilistiya.”

20 Ne sahuhune ne napeled si Saul wey naketeng de diye te tane su naaldek-haldek sikandin te ingkahi ni Samwil. Warad e keseg din su ware ma sikandin migkeen te intiru ne aldew wey marusilem. 21 Ne migparani ka malitan ki Saul wey te pegkakita rin ne amana ka kaaldek ni Saul, migkahiyan din e sikandin, “Mahal ne Hari, inggimu kud ka inhangyu nu keddi minsan nakanengneng a ne nakatahu te karereetan ka umul ku. 22 Sikan naa, pammineha nu ubag seini se iglalag ku degma te suluhuanen nu. Egbehayan ku sikeykew te pegkeen eyew due keseg nu te eggipanew.”

23 Piru migbalibad sikandin wey migkahi, “Kena a egkeen.” Piru impepehes sikandin pakeena te me suluhuanen din wey te malitan, purisu migpalintutuu e sikandin. Ne mig-enew e sikandin wey migpinnuu e diye te hibatanan. 24 Te seeye ne timpu, due impalambeg te malitan ne nati te baka diye te baley rin.† Diye te baley te me matig-Israil, due degma sinabeng ne egpeugpaan te mananap. Ne sahuhune din gilanga seeye wey migkuwa sikandin te harina, wey inluyang din seini. Ne miggilutu e sikandin te paan ne ware patulin. 25 Ne insendad din seini ki Saul wey te me suluhuanen din, wey nangeen e sikandan. Ne nangipanew e sikandan te seeye ne karusileman.