29
Ka pegsamsamili ki Dabid te me matig-Pilistiya
1 Ne inlibulung te me matig-Pilistiya diye te Apik ka langun ne sundalu ran diye, wey diye migkekampu ka me matig-Israil te sebseb ne diye te Hisril. 2 Taheed te miggipanew e ka me pangulu te me sundalu te matig-Pilistiya duma te tigmahatus (100) wey tigsenge-libu (1,000) ne punduk te me sundalu, migsinundul e degma kandan si Dabid wey ka me etew rin duma ki Hari Akis. 3 Ne mig-inse ka me pangulu te me matig-Pilistiya ki Akis, “Mani bes te due me Hibruwanen kayi?”
Ne migtabak si Akis, “Si Dabid sika, ka upisyal te Hari te Israil ne si Saul. Suble e te sabeka ne leg‑un ka pegduruma ku kandin. Bunsud pad te peg-awe din ki Saul taman kuntee, ware de due nakita ku ne seyyup ne neyimu rin.”
4 Piru nabelu ki Akis ka me pangulu te me matig-Pilistiya wey migkahi, “Palibera nu sika ne etew diye te inged ne imbehey nu kandin. Keilangan ne kene sikandin egpakaruma kanta te egpakiggira su kema ke egkuntereen ki nikandin ke diyad e te eggiraan. Su warad lein ne meupiya ne paahi eyew egpekeg-uli sikandan te ahalen din du te peggimatey te me etew ta. 5 ✡ 1Sam 18:7; 21:11.Sikan ma mule ka Dabid ne in-ulahingan te me malitan taheed te egsesayew sikandan ne miggenendue,
‘Eglibu-libu ka neyimatayan ni Saul,
piru egsapulu ne libu mule ka neyimatayan ni Dabid.’ ”
6 Purisu in-umew ni Akis si Dabid wey migkahiyan, “Egpahunlibet a te manekal ne Magbebaye ne Manama te egkasalihan ka iya wey igkeupii ku perem ne egduma ka keddi te egpakiggira. Su bunsud te timpu ne miggendiye ka keddi taman kuntee, ware nakita ku ne seyyup ne neyimu nu. Piru ware migsuhut ka duma ne me pangulu ne egduma ka. 7 Purisu uli kad e mule ne kene kema kabantali. Kene ka himu te minsan nekey ne igkeepes dan.”
8 Piru mig-inse si Dabid, “Mahal ne Hari, nekey‑a ka neyimu ku wey nekey bes ka nakita nu kayi te keddi te suluhuanen nu bunsud te timpu ne migginguma a diye te keykew? Mania te kena a egpakaruma keykew te egpakiggira te me kuntere nu?”
9 Ne migtabak si Akis, “Nakataha a ne ware igkarew‑ey keykew iling te panalihan te Manama. Piru migkahi ka me pangulu te me matig-Pilistiya, ‘Keilangan ne kene sikandin egpakaruma diye te giraanan.’ 10 Purisu selem-selem ka enew kaaselem wey uli kad duma te me etew nu ke egkaliwaswas e.”
11 Purisu migselem-selem mig-enew si Dabid wey ka me etew rin, wey miglibed e sikandan diye te tane te me matig-Pilistiya. Piru migpabulus mule ka me matig-Pilistiya diye te Hisril.