1 Ne migpahiggireey ka me matig-Pilistiya wey ka me matig-Israil diye te Bubungan te Gilbuwa. Ne masalig ka nenamatey te me matig-Israil diye wey nenakapallahuy ka duma kandan. 2 Ne impatamtamanan lupuha te me matig-Pilistiya si Saul wey ka anak din ne me lukes wey neyimatayan dan ka me anak din ne si Diyunatan, Abinadab, wey si Malkisuwa. 3 Ne migmasumpit pad ka gira ne nakalingut ki Saul wey nakita sikandin te me talagpane. Ne dutu, impepane dan e sikandin wey dakel ka pali din. 4 Ne migkahiyan ni Saul ka talag-uyan te panganiban din, “Hulabuta nu ka kampilan nu wey himatayi a nikeykew, su kema ke iyan egpekeyimatey keddi sika se me etew ne ware migpalintutuu te Manama.* Te Hibruwanen: ware natulii. Ne puun due, egbalbalayen ad nikandan.” Piru ware seeye himuwa te talag-uyan te panganiban din su naaldek amana sikandin. Sikan naa ka ingkuwe e ni Saul ka kampilan din wey migluhe e sikandin. 5 Te pegkakita te talag-uyan te panganiban te migpatey e si Saul, inggulabut din e degma ka kampilan din wey migluhe e degma sikandin, wey migpatey e sikandin duma ki Saul. 6 Purisu migpatey si Saul wey ka tatelu ne anak din ne me lukes, ka talag-uyan te panganiban din, wey ka langun ne me etew rin te seeye de ne aldew. 7 Te pegkarineg te me matig-Israil ne diye nangugpe te talipag te napu te Hisril wey talipag te Hurdan te namallahuy e ka me sundalu te Israil wey migpatey e si Saul wey ka me anak din, in-engkeran dan e ka me lungsud dan, wey migpamallahuy e degma sikandan. Purisu miggendiyaan e seini te me matig-Pilistiya wey migsubalan dan e ugpei.

8 Te seup ne aldew, miggendiye ka me matig-Pilistiya te Bubungan te Gilbuwa eyew te pegpanguwa te me kasangkapan te nenamatey. Ne nakita ran diye si Saul wey ka tatelu ne anak din ne me lukes ne nenamatey diye. 9 Ne intempug dan e ka ulu ni Saul wey ingkuwa ran e ka me kasangkapan din te egpakiggira. Ne migsuhu sikandan te me etew peendiye te intiru ne tane te me matig-Pilistiya eyew te pegpanengneng te meupiya ne panugtulen diye te timplu te me diyus-diyus dan wey diye te me etew. 10 Ne intahu dan ka panganiban wey ka kasangkapan ni Saul te egpakiggira diye te timplu te diyus-diyus dan ne si Astarut wey impagket dan ka lawa rin diye te matikang wey makepal ne alad ne batu te siyudad te Bit-San.

11 Te pegkarineg te me etew te Habis-Gilyad te inggimu te me matig-Pilistiya ki Saul, 12 miggipanew e ka langun ne bahani te intiru ne marusilem peendiye te Bit-San. Ne ingkuwa ran e ka lawa ni Saul wey ka lawa te me anak din diye te alabat te Bit-San wey in-uyan dan e seini diye te Habis, wey insilaban dan e. 13 Ne ingkuwa ran e ka me tul‑an dan wey inlebeng dan e diye te lebut te kayu ne tamarisku diye te Habis. Ne ware sikandan migkeen te pitu ne aldew.