Ka igkarangeb ne baseen ni
Samwil
Igpewun‑a
Ka Ikarangeb ne Samwil, sumpul te An-anayan ne Samwil. Seini ka guhuren te peghari ni Dabid: te an-anayan, diye sikandin migmandu te Huda ne diye te igkakawanan ne balabahan te igsile, (Kapitulu 1–4) wey nataman diyad e te intiru ne nasud, lagkes ka Israil ne diye te igkahibang ne balabahan te igsile (Kapitulu 5–24). Naay-ayaran te egguhud ka seini ne guhuren ne meyitenged ke immenu ni Dabid te pegpakig-ehet te me kuntere din diye te seled te nasud wey diye te duma ne me nasud eyew egmaluag ka migharian din wey eyew egmaresen ka peghari din. Impahunsiling si Dabid ne sabeka ne etew ne dakel se pegpalintutuu wey pegtahud te Manama, wey egkateu ne eg-angey te geyinawa te keet-etawan din. Piru minsan pad due, mabulut degma sikandin wey andam ne eggimu te makaalat-halat ne sale eyew egkaangken din ka kandin mismu ne igkeupii wey eg-im-imanen. Piru te impapitew e te Magbebaye ne Manama diye kandin ka sale din pinaahi te prupita te Magbebaye ne Manama ne si Natan, mig-inniyuhan din e ka me sale din wey indawat din ka impeuyan te Manama ne legpad eyew igpaneem-neem kandin.
Ka peg-ugpe wey keupianan ne neyimu ni Dabid, amana ne nakapamula diye te pusung wey suman-suman te me Hibruwanen. Purisu te timpu ne miggingumaan te mangune-kune ne keyirapan ka nasud, wey te timpu ne egkeupian e man‑e sikandan te lein ne Hari, iyan dan igkeupii ka etew ne anak ni Dabid, ke sikanta pa, kabuhalan ni Dabid ne egpekeiling ded iya kandin.
Ka nenasulat te seini ne baseen
Ka peghari ni Dabid diye te Huda 1:1–4:12
Ka peghari ni Dabid te intiru ne Israil 5:1–24:25
a. Ka an-anayan ne me leg‑un 5:1–10:19
b. Ka peg-ahew ni Dabid te asawa ni Uriyas 11:1–12:25
c. Ka kasamuk wey ka keyirapan 12:26–20:26
d. Ka mewuri ne me leg‑un 21:1–24:25
1
Ka pegpataha ki Dabid ne migpatey e si Saul
1 Te migpatey e si Saul, miglibed e si Dabid duma te me duma rin diye te Siklag te natalu ran e ka me Amalikanen. Ne diye pad sikandan mig-uugpe te Siklag te tatelu ne aldew. 2 Te igkatelu e ne aldew, due lukes-lukes ne migginguma puun te kampu ni Saul ne migkukumbale te nahisi wey due alinepung te ulu rin isip palinneu te peglungku. Te pegginguma te seeye ne lukes-lukes diye ki Dabid, miglangkeb e sikandin diye te tangkaan din isip pegtahud kandin. 3 Ne mig-insaan sikandin ni Dabid, “Hendei ka migpuun?”
Ne migtabak sikandin, “Migpallahuy a puun te kampu te me matig-Israil.” 4 Ne migkahi si Dabid, “Pangguhuri a ke nekey ka neyitabu.”
Ne migtabak sikandin, “Nenakapallahuy ka me matig-Israil ne me sundalu puun te gira, wey masulug ka migpatey. Ne namatey degma minsan si Saul wey ka anak din ne si Diyunatan.”
5 Ne mig-insaan e man‑e sikandin ni Dabid, “Immenu nu te egpakataha te namatey e si Saul wey ka anak din ne si Diyunatan?”
6 ✡ 1Sam 31:1-6; 1Kru 10:1-6.Ne migtabak sikandin, “Nakasalengan te diya a te Bubungan te Gilbuwa wey nakita ku si Saul ne migpanukaddel naan de te deldeg din. Ne suble e ne marani kandin ka me kuntere din ne migmangudde wey migmanguntud te karwahi. 7 Te peglilingey rin, nakita a nikandin wey in-umew ad nikandin. Ne migtabak a, ‘Nekey‑a ahalen?’ 8 Ne mig-insaan a nikandin, ‘Hentew kaa?’ Ne migtabak a, ‘Amalikanen a.’ 9 Ne ingkahiyan a nikandin, ‘Parani ka ubag keddi, wey himatayi ad su nabaybayaran ad te masakit wey egkeupian ad ne egpatey.’ 10 Purisu imparaniyan ku sikandin wey innimatayan kud su nakanengneng a ne kenad e sikandin egkeuyag tenged te me pali din. Ne ingkuwa kud e ka kuruna rin wey ka bakelew rin, wey in-uyan kud e kayi te keykew ahalen.”
11 Ne inggisi ni Dabid ka kumbale din, wey impanggisi degma te me etew rin ka me kumbale dan. 12 Ne migsinehew sikandan wey migpandalawit, wey ware migmangeen taman te nasagkup e tenged ki Saul wey te anak din ne si Diyunatan, wey te me kabuhalan ni Israil ne keet-etawan te Manama ne nammatey te gira.
13 Ne mig-insaan e man‑e ni Dabid ka lukes-lukes ne migpangguhud kandin, “Hendei ka mig-ugpe?”
Ne migtabak sikandin, “Anak a te lapu ne mig-ugpe kayi te inged niyu. Sabeka a ne Amalikanen.” 14 Ne mig-insaan e man‑e sikandin ni Dabid, “Mania te ware ka naaldek ne eggimatey te in-alam te Magbebaye ne Manama?” 15 Ne in-umew e ni Dabid ka sabeka te me sundalu rin wey ingkahiyan, “Himatayi nu sikandin!” Purisu intibbas en iya te sundalu rin ka Amalikanen wey migpatey e. 16 Ne migkahi si Dabid, “Sikeykew red ka egkasenditan te kamatayen nu su sikeykew mismu ka migpamalehet te pegkeetew nu te pegkahi nu te inggimatayan nu ka in-alam te Magbebaye ne Manama.”
Ka ulahingen ni Dabid te peglungku
17 Ne miggimu si Dabid te ulahingen te peglungku meyitenged ki Saul wey te anak din ne si Diyunatan, 18 ✡ Huswi 10:13.ne migsuhu sikandin ne igpanulu seini te keet-etawan te Huda. Ne ingngaranan seini te Ulahingen te Pane, wey nasulat diye te Libru ni Yasar. Miggenendue seini,
19 “He Israil, due mismu te me bubungan nu pangimatayi
ka me talahuren ne me pangulu nu!
Ne nammatey degma ka me bahani!
20 Kene nu ipanengneng diye te Gat
wey kene nu ipangguhud seini diye te deralanen te Askilun.
Su kema ke egpanletu-letu te kahale ka me mengebay ne me Pilistihanen
wey ka me malitan ne anak te me etew ne ware migpalintutuu te Manama!
21 “Sikaniyu se me bubungan te Gilbuwa,
warad e uran wey demmug due te kaniyu,
wey warad e egkahaani ne trigu ne ighalad puun te me kamet due te kaniyu!
Su diye nalinditi ka kalasag te bahani ne etew ne si Saul
wey kenad e egsilak ke egbaluhuwan te lana.
22 Migpanalu si Saul wey si Diyunatan te gira
pinaahi te kampilan dan wey pane.
Masulug ka mabbantug ne me kuntere dan
ne impangimatayan dan.
23 “Amana ne mateles si Saul wey si Diyunatan wey inggeyinawaan sikandan te me etew te manekal pad sikandan,
wey migpeunungey sikandan se daruwa taman te kamatayen.
Meiyal pad sikandan te me agila ne egpawaheswes
wey mannekal pad sikandan te me liyun.
24 “Me malitan te Israil,
sinehawi niyu si Saul ne iyan migsaluub kaniyu te mahal ne kumbale* Malalab ka batek te kumbale. wey mateles amana,
wey ka migtahu kaniyu te me dayan-dayan ne me bulawan.
25 “Nenaggule ka me bahani diye te giraanan.
Ne namatey si Diyunatan diye te me bubungan niyu.
26 “Amana a miglungku keykew, suled Diyunatan,
amana ka ne meupiya keddi!
Indakelan a nikeykew te geyinawa,
ne subla pad te peggeyinawa te me malitan.
27 “Naggule ka me bahani,
wey nareetan ka me panganiban dan te peggira!”