1 Nekeuli si Hihusapat te baley rin diye te Hirusalim ne ware namenu. 2 Ne insinug-ung sikandin ni prupita Hihu ne anak ni Hanani wey migkahiyan, “Mania te migbulihan nu wey inggeyinawaan nu ka miggimu te mareet wey ingkalangeti te Magbebaye ne Manama? Nabelu ka Magbebaye keykew. 3 Piru duen ded meupiya ne neyimu nu su impangguhus nu ma ka me sungkaleg ne larawan te diyus-diyus ne si Asira, wey migpakannekal ka migpangananey te Manama.”

4 Diye mig-ugpe si Hihusapat te Hirusalim, piru impamayaan din ka Birsiba taman diye te bubungan te Ipraim wey impalibed din ka keet-etawan diye te Magbebaye, ka Manama te me kaap-apuan dan. 5 Due in-alam din ne me talewukum te langun ne tane wey diye te me siyudad te Huda ne in-alad te matikang wey makepal ne batu. 6 Impanpanayan din sikandan te miggenendue, “Sumsumana niyu ay-ayari te kene kew pad eggukum su ka peggukum niyu kene ne para te etew, ke kene, para te Manama, wey egduma sikandin te peggukum niyu. 7 Purisu, kaaldeki niyu ka Magbebaye wey tanud-tanud kew te himu niyu su kene sikandin egkeupian ne egbaliyungen niyu ka eleg ne peggukum wey ke duen naa eglapihan niyu wey ke egdawat kew naa te sagpeng te be‑be.”

8 Ne mig-alam degma si Hihusapat te me Libita diye te Hirusalim, me talagpanubad wey me pangulu te pamilya te me matig-Israil eyew iyan eggusey te nakasupak te Balaud te Magbebaye wey te me apulanan. Diye sikandan mig-ugpe te Hirusalim. 9 Seini ka insuhu kandan: “Keilangan ne egpamakey kew te Magbebaye te intiru ne pusung niyu ne due pegkaaldek, wey pegkamatinumanen. 10 Ke due kasu ne igpewusey kaniyu te me karumaan niyu ne mig-ugpe diye te me siyudad dan—kasu meyitenged te peggimatey, pegsupak te balaud wey ke me suhu naa wey ke me tulumanen—keilangan ne egpanpanayan niyu sikandan ne kene eggimu te mareet diye te tangkaan te Manama su eyew kene sikandan egpakasalerep te langet din, wey sikaniyu degma. Sika himuwa niyu eyew kene kew egpakasale. 11 Emun ke due eggusayen niyu ne nakasupak te Balaud te Magbebaye ne kene niyu egkewusey, si Amariyas ne Labew ne Talagpanubad ka eggusey due. Ne emun ke due eggusayen niyu ne meyitenged te Hari ne kene niyu egkewusey, si Sibadiyas ne anak ni Ismail ne pangulu te me kabuhalan ni Huda ka eggusey due. Ne egbulig kaniyu ka me Libita isip me upisyalis niyu. Pakannekal kew ne eggimu te me katungdanan niyu, wey egdumaan kew te Magbebaye ka eggimu te meupiya.”