1 Nataman, inlusuran si Hihusapat te me Muwabihanen, me Amunihanen wey te duma ne me Miyunihanen. 2 Due me etew ne miggendiye ki Hihusapat wey migkahi, “Amana ne masulug ka me sundalu ne eglusud keykew ne egpuun te inged ne Idum diye te talipag te Namatey ne Dahat. Diyad e sikandan te Asasuntamar.” (Lein ne ngaran te In-Gidi ka Asasuntamar.) 3 Ne naaldek si Hihusapat wey migpangananey sikandin te Magbebaye. Ne migsuhu sikandin ne kene egkeen ka langun ne etew te intiru ne Huda. 4 Ne miglibulung diye te Hirusalim ka keet-etawan ne egpuun te langun ne me siyudad te Huda eyew egpangananey te Magbebaye.

5 Ne migsasindeg si Hihusapat diye te tangkaan te keet-etawan te Huda wey te Hirusalim diye te tangkaan te iyam ne lama te timplu te Magbebaye. 6 Ne migkahi sikandin, “He Magbebaye, ne Manama te kaap-apuan ney, Manama ka ne diye te langit. Sikeykew ka migmandu te langun ne migharian te kalibutan. Maresen ka amana wey ware egpakasukul keykew. 7  ✡ Isa 41:8; San 2:23.He Manama ney, impaawe nu ka nangugpe te seini ne inged eyew iyan e egpakakamuney ka keet-etawan nu ne me matig-Israil. Ka seini ne inged, imbehey nu te me kabuhalan ni Abraham ne alukuy nu wey kandan e te ware egtamanan. 8 Mig-ugpe e sikandan kayi wey impasasindehan e te timplu eyew te pegbantug te ngaran nu. Ne migkahi sikandan, 9 ‘Ke due egginguma kanami ne karereetan, gira, peggukum, pegpeyimmimatayey wey ke gutas naa, eggendini key re te seini ne timplu su kayi ma ka katelesan nu. Egpangananey key keykew te timpu te egkeyirapan key wey egtabaken key nikeykew, wey egpangabangan.’

10  ✡ Diy 2:4-19.“Ne kuntee nakita nu ka me matig-Amun, ka me matig-Muwab, wey ka me mahinged te Bubungan ne Siir ne ware nu palusuri te me matig-Israil te pegpuun dan pad te Ihiptu; ka me etew ne inliharan dan de wey ware dan pangimatayi. 11 Piru kuntee, iyan dan de igbales ka eglusud eyew egkadeldel key te tane ne imbehey nu kanami isip karatuan ne inggaat para kanami. 12 He Manama ney, kene nu bes sikandan eglegparan? Ware igpakasukul ney te susuluhi ne me sundalu ne eglusud kanami. Ware key nakanengneng ke nekey ka eggimuwen ney, piru egsalig key keykew.”

13 Taheed te migsasindeg ka langun ne lukes te Huda duma te dereisek ne me bate, te me asawa ran wey te me anak dan, 14 in-umaan te Panisingan te Magbebaye si Hahasil ne migsasindeg duma kandan. Si Hahasil anak ni Sakariyas. Si Sakariyas anak ni Binaya. Si Binaya anak ni Hiil. Ne si Hiil anak ni Mataniya ne Libita ne kabuhalan ni Asap. 15  ✡ Diy 20:1-4.Ne migkahi sikandin, “Pammineg kew se nangugpe te Huda wey te Hirusalim wey sikeykew degma Hari Hihusapat. Seini ka inlalag te Magbebaye kaniyu, ‘Kene kew kaaldek wey ke kaawei naa te kabagget tenged te susuluhi ne me sundalu, su ka Manama ka egpakiggira, kene ne sikaniyu. 16 Kaaselem, tupangi niyu sikandan te eglusud. Egkakita niyu sikandan ne egtakereg te Sis diye te ilis te napu dapit te igsile te disirtu te Hiruwil. 17  ✡ Iks 14:13-14.Kenad ne sikaniyu pad ka egpakiggira kandan. Andama niyu ka pegkeetew niyu wey pitawa niyu ka eggimuwen te Magbebaye ne egpangabang kaniyu. Kene kew kaawei te kabagget, me matig-Huda wey me matig-Hirusalim. Hendiyei niyu sikandan kaaselem wey egdumaan kew te Magbebaye.’ ”

18 Ne miglangkeb diye te tangkaan te Magbebaye ne Manama si Hihusapat wey ka langun ne matig-Huda wey me matig-Hirusalim eyew te pegdayan kandin. 19 Ne migsasindeg ka me Libita ne egpuun te kabuhalan ni Kuhat wey ni Kura eyew egdayan te heemeni ne laheng diye te Magbebaye, ka Manama te Israil.

20 Te maselem-selem pad, miggendiyad e ensi Hihusapat te disirtu diye te Tikuwa. Taheed te nangipanew sikandan, migsanggel si Hihusapat wey migkahi, “Pammineha a nikaniyu, me matig-Huda wey me matig-Hirusalim! Palintutuu kew te Magbebaye, ne Manama niyu, wey egkalig‑en kew. Palintutuu kew te me prupita rin wey egpanalu kew.” 21 Pegkapenga rin te eglalag te me etew, mig-alam e sikandin te me mangngulahing ne eggun‑a kandan ne eg-ulahing te pegdayan te Magbebaye tenged te matulus ne katelesan din. Ne seini ka in-ulahing dan, “Egpasalamatan ta ka Magbebaye tenged te geyinawa rin ne kene egkabalbalawan.”

22 Te migbunsud e sikandan ka mig-ulahing te pegdayan, impeg-uney e te Magbebaye ka me sundalu te me matig-Muwab, me matig-Amun, wey me mahinged te Bubungan ne Siir ne eglusud perem te Huda, sikan naa ka nahule sikandan. 23 Inlusuran te me sundalu te matig-Amun wey te matig-Muwab ka me mahinged te Bubungan ne Siir wey naamin dan sikandan te eggimatey. Te naamin dan e sikandan te eggimatey, sikandan e degma ka migpeyimmimatayey. 24 Te pegginguma te me sundalu te Huda diye te puntul te bubungan diye te disirtu, napantew ran ka nammatey ne me kuntere ne nekeyibat de te tane. Ne ware sabeka ne nakapallahuy.

25 Purisu, miggendiye ensi Hihusapat eyew egpanguwa te susuluhi ne me kasangkapan, egkengakeen, igsaluub wey duma pad ne mahal ne kasangkapan wey nakita ran ne susuluhi ka me ayam dan. Migtatelu ne aldew sikandan ka eglaglag tenged te kasulug te me kasangkapan. 26 Te igkeep‑at e ne aldew, miglibulung sikandan diye te napu ne egngaranan te Biraka wey migdayan sikandan te Magbebaye diye. Seeye ka egpuunan ne ingngaranan seeye te napu te Biraka* Te Hibruwanen ne linalahan, ‘Panalangin’ ka igpasabut te lalag ne ‘Biraka’. taman kuntee. 27 Ne mig-uli e sikandan langun diye te Hirusalim ne impanguluwan ni Hihusapat. Nahale-gale amana sikandan su impepanalu ma sikandan te Magbebaye te me kuntere dan. 28 Te pegginguma ran diye te Hirusalim, migleus e sikandan diye te timplu te Magbebaye wey migparahing sikandan te me alpa, lira wey me trumpita. 29 Naaldek ka langun ne nakalingut ne migharian te pegkarineg dan te pegpakig-ehet te Magbebaye te me kuntere te Israil. 30 Purisu due keupianan te migharian ni Hihusapat su ware ma ipasamuk sikandan te Magbebaye te me kuntere dan.

31 Sika ka guhuren te peghari ni Hihusapat te Huda. Migbunsud sikandin mighari te tatelu ne pulu wey lalimma (35) ka idad din. Mighari sikandin diye te Hirusalim te daruwa ne pulu wey lalimma (25) ne leg‑un. Si Asuba ne anak ni Silhi ka iney rin. 32 In-ikul ni Hihusapat ka inggimu te Amey rin ne si Asa, inggimu rin ka meupiya diye te tangkaan te Magbebaye. 33 Piru ware naawe ka me panubaran diye te me bubungan, wey kene ne mapahetpet ka me etew te pegpamakey ran te Manama te kaap-apuan dan.

34 Ka duma pad ne guhuren te peghari ni Hihusapat, puun te an-anayan taman te katammanan, nasulat diye te Sinulat ni Hihu ne anak ni Hanani ne nalagkes diye te Sulatanan te me Guhuren te me Hari te Israil.

35 Te katammanan, migpakigsabeka si Hihusapat ne Hari te Huda ki Ahasiyas ne Hari te Israil ne mareet se hinimuwan. 36 Migpasabutey sikandan ne egpangimu te me barku ne igpeendiye te Tarsis, wey diye dan seini himuwa te Isiyun-Gibir. 37 Ne ingkahiyan si Hihusapat ni prupita Ilisir ne anak ni Dudabahu ne matig-Marisa, “Tenged te migpakigsabeka ke ma ki Ahasiyas, egguhusen te Magbebaye ka impangimu niyu ne me barku.” Purisu, nagguhus iya ka me barku wey kenad e egpekeendiye te Tarsis.