1 Si Ahasiyas ne kinaariyan ne anak ni Hihuram iyan inggimu te me matig-Hirusalim ne Hari dan. Su ka duma ne me anak ni Hihuram, impangimatayan ma te me matig-Arabya te peglusud dan te Huda. Purisu, mighari te Huda si Ahasiyas ne anak ni Hihuram. 2 Daruwa ne pulu wey daruwa (22) ka idad ni Ahasiyas te neyimu sikandin ne Hari, wey mighari sikandin diye te Hirusalim te sabeka ne leg‑un. Si Ataliya ne apu ni Umri ka iney rin. 3 Mig-ikul red sikandin te me hinimuwan te pamilya ni Ahab su impanulu ma sikandin te iney rin te peggimu te mareet. 4 Mareet ka hinimuwan ni Ahasiyas diye te tangkaan te Magbebaye ne Manama iling te me hinimuwan te pamilya ni Ahab. Su te pegpatey te amey rin, iyan neyimu ne me talagtambag din ka me karumaan ni Ahab ne iyan egpuunan ne migsahap sikandin. 5 In-ikul rin ka intambag dan kandin wey migduma sikandin ki Huram ne anak ni Ahab ne Hari te Israil eyew egpakiggira ki Hasail ne Hari te Sirya* Te Hibruwanen: Aram ka lein ne ngaran te Sirya. diye te Ramut-Gilyad ne diye napalii si Huram. 6 Purisu, miglibed e sikandin diye te Hisril eyew egpeuli te pali din. Ne miggendiye te Hisril ka Hari te Huda ne si Ahasiyas ne anak ni Hihuram eyew egleuy kandin.

7 Ka peggendiye ni Ahasiyas ki Huram ka egpuunan ne migsahap sikandin.

Te pegginguma ni Ahasiyas diye te Hisril, migduma sikandin ki Huram eyew te pegsinug-ung ki Hihu ne anak ni Nimsi, ne in-alam te Magbebaye ne egdereet te pamilya ni Ahab. 8 Ne taheed te pegdereet ni Hihu te pamilya ni Ahab, due nakita rin ne me upisyal te Huda wey me anak te me karumaan ni Ahasiyas ne migduma ki Ahasiyas. Ne impangimatayan din degma sikandan amina. 9 Ne impamitew te me sakup ni Hihu si Ahasiyas, wey nakita ran sikandin ne miggeles diye te siyudad te Samarya. In-uyan dan sikandin diye ki Hihu wey inggimatayan. Insabal ran si Ahasiyas tenged te pegtahud dan ki Hihusapat. Migkahi sikandan, “Apu sikandin ni Hihusapat, ka etew ne migpangananey te Magbebaye te intiru ne pusung din.” Ne ware iya minsan sabeka ne sakup te pamilya ni Ahasiyas ne eleg ne eghari.

10 Te pegkanengnengi te iney ni Ahasiyas ne si Ataliya te napatey e ka anak din, inggule din e ka langun ne pamilya te Hari te Huda. 11 Piru intakew mule ni Hihusaba ne malitan ne anak te Hari, si Huwas ne anak ni Ahasiyas, puun te duma pad ne anak te Hari ne egpangimatayan. Ne inggeles e ni Hihusaba si Huwas diye te sinabeng te timplu duma te suluhuanen ne talagtanggu kandin, purisu ware sikandin nakalagkes ni Ataliya te eggimatey. Atebey ni Ahasiyas si Hihusaba wey me anak sikandan ni Hari Huram. Ne si Hihusaba asawa ni Hihuyada ne talagpanubad. 12 Ne inggeles dan si Huwas taman te hen‑em ne leg‑un diye te timplu te Manama, taheed te si Ataliya ka migmandu isip rayna te intiru ne Huda.