1 Te igkapitu ne leg‑un ne peggeles ki Huwas ne anak ni Asariyas, miglehet-lehet si Hihuyada ne egpakigsabut te lalimma ne me kumandir te ginatus ne me sundalu ne ensi: Asariyas ne anak ni Hiruham, Ismail ne anak ni Diyuhanan, Asariyas ne anak ni Ubid, Maasiyas ne anak ni Adayas, wey si Ilisapat ne anak ni Sikri. 2 Ka seini se lalimma ne me kumandir, miggeles-heles miggendiye te langun ne me siyudad te Huda wey ingginggat dan ka me Libita, wey ka me pangulu te me pamilya ne eggendiye te Hirusalim.

3  ✡ 2Sam 7:12.Ne miglibulung sikandan langun diye te timplu te Manama, wey miggimu sikandan te kasabutan duma ki Huwas, ka bate pad ne Hari. Ne migkahiyan sikandan ni Hihuyada, “Seinid e ka timpu ne eghari e ka anak te Hari su migsaad ka Magbebaye ne Manama ne layun eghari ka kabuhalan ni Dabid. 4 Ne seini naa himuwa niyu: Ke eggendini ka me talagpanubad wey me Libita, te Aldew te Peggimeley eyew eggimu te me himu ran, baara niyu sikandan te tatelu ne punduk. Ka sabeka ne punduk ka egbantey te gumawan, 5 ka igkarangeb ne punduk ka egbantey diye te palasyu te Hari, wey ka igkatelu ne punduk ka egbantey diye te gumawan ne egngaranan te Pabunsuranan. Ne eglibulung ka langun ne etew diye te lama te timplu te Magbebaye. 6 Ware duma ne egpakaseled te timplu te Magbebaye angin e te seeye se me talagpanubad wey me Libita ne eggimu te me himu te sika ne timpu su in-isip ma sikandan ne malinis. Piru ka duma ne etew keilangan ne egtuman te suhu te Magbebaye. 7 Keilangan ne egbantayan te me Libita ka Hari, wey keilangan ne layun andam ka me panganiban dan. Ne ka minsan hentew ne egseled ne kene ne talagpanubad wey ke Libita naa, keilangan ne eggimatayan. Ne egdumdumaan dan ka Hari minsan hendei sikandin eggendiye.”

8 Ne intuman te me Libita wey me matig-Huda ka langun ne imbanasal ni Hihuyada ne talagpanubad. Ne inlibulung dan e ka me etew ran ne eggimu te eggimuwen te Aldew te Peggimeley wey ka langun ne due katenged te sika ne aldew. Su ware ma peulia ni Hihuyada ka imbaad-baad ne me Libita. 9 Ne impamehey e ni Hihuyada te me upisyal te ginatus ne me sundalu ka me deldeg wey ka me kalasag ne ki Hari Dabid dengan ne intines diye te timplu te Manama. 10 Ne impasasindeg din e ka langun ne etew ne nakaandam se me panganiban eyew te pegbantey te Hari. Migmanasindeg sikandan puun te igkakawanan ne balabahan taman te igkahibang ne balabahan ne miglingut te timplu wey altar. 11 Ne impalihawang e ni Hihuyada wey te me anak din si Huwas ne anak te Hari. Ne in-itisan din e te lana ka ulu rin wey ingkurunaan wey imbehayan din e degma te insulat ne me balaud te pegkahari wey impanengneng dan e ne Hari. Ne migpanguleyi e ka me etew ka egbantug te Hari.

12 Te pegkarineg ni Ataliya te kahulub te me etew ne migpamallahuy wey migmanguleyi te pegdayan te Hari, miggendiye sikandin te timplu te Magbebaye. 13 Te pegginguma rin diye, nakita rin e ka Hari ne migsasindeg diye te lenged te sungkaleg ne egsasindehan te me Hari ne diye te gumawan te timplu. Ne nakita rin ne inlingutan ka Hari te me kumandir wey te me talagparahing te trumpita. Ne miggale-gale wey migparahing te me trumpita ka keet-etawan te intiru ne Huda. Ne ka me mangngulahing ne migparahing te me instrumintu ran, iyan migpangulu te keet-etawan te peggale-gale. Te pegkakita ni Ataliya dutu, inggisi din e ka insaluub din wey migpanguleyi sikandin ne migkahi, “Me akalen! Me akalen!”

14 Ne insuhu ni Hihuyada ne talagpanubad ka me pangulu te me sundalu te migkahi, “Ipalihawang niyu si Ataliya te timplu wey uyana niyu diye te me sundalu ne migbantey diye te lihawangan. Himatayi niyu sikandin diye wey kene ne kayi te seled te timplu te Magbebaye. Ne ilagkes niyu te eggimatey ka minsan hentew ne egpangabang kandin.”

15 Purisu indakep dan e si Ataliya wey in-uyan dan e diye te gumawan ne egbayaan te me kudde ne egseled te lama te palasyu te Hari, wey diye dan himatayi sikandin.

16 Ne miggimu si Hihuyada te kasabutan duma te keet-etawan wey te Hari ne egpamakey sikandan te Magbebaye ne Manama isip me keet-etawan din. 17 Ne miggendiye te timplu ni Baal ka langun ne etew wey ingguhus dan e seini. Inlupet dan ka me altar, ka me larawan din, wey inggimatayan dan ka talagpanubad ni Baal ne si Matan diye te tangkaan te me altar. 18 Ne impiyal e ni Hihuyada te me talagpanubad wey me Libita ka timplu te Magbebaye ne Manama. Ne eggimuwen dan ka me katungdanan dan ne inteil kandan dengan ni Dabid, wey egmanubad sikandan te igmanubad ne egtutungen diye te Magbebaye ne Manama sumale te nasulat te Balaud ni Muwisis. Ne sikandan degma ka impiyalan te peg-ulahing wey peggale-gale. 19 Ne migtahu man‑e sikandin te talagbantey te gumawan te timplu te Magbebaye eyew kene egpakaseled seeye se in-isip ne malindit.

20 Ne inlibulung din ka langun ne pangulu te ginatus ne me sundalu, ka me talahuren ne me etew, ka me pangulu te keet-etawan wey ka langun ne keet-etawan te Huda. Ne indulung dan e ka Hari puun te timplu taman te palasyu. Diye sikandan migbaye te gumawan ne diye te igkahibang ne balabahan. Ne impapinnuu ran e ka Hari te trunu rin. 21 Purisu miggale-gale ka langun ne keet-etawan te Huda su warad ma samuk te siyudad te neyimatayan e si Ataliya.