1 Te neimpusan e ka sahakeen, miggendiyad e te me siyudad te Huda ka me matig-Israil ne mig-apil te sahakeen. Ne impanlupet dan e ka matulus ne me batu wey impanempug dan ka me sungkaleg ne larawan ni Asira. Impangguhus dan ka me panubaran diye te me bubungan wey ka me altar te intiru ne Huda, te Binhamin, te Ipraim, wey te Manasis. Te neimpusan dan e te egdereet ka langun, mig-uli e sikandan diye te me siyudad dan, diye te tane dan.

2 Ne impapunduk-punduk ni Hari Isikiyas ka me talagpanubad wey ka me Libita sumale te me himu ran. Ne iyan himu te me talagpanubad wey te me Libita ka egpanubad te egtutungen, egpanubad para te keupianan diye te Magbebaye ne Manama, egpamakey te timplu te Magbebaye, egpasalamat wey egdayan. 3  ✡ Num 28:1–29:39.Migbehey man‑e si Hari Isikiyas te duma ne me ayam din para igpanubad ne egtutungen: ka igpanubad ne egtutungen te maselem wey te marusilem, te Aldew te Peggimeley, te Sahakeen te Pegbunsud te Iyam ne me Bulan, wey te duma pad ne in-alam ne me sahakeen, sumale te nasulat te Balaud te Magbebaye.

4  ✡ Num 18:12-13,21.Ne insuhu din man‑e ka matig-Israil ne igbehey ka baad te me talagpanubad wey te me Libita puun te impanubad eyew ware lein ne eggimuwen dan ke kene ka pegtuman naan de te Balaud te Magbebaye. 5 Te ingkapanengneng e seini diye te me etew, nahale-gale ne migbehey ka me matig-Israil te langun ne igkasapulu dan lagkes ka tetelesi te trigu ran, te binu, te lana, te teneb wey duma pad ne egkahaani ran diye te kamet. Imbehey ran ka langun ne igkasapulu te langun ne mig-uma te pinamula ran. 6 Ne ka me matig-Israil ne miggalin diye te me siyudad te Huda, wey ka matig-Huda, migbehey degma te igkasapulu te me baka ran, te me karniru, te me kasangkapan ne inhalad dan wey imbehey diye te Magbebaye ne Manama ran, wey inlimud dan seini. 7 Migbunsud sikandan miglilimud te igkatatelu ne bulan wey neimpusan dan te eglimud te igkapitu ne bulan. 8 Te nakita ni Isikiyas wey te me upisyal rin ka nalimud ne me halad, indeyrey ran e ka Magbebaye wey impanalanginan dan ka keet-etawan din ne me matig-Israil. 9 Ne mig-insaan e ni Hari Isikiyas ka me talagpanubad wey ka me Libita meyitenged te nalimud ne me halad. 10 Ne migtabak si Asariyas ka Labew ne Talagpanubad ne kabuhalan ni Saduk ne miggenendue, “Dakel ka egkakeen ney puun te migbunsud e mig-uyan ka me etew te me halad dan diye te timplu te Magbebaye su impanalanginan te Magbebaye ka keet-etawan din. Ne dakel pad ka nasame te imbehey ran.”

11 Ne migsuhu si Hari Isikiyas ne ig-andam ka me sinabeng diye te timplu te Magbebaye, wey in-andam dan e seini. 12 Ne matinumanen ka me etew ne mig-uyan te me halad, te me igkasapulu, wey te me dasag dan para te timplu. Ne iyan impabantey te sika langun si Kunaniyas ne Libita wey ka talagbulig kandin iyan si Simii ne suled din. 13 Ne migbulig degma kandan isip talagbantey si Hihiil, si Asasiyas, si Nahat, si Asahil, si Hirimut, si Husabad, si Iliil, si Ismakiyas, si Mahat, wey si Binaya. In-alam sikandan ni Hari Isikiyas, wey ni Asariyas, ka upisyal ne impiyalan te timplu te Manama.

14 Ne si Kuri ne anak ni Imna ne Libita ne talagtameng te gumawan te timplu ne diye te igsile, iyan impiyalan te me dasag ne inhalad diye te Manama, wey te pegbaad-baad kayi. 15 Ne ka matinumanen ne migbulig kandin iyan si Idin, si Miniyamin, si Hiswa, si Simayas, si Amariyas, wey si Sikiniyas. Migmangendiye sikandan te me lungsud ne in-ugpaan te me talagpanubad, wey imbaad-baad dan kandan ka me dasag sumale te punduk dan wey katungdanan, te bate-bate pad wey te me buyag e. 16 Imbaaran dan degma ka mig-idad te tatelu ne leg‑un wey subla, ne nalista te listaan te me kabuhalan ne egseled te timplu te Magbebaye eyew eggimu te inaldew-aldew ne himu ran sumale te katungdanan dan wey te punduk dan. 17 Impamehayan dan degma ka me talagpanubad ne nalista te me pangulu te kabuhalan wey ka me Libita ne mig-idad te daruwa ne pulu (20) wey subla sumale te katungdanan dan wey te punduk dan. 18 Impamehayan degma ka me pamilya te me talagpanubad: ka me asawa ran, me anak dan wey ka dereisek pad ne anak dan ne nalista te listaan te me kabuhalan su matinumanen ma sikandan ne miglinis te pegkeetew ran. 19 Ne due me etew ne impiyalan ne egpandulung te me baad te me talagpanubad ne kabuhalan ni Aarun ne diye mig-ugpe te me kamet ne nakalingut te siyudad dan, wey impamehayan dan degma ka langun ne Libita ne nalista.

20 Seeye ka inggimu ni Hari Isikiyas te intiru ne Huda. Inggimu rin ka meupiya wey eleg wey migmatinumanen sikandin diye te tangkaan te Magbebaye ne Manama rin. 21 Neyimu rin ka langun ne eggimuwen din diye te timplu te Manama wey neikul rin ka Balaud, su migsalig ma sikandin te Manama te intiru ne pusung din.