1 “Te an-anayan ne aldew te igkapitu ne bulan, libulung kew eyew te pegsimba te Magbebaye ne Manama, wey parahing kew te me trumpita. Ne kene kew trabahu te sika ne aldew. 2 Ne seini ka egtutungen niyu ne igmanubad: sabeka ne turu ne nati te baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi wey ware nenabalbalangi. Ne ka lansi due ka igkeemuti te Magbebaye. 3 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka sabeka ne turu ne nati te baka, patapiki niyu te tatelu ne kilu, wey ka lukesan ne karniru, patapiki niyu te daruwa ne kilu, 4 wey ka tagse sabeka te pitu ne lukesan ne nati te karniru, patapiki niyu te tigsenge-kilu. 5 Ne lagkes kew man‑e panubad te sabeka ne lukesan ne kambing isip igpalangesa eyew te peglinis te sale. 6 Ne ka sika ne igpanubad, ware labet te tagse bulan wey inaldew-aldew ne igmanubad niyu ne egmatapikan te ighalad ne binu wey egkakeen ne egpuun te egketuen ne pinamula sumale te suhu. Igmanubad sika ne egtutungen, wey ka lansi due ka igkeemuti te Magbebaye.”

7  ✡ Lib 16:29-34.“Te igkasapulu (10) ne aldew te igkapitu ne bulan, libulung kew e man‑e eyew te pegsimba te Magbebaye; puasa kew wey kene kew trabahu te sika ne aldew. 8 Piru tutung kew te igmanubad niyu ne sabeka ne turu ne nati te baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi wey ware nenabalbalangi. Ne ka lansi due ka igkeemuti te Magbebaye. 9 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka sabeka ne turu ne nati te baka, patapiki niyu te tatelu ne kilu, wey ka lukesan ne karniru, patapiki niyu te daruwa ne kilu, 10 wey ka tagse sabeka te pitu ne lukesan ne nati te karniru, patapiki niyu te tigsenge-kilu. 11 Ne lagkes kew man‑e panubad te sabeka ne lukesan ne kambing isip igpalangesa ne ig-awe te sale; ware pad labet due ka igpanubad ne igpalangesa wey ka inaldew-aldew ne igmanubad niyu ne egmatapikan te ighalad ne binu wey egkakeen ne egpuun te egketuen ne pinamula.”

12  ✡ Lib 23:34; Diy 16:13-15.“Te igkasapulu wey lalimma (15) ne aldew te sikan ded man‑e ne bulan, libulung kew e man‑e eyew te pegsimba te Magbebaye, wey kene kew trabahu te sika ne aldew. Ne sahakeen kew te pitu ne aldew, para te Magbebaye. 13 Ne panubad kew te egtutungen: sapulu wey tatelu (13) ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi ne ware nenabalbalangi. Ne ka lansi due ka igkeemuti te Magbebaye. 14 Ne ka sika ne igmanubad, patapiki niyu te meupiya ne klasi te harina ne linuyang te mentika. Ka tagse sabeka te sapulu wey tatelu (13) ne turu ne baka, patapiki niyu te tigtatelu ne kilu, wey ka tagse sabeka te daruwa ne lukesan ne karniru, patapiki niyu te tigdaruwa ne kilu, 15 wey ka tagse sabeka te sapulu wey hep‑at (14) ne nati te karniru, patapiki niyu te tigsenge-kilu. 16 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te ighalad ne binu wey egkakeen ne egpuun te egketuen ne pinamula.

17 “Te igkarangeb ne aldew te Sahakeen, seini ipanubad niyu: sapulu wey daruwa (12) ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi wey ware nenabalbalangi. 18 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 19 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te ighalad ne binu wey egkakeen ne egpuun te egketuen ne pinamula.

20 “Te igkatatelu ne aldew te Sahakeen, panubad kew te sapulu wey sabeka (11) ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi wey ware nenabalbalangi. 21 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 22 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

23 “Te igkeep‑at ne aldew te Sahakeen, panubad kew te sapulu (10) ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi wey ware nenabalbalangi. 24 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 25 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

26 “Te igkalimma ne aldew te Sahakeen, panubad kew te siyam ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi ne ware nenabalbalangi. 27 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 28 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

29 “Te igkeen‑em ne aldew te Sahakeen, panubad kew te walu ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi wey ware nenabalbalangi. 30 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 31 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

32 “Te igkapitu ne aldew te Sahakeen, panubad kew te pitu ne turu ne nati te baka, daruwa ne lukesan ne karniru, wey sapulu wey hep‑at (14) ne lukesan ne nati te karniru ne tigsabeka ne leg‑un se kabuyahi wey ware nenabalbalangi. 33 Ne ka tagse sabeka te me turu ne baka, te lukesan ne karniru, wey te me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 34 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

35 “Te igkawalu ne aldew te Sahakeen, libulung kew e man‑e eyew te pegdayan te Magbebaye ne Manama. Ne kene kew trabahu te sika ne aldew. 36 Piru tutung kew te igmanubad niyu diye te Magbebaye te sabeka ne turu ne baka, sabeka ne lukesan ne karniru, wey pitu ne lukesan ne nati te karniru ne tigsabeka ne leg‑un se kabuyahi wey ware nenabalbalangi. Ne ka lansi due ka igkeemuti te Magbebaye. 37 Ne ka turu ne baka, ka lukesan ne karniru, wey ka me nati te karniru, patapiki niyu te me halad ne binu wey egkakeen ne egpuun te egketuen ne pinamula sumale te suhu. 38 Ne lagkes kew man‑e panubad te sabeka ne lukesan ne kambing isip panubad ne ig-awe te sale, ware pad labet due ka inaldew-aldew ne igmanubad niyu ne egmatapikan te halad ne binu wey egkakeen ne egpuun te egketuen ne pinamula.

39 “Keilangan ne igmanubad niyu ka sika langun diye te Magbebaye te inteil ne timpu te me Sahakeen. Ne ware pad labet te igmanubad niyu te pegtuman te panaad niyu, wey te duma pad ne dasag ne igmamehey niyu re due, wey te egtutungen ne igmanubad, me halad ne binu wey egkakeen ne egpuun te egketuen ne pinamula, wey te me halad para te meupiya ne rilasyun diye te Magbebaye.”

40 Purisu ingguhuran e ni Muwisis ka me kabuhalan ni Israil te langun sumale te insuhu kandin te Magbebaye.