1 Te igkasapulu e wey walu (18) ne leg‑un te peghari ni Hari Hihusapat diye te inged te Huda, neyimu e ne Hari diye te Israil ka anak ni Ahab ne si Huram wey diye te Samarya ka ugpaan din te mighari. Ne mighari si Huram te sapulu wey daruwa (12) ne leg‑un diye te Samarya. 2 Mareet ka hinimuwan din diye te tangkaan te Magbebaye ne Manama, piru kene de ne iling kareet te hinimuwan te amey rin ne si Hari Ahab wey te iney rin ne si Rayna Hisibil, su ingguhus din ma mule ka me sungkaleg te diyus-diyus ne si Baal ne inggimu te amey wey iney rin. 3 Piru minsan pad due, in-ilingan din iya ka mareet ne hinimuwan ni Hirubuwam ne anak ni Nibat, ne iyan e egpuunan ne nakasale ka me matig-Israil. Ne ware iya sikandin mig-engked te mareet ne hinimuwan din. 4 Ne ka Hari te Muwab ne si Misa, talagpaahad te karniru. Ne tagse leg‑un, egpeuyanan din ka Hari te Israil te sabeka ne hatus ne libu (100,000) ne nati te karniru, wey te bulbul te sabeka ne hatus ne libu (100,000) ne lukesan ne karniru. 5 Piru te pegpatey e ni Hari Ahab, migribildi e te Hari te Israil ka Hari te Muwab ne si Misa. 6 Te seeye ne aldew, inlibulung ni Hari Huram ka langun ne sundalu te Israil, wey miglihawang e sikandan diye te Samarya eyew te pegpakiggira. 7 Ne dutu, migpeuyanan din e te lalag ka Hari te Huda ne si Huram te migkahi, “Egpakig-ehet keddi ka Hari te Muwab, egkaayun ded ne egbulihan a nikeykew te pegpakiggira kandin?” Ne migtabak si Hari Hihusapat, “Uya, egduma a keykew, igpahamit ku keykew ka me etew ku wey ka me kudde ku.” 8 Ne mig-inse pad man‑e sikandin, “Hendei ki naa egbaye ka eglusud?”

Migtabak si Huram, “Diye ki egbaye te disirtu ne diye te inged te Idum.”

9 Sikan naa ka migligkat e ka Hari te Israil, ka Hari te Huda, duma te Hari te inged ne Idum. Te pitu e ne aldew sikandan ka migparid ne migpaalingkus, naaminan e sikandan te weyig ne eg-inumen para te me sundalu wey te me ayam dan ne indulanan te me inuyanan dan. 10 Ne migkahi ka Hari te Israil, “Keyey! Sikanta se tatelu ne Hari, hendue te igbehey ki te Magbebaye ne Manama diye te Hari te Muwab.” 11 Piru mig-inse si Hari Hihusapat, “Duen buwa prupita te Magbebaye ne Manama ne egkeinsaan ta kayi ke nekey ka eggimuwen ta?”

Ne due sabeka te upisyal te Hari te Israil ne migtabak, “Duma ta kuntee si Ilisyu, ka anak ni Sapat. Hibateen sikandin dengan ni Ilyas.”

12 Ne migkahi si Hihusapat, “Uya, malehet sikandin ne prupita.” Purisu nangendiye te ki Ilisyu ka Hari te Israil, te Huda, wey ka Hari te inged ne Idum.

13 Ne migkahiyan ni Ilisyu ka Hari te Israil, “Mania te egbulihan ku sikeykew? Diye ka buyu te bulig te me prupita te me manama ne insimba te amey wey iney nu.”

Piru migtabak si Huram ne Hari te Israil, “Kene, su ka Magbebaye ne Manama ka migpeumew kanami te tatelu eyew egkatalu te Hari te Muwab.”

14 Ne migtabak si Ilisyu, “Igpahunlibet ku diye te neuyag ne Amana ne Maresen ne Magbebaye ne impamakey ku. Ke kene ne puun te pegtahud ku ki Hihusapat ne Hari te Huda, kene kud iya eg-el-eliten sikeykew wey minsan te pegsil-ap naan de keykew. 15 Piru uyani a te egkateu ne egpangelit te alpa.”

Te sasangan e ne egpangelit ka talagpangelit te alpa, migleneb e ka geem te Maresen ne Magbebaye diye te ki Ilisyu. 16 Ne migkahi e si Ilisyu, “Seini ka ingkahi te Magbebaye ne Manama, ‘Eggipenuen ku te weyig seini se mammara ne beuhan.’ 17 Su seini ka ingkahi te Magbebaye ne Manama, ‘Ware egkiteen niyu ne uran wey ke egpangalamag naa, piru egkapenu te weyig ka beuhan eyew sikaniyu, ka me baka, wey ka duma pad ne me ayam niyu, egpekeinum te weyig.’ 18 Malemu re amana seini te Magbebaye, igbehey rin degma ka me Muwabihanen kaniyu. 19 Keilangan ne egkatalu niyu ka me siyudad ne in-alad te matikang wey makepal ne batu, wey panempuha niyu ka langun ne mabehas ne kayu wey subunga niyu ka me sebseb te weyig, wey dereeti niyu ka meupiya ne tane dan pinaahi te pegpanabulak te me batu.”

20 Te pegkapawe e, te uras e te pegpanubad, sahuhune ne due miglepew ne weyig ne migtulayas puun diye te inged te Idum taman te duen e weyig minsan hendei.

21 Te pegkarineg te me Muwabihanen te egpakiggira kandan ka tatelu ne Hari, impeumew ran e ka langun ne egpekeeleg e te panganiban, puun de iya te me bate pad peendiye te me buyag eyew te pegpakiggira, wey sikandan ka impasungu te giraanan. 22 Te peggimata ran te maselem, wey te migsilaan e te aldew ka weyig, nakita ran ne migmalalab e ka weyig iling te langesa. 23 Ne migkahi sikandan, “Langesa ma mule seini! Migpeehetey en iya ka me sundalu te tatelu ne Hari wey migpeyimhimatayey e sikandan, kuwa kid e, egpanguen tad ka me kasangkapan dan.”

24 Piru te pegginguma ran e diye te kampu te matig-Israil, migmanasindeg e ka me matig-Israil wey migpakiggira kandan, taman te nakapallahuy e sikandan. Ne inlupug sikandan te me matig-Israil te migpangimatey taman te ugpaan dan. 25 Indereetan dan ka me siyudad, wey ka tagse sabeka kandan migpandegpak te me batu diye te meupiya ne tane taman te nabunbunan e seini. Ne insubung dan man‑e ka me sebseb te weyig wey impameled dan ka me mabehas ne me kayu. Ka Kir-Harisit wey ka alad ne batu naan de kayi ka nasame, piru inlingutan wey inlusuran seini te me sundalu ne nanguyan te lambuyug wey natalu ran e.

26 Te pegkakita te Hari te Muwab ne egkatalu e sikandan, induma rin e ka pitu ne gatus (700) ne me sundalu rin ne kampilan se me panganiban, wey inggeraman dan e te eglusud ka me sundalu ne kuntere dan eyew egpakabaye sikandan peendiye te Hari te Idum, piru ware sikandan nakabaye. 27 Purisu, ingkuwa te Hari ka panganey ne anak din ne lukes ne iyan perem egsubal kandin eghari, wey impanubad din e ne intutung diye te alad te siyudad ne matikang wey makepal. Ne puun dutu, nabelu-belu e ka me matig-Muwab te me matig-Israil, purisu nangawe e diye ka me matig-Israil wey nanguli e diye te inged dan.