1 Te mahaan e egbatuna si Ilyas te Magbebaye ne Manama peendiye te langit ne egpeunturen te balisusu, sasangan ne miggipanew ensi Ilyas ki Ilisyu puun te inged ne Gilgal. 2 Te sasangan e sikandan ka eggipanew, migkahiyan ni Ilyas si Ilisyu, “Kayi ke re, su egpeendiyeen a te Magbebaye ne Manama te Bitil.”

Piru migtabak si Ilisyu ne migkahi, “Mengeyibet te manekal ne Magbebaye ne Manama wey keykew ahalen ku, kene ku iya sikeykew eg-engkeran.” Sikan naa ka migpatupang e sikandan peendiye te Bitil.

3 Ne diye te Bitil, due mig-ugpe ne punduk te me prupita ne miggendiye te ki Ilisyu wey mig-inse, “Nakataha ke naa te kuntee ne aldew, egkuen e te Magbebaye ne Manama ka ahalen nu?”

Ne migtabak si Ilisyu, “Uya nakataha a, piru kene ki re due egwangal-wangal.”

4 Nataman, migkahiyan e man‑e ni Ilyas si Ilisyu, “Kayi ke re, su egpeendiyeen a te Magbebaye ne Manama te Hiriku.”

Piru migtabak si Ilisyu ne migkahi, “Mengeyibet te manekal ne Mabebaye ne Manama wey keykew ahalen ku, kene ku iya sikeykew eg-engkeran.” Sikan naa ka migpabulus e sikandan ka egpeendiye te Hiriku.

5 Ne diye te Hiriku, due mig-ugpe ne punduk te me prupita ne miggendiye te ki Ilisyu wey mig-inse, “Nakataha ke naa te kuntee ne aldew, egkuen e te Magbebaye ne Manama ka ahalen nu?”

Ne migtabak si Ilisyu, “Uya, nakataha a, piru kene ki re due egwangal-wangal.”

6 Nataman migkahiyan e man‑e sikandin ni Ilyas, “Kayi ke re, su egpeendiyeen a te Magbebaye ne Manama te Weyig ne Hurdan.”

Piru migtabak sikandin, “Mengeyibet te manekal ne Mabebaye ne Manama wey keykew ahalen ku, kene ku iya sikeykew eg-engkeran.” Sikan naa ka miggendiyad e sikandan se daruwa. 7 Ne due lalimma ne pulu (50) ne me prupita ne migduma kandan. Ne diye de sikandan migmanasindeg te madmariyu ka egpipitew engki Ilyas wey Ilisyu te migsanggel diye te ilis te Weyig ne Hurdan. 8 Ne inluung ni Ilyas ka ingkukuyumbu din ne hinabel, wey inlulun din seini wey inlampes din te weyig. Ne nabaad e ka weyig te daruwa, wey miglapas e sikandan diye te elat te nabaad ne weyig diye te nammara ne tane. 9 Te nakalapas e sikandan, mig-insaan ni Ilyas si Ilisyu, “Kahii a ke nekey‑a ka igkeupii nu ne eggimuwen ku keykew te kene e pad egbatunen?”

Ne migtabak si Ilisyu, “Egkeupian a perem ne eggalin keddi ka geem nu eyew egkaangken ku ka katungdanan nu isip pangulu.”

10 Ne migtabak si Ilyas, “Malised sika se egbuyuen nu, piru ke egkiteen a nikeykew ka egkabatun, egkarawat nu ka egbuyuen nu, piru ke kena a egkiteen nikeykew, kene nu egkarawat seini.”

11 Te sasangan e sikandan ka eggipanew ne migpahuhurey, sahuhune ne due miglepew ne hapuy ne karwahi ne ingganuy te hapuy ne me kudde. Sika ka egpuunan ne nekegsuwey sikandan se daruwa, ne nabatun e si Ilyas diye te langit ne nekeuntud te balisusu. 12 Nakita ni Ilisyu seini wey migmemetmetan din te migpanguleyi, “Ahalen ku! Ahalen ku! Seinid e ka me karwahi te Israil wey ka migmangudde.”

Ne hengkayi te ware din e nakita si Ilyas, inggisi din e ka kumbale din patamtamani te pegpapitew te pegkalaggew rin. 13 Ne dutu, impurut din e ka hinabel ne ingkukuyumbu ni Ilyas ne neulug puun te lawa rin, wey miglibed e si Ilisyu migsasindeg diye te ilis te Weyig ne Hurdan. 14 Ne in-uyan din e ka ingkukuyumbu ni Ilyas ne hinabel ne neulug puun te lawa rin, wey inlampesan din e ka weyig te migkahi, “Hendeid e ka Magbebaye ne Manama, ka Manama ni Ilyas?” Te nalampesan din e ka weyig, nabaad e ka weyig te daruwa, wey miglapas e si Ilisyu. 15 Te pegkakita te punduk te me prupita ne migmanasindeg diye te madmariyu ne egpalinggumaan e si Ilisyu, migkahi e sikandan, “Diyad ki Ilisyu ka geem ni Ilyas.” Ne nangendiyad sikandan ka egsinug-ung ki Ilisyu ne migpanimbuel diye te tangkaan din. 16 Migkahi sikandan, “Pitew ka, due lalimma ne pulu (50) ne mannekal ne me etew ne duma te me suluhuanen nu. Peyipanawa nu sikandan eyew te pegpamitew te ahalen nu, su kema ke diye de sikandin uyana te Panisingan te Magbebaye ne Manama te bubungan wey ke diye naa te napu.” Ne migtabak si Ilisyu, “Kene niyud sikandan peyipanawa.” 17 Piru kene dan iya egpeen-enengan si Ilisyu, sikan naa ka neyilew e sikandin ka egbalibad. Purisu migkahi e sikandin, “Ne peyipanawa niyud iya sikandan.” Sikan naa ka impeyipanew ran e ka lalimma ne pulu (50) ne me etew eyew te pegpamitew ki Ilyas. Natateluwan sikandan ka migpamitew, piru ware dan iya nakita sikandin. 18 Te peglibed dan e diye te ki Ilisyu ne diye pad te Hiriku te seeye ne timpu, migkahiyan e sikandan ni Ilisyu, “Migkahiyan kud ma iya sikaniyu te kene kew e hipanew.”

19 Sabeka ne aldew, migkahiyan te me matig-Hiriku si Ilisyu, “Pitew ka ahalen, meupiya ka natahuan te seini ne siyudad, piru kene ne meupiya ka weyig wey kene egbebehas ka me pinamula.”

20 Ne migkahi si Ilisyu, “Uyani a te iyam ne yahung wey tahui niyu te asin.” Ne in-uyanan dan e sikandin te yahung. 21 Nataman miggendiyad e si Ilisyu te sebseb te weyig wey insabulakan din e seini te asin te migkahi, “Seini ka inlalag te Magbebaye ne Manama, ‘Migmalinis e ka seini ne weyig. Kenad e seini egpakapatey wey kenad e egpakarereet te me pinamula.’ ” 22 Ne migmalinis en iya ka weyig taman kuntee, sumale te inlalag ni Ilisyu.

23 Nataman, miggipanew e si Ilisyu peendiye te inged ne Bitil. Te sasangan e sikandin ka eggipanew, due me lukes-lukes ne miglepew ne diye egpuun te siyudad ne migyangyang kandin ne migkahi, “Upew, upew, awe ka kayi!”

24 Ne miglilingey si Ilisyu wey intengtengan din sikandan, wey indilus din sikandan pinaahi te ngaran te Magbebaye ne Manama. Ne dutu, due daruwa ne usu ne miglihawang diye te mabbenes wey impamindas-bindas e ka hep‑at ne pulu wey daruwa (42) te seeye ne me lukes-lukes.

25 Ne dutu, miggendiyad e sikandin te bubungan te Karmil. Ne nataman, miglibed e man‑e sikandin diye te inged ne Samarya.