1 Te seeye ne timpu, migderalu si Isikiyas wey egpatey e perem sikandin. Ne inggendiyaan sikandin ni prupita Isayas ne anak ni Amus wey ingkahiyan, “Migkahi ka Magbebaye te upusi nud e himuwa ke nekey ka eggimuwen nu su kene kad e egkeulian te dalu nu, egpatey kad e.”

2 Te pegkarineg ni Isikiyas dutu, diyad e sikandin migtangke te alad ne batu, wey mig-ampu te Magbebaye ne migkahi, 3 “Sumsumana nu Magbebaye ne migmatinumanen a keykew te intiru ne pusung ku, wey inggimu ku ka meupiya diye te tangkaan nu.” Ne migpanaman-taman e migsinehew si Isikiyas.

4 Te ware pad nakalihawang si Isayas diye te taliware te palasyu, impanengneng e sikandin te Magbebaye, 5 “Libed ka diye ki Isikiyas, ne Hari te keet-etawan ku wey kahii nu sikandin te migkahi a se Magbebaye ne Manama, ka Manama te kaap-apuan din ne si Dabid, ‘Narineg ku ka peg-ampu nu wey nakita ku ka me luwe nu. Egbawian ku sikeykew wey hendiye ka te timplu te igkatelu ne aldew. 6 Ne egtimulan ku pad te sapulu wey lalimma (15) ne leg‑un ka umul nu. Egluwasen ku sikeykew wey ka seini ne siyudad puun te Hari te Asirya. Egpangabangan ku ka seini ne siyudad para te bantug ku wey para ki Dabid ne suluhuanen ku.’ ”

7 Ne ingkahiyan ni Isayas si Isikiyas, “Pakua nu ka me suluhuanen nu te indekdek ne iggira eyew igpakepkep te buu nu, eyew egkeulian kad.”

8 Ne mig-inse si Isikiyas ki Isayas, “Nekey ka palinneu ne egbawian a te Magbebaye wey egpekeendiya ad man‑e te timplu rin te igkatelu ne aldew?”

9 Ne migtabak si Isayas, “Hendei te seini se daruwa ne palinneu ka igkeupii nu ne igbehey te Magbebaye te pegpamalehet ne egtumanen din ka seini ne saad? Diye te haheran ne inggimu ni Hari Ahas, igkeupii nu naa ne egpabulus ka alung te sapulu ne sikal wey ke eg-isues naa te sapulu ne sikal?”

10 Ne migtabak si Isikiyas, “Malemu ne egpabulus te sapulu ne sikal ka alung piru eghangyu a te magmahirap ne iyan se eg-isues ka alung te sapulu.”

11 Ne mig-ampu si prupita Isayas ne igpeisues te Magbebaye ka alung, wey impeisues din iya ka alung te sapulu ne sikal diye te haheran ne inggimu ni Ahas.

12 Te seeye ne timpu, migpeuyan te me sulat wey dasag diye ki Hari Isikiyas ka Hari te Babilunya ne si Mirudak-Baladan ne anak ni Baladan tenged su nakarineg sikandin te migderalu si Isikiyas. 13 Ne in-elit-elit ni Isikiyas ka seeye se me suluhuanen wey impapitew rin kandan ka langun ne diye te baley ne limuranan din te karatuan ne pelata, bulawan, me peemut, mahal ne lana, me panganiban din, wey te duma pad ne me karatuan din. Warad iya nasame ne ware din ipakita kandan diye te baley rin wey ke diye naa te migharian din. 14 Ne miggendiye si prupita Isayas te ki Isikiyas wey mig-inse, “Hendei egpuun seini se me suluhuanen wey nekey‑a ka inlalag dan keykew?”

Ne migtabak si Isikiyas, “Diye sikandan migpuun te diriyui ne nasud ne Babilunya.”

15 Ne mig-inse e man‑e si Isayas, “Nekey ka nakita ran diye te palasyu nu?”

Ne migtabak si Isikiyas, “Nakita ran ka langun ne diye te palasyu ku. Warad iya minsan nekey ne ware dan nakita.”

16 Ne ingkahiyan ni Isayas si Isikiyas, “Pammineha nu seini se lalag te Manama, 17  ✡ 2Har 24:13; 2Kru 36:10.‘Egginguma ka timpu ne egkeuyan diye te Babilunya ka langun ne diye te palasyu nu, wey ka langun ne inlimud te kaap-apuan nu ne duen pad kuntee. Ne warad iya egkasame, kahi te Magbebaye. 18 Ne egkarakep ka duma te me kabuhalan nu, wey egkengeyimu sikandan ne suluhuanen diye te palasyu te Hari te Babilunya.’ ”

19 Migsuman-suman si Isikiyas ne due keupianan, wey ware karereetan ne egkeyitabu taheed te neuyag pad sikandin. Sikan naa ka migtabak sikandin, “Meupiya ka lalag te Magbebaye ne Manama ne ingguhud nu keddi.”

20 Ka duma pad ne guhuren meyitenged te peghari ni Isikiyas, wey ka meupiya ne neyimu rin, wey ka peggimu rin te limuranan te weyig wey te egbayaan te weyig, nasulat diye te Sulatanan te me Guhuren te me Hari te Huda. 21 Ne migpatey e si Isikiyas wey insabal diye te insabalan ded te me kaap-apuan din. Ne si Manasis e ne anak din ka migsubal kandin mighari.