1 Ne si Huwakas e ne anak ni Husiyas ka in-alam te me etew ne igsubal kandin isip Hari diye te Hirusalim. 2 Daruwa ne pulu wey tatelu (23) ka idad din te neyimu sikandin ne Hari, wey mighari sikandin diye te Hirusalim te tatelu re ne bulan. 3 Ne impaawe sikandin te trunu rin ni Niku ne Hari te Ihiptu wey immultaan ka me matig-Huda te tatelu ne libu wey hep‑at ne gatus (3,400) ne kilu ne pelata wey tatelu ne pulu wey hep‑at (34) ne kilu ne bulawan. 4  ✡ Hir 22:11-12.Ne in-uyan ni Niku si Huwakas diye te Ihiptu. Ne si Iliyakim e ne suled ni Huwakas ka impahari din diye te Huda wey te Hirusalim. Ne ka ngaran ni Ilyakim inliwanan ni Niku te Huwakim.

5  ✡ Hir 22:18-19; 26:1-6; 35:1-19.Daruwa ne pulu wey lalimma (25) ka idad ni Huwakim te neyimu sikandin ne Hari, wey mighari sikandin diye te Hirusalim te sapulu wey sabeka (11) ne leg‑un. Mareet ka hinimuwan din diye te tangkaan te Magbebaye ne Manama rin. 6  ✡ Hir 25:1-38; 36:1-32; 45:1-5; Dan 1:1-2.Nataman, inlusuran sikandin ni Nibukadnisar ne Hari te Babilunya, wey imbaku sikandin te keddina. Ne in-uyan e sikandin diye te Babilunya. 7 In-uyan degma ni Nibukadnisar diye te Babilunya ka duma ne me kasangkapan te timplu te Magbebaye wey intahu diye te palasyu rin.

8 Ka duma pad ne guhuren te peghari ni Huwakim wey ka mallindit ne immangimu rin, nasulat diye te Sulatanan te me Guhuren te me Hari te Israil wey te Huda. Ne si Huwakin e ne anak din ka migsubal kandin mighari.

9 Sapulu wey walu (18) ka idad ni Huwakin te neyimu sikandin ne Hari, wey mighari sikandin diye te Hirusalim te tatelu re ne bulan wey sapulu (10) ne aldew. Mareet ka hinimuwan din diye te tangkaan te Magbebaye. 10  ✡ Hir 22:24-30; 24:1-10; 29:1-2; Isi 17:12; Hir 37:1; Isi 17:13.Te an-anayan ne bulan te seeye ne leg‑un, impaangey ni Nibukadnisar sikandin wey impeendiye te Babilunya lagkes ka mahal ne me kasangkapan te timplu te Magbebaye. Ne ka suled din ne si Sidikiyas, iyan e impahari ni Nibukadnisar te Huda wey te Hirusalim.

11  ✡ Hir 27:1-22; 28:1-17.Daruwa ne pulu wey sabeka (21) ka idad ni Sidikiyas te neyimu sikandin ne Hari, wey mighari sikandin diye te Hirusalim te sapulu wey sabeka (11) ne leg‑un. 12 Ne mareet ka hinimuwan din diye te tangkaan te Magbebaye ne Manama rin. Ware sikandin migpariralem ki prupita Hirimiyas ne miglalag te lalag te Manama. 13  ✡ Isi 17:15.Migribildi man‑e sikandin ki Hari Nibukadnisar minsan ke migpahunlibet sikandin te ngaran te Manama ne egmatinumanen ki Nibukadnisar. Makehal ka ulu ni Sidikiya wey ware iya sikandin miglibed te Magbebaye, ka Manama te Israil. 14 Ne suble e degma ne mareet ka langun ne pangulu te me talagpanubad wey ka keet-etawan te Huda. Mig-ikul sikandan te mallindit ne hinimuwan te lein ne me nasud wey inlinditan dan ka timplu ne immatulus te Magbebaye diye te Hirusalim.

15 Layun egpaney-paney kandan ka Magbebaye, ka Manama te me kaap-apuan dan pinaahi te me insuhu din ne egpahuhuren din su egkeyid‑u ma sikandin kandan wey te timplu rin. 16 Piru inlelemetan dan de iya ka immanuhu ne egpahuhuren te Manama, ware dan linglingaa ka me lalag din, wey inderali-dian dan de ka me prupita rin. Purisu nalangetan kandan ka Magbebaye wey ware nakapegnel te langet din. 17  ✡ Hir 21:1-10; 34:1-5.Purisu impalusuran te Magbebaye sikandan te me matig-Babilunya. Impeyimatayan din e te ware pegkeyid‑u ka me kanakan diye te timplu lagkes ka me mengebay ne ware pad neyilabeti, wey ka me buyag-buyag e minsan seeye se me buyag e amana. Imbehey sikandan langun te Manama ki Nibukadnisar. 18 Ne ka langun ne kasangkapan te timplu te Manama, dakel ma wey se deisek, ka me karatuan te timplu, ka karatuan te Hari wey ka karatuan te me upisyal rin, impanguyan langun ni Nibukadnisar diye te Babilunya. 19  ✡ 1Har 9:8.Ne insilaban dan ka timplu te Manama wey impandereetan dan ka matikang wey makepal ne alad ne batu te Hirusalim. Impanilaban dan degma ka intiru ne palasyu wey impandereetan dan ka mahal ne me kasangkapan diye. 20 Ne naddakep ni Hari Nibukadnisar ka langun ne ware migpatey wey nanguyan din e diye te Babilunya, wey inggimu rin sikandan ne me uripen din wey te me kabuhalan din taman te natalu e te migharian te Pirsya ka Babilunya. 21  ✡ Hir 25:11; 29:10.Purisu, natuman ka lalag te Magbebaye pinaahi ki prupita Hirimiyas ne egkeyimu ne ware eetawen te Huda wey egkeengkeran seini te pitu (70) ne pulu ne leg‑un.

22 Ne te an-anayan ne leg‑un te peghari ni Sirus te Pirsya, intuman te Magbebaye ka lalag din pinaahi ki Hirimiyas. Impuwasan te Magbebaye ka suman-suman ni Sirus eyew egpakasulat te sabeka ne pegpataha te intiru ne migharian din.

23  ✡ Isa 44:28.Seini ka insulat ni Hari Sirus te Pirsya: “Ka Magbebaye ne iyan ka Manama ne diye te langit, ka migbehey keddi te langun ne migharian kayi te kalibutan. In-alam a nikandin ne egbalew-balew egpasasindeg te timplu para kandin diye te Hirusalim ne sakup te Huda. Sikaniyu se langun ne keet-etawan te Manama, egkaayun e ne egpakalibed diye te tane niyu. Ne egdumaan kew te Magbebaye ne Manama.”