1 Te peglihad te timpu, natalu ni Dabid ka me Pilistihanen wey nasakup din e sikandan. Ne naahew rin puun kandan ka inged ne Mitig-Ama.

2 Ne natalu rin degma ka me matig-Muwab. Impeyibat din sikandan diye te tane te tatelu ne linya. Ne impangimatayan din ka langun ne naseled te daruwa ne seked, wey ware din pangimatayi ka naseled te igkatelu ne seked. Neuripen ni Dabid ka me matig-Muwab wey migbayad e sikandan te buhis diye te kandin.

3 Natalu degma ni Dabid ka Hari te Suba ne si Hadadisir ne anak ni Rihub. Neyitabu ka seeye ne gira te timpu te egpeendiye si Hadadisir te inged ne marani te Weyig ne Iyupratis eyew igpalibed din perem ka pegmandu din diye. 4 Ne naahew ni Dabid ki Hadadisir ka sabeka ne libu wey pitu ne gatus (1,700) ne migmangudde, wey ka daruwa ne pulu ne libu (20,000) ne me sundalu ne nangipanew re. Ne impanlepuan din ka me kudde ne migganuy te me karwahi piru miggaat sikandin te me kudde ne eleg te sabeka ne gatus (100) ne me karwahi.

5 Te pegginguma te me matig-Sirya ne egpuun te Damasku eyew te pegbulig ki Hadadisir ne Hari te Suba, inggimatayan ni Dabid ka daruwa ne pulu wey daruwa ne libu (22,000) kandan. 6 Ne migpangampuwan ni Dabid ka inged te me matig-Sirya diye te Damasku, wey nasakup din sikandan wey migbayad e sikandan te buhis diye te kandin. Impepanalu si Dabid te Magbebaye ne Manama minsan hendei sikandin migbaye. 7 Ne impanguyan e ni Dabid ka me kalasag ne bulawan te me upisyal ni Hadadisir wey in-uyan din e seini diye te Hirusalim. 8 Ingkuwa degma ni Hari Dabid ka susuluhi ne burunsi puun diye te me lungsud ne Bita wey Birutay ne nasakup ni Hadadisir.

9 Te pegkarineg ni Tuy ne Hari te Hamat ne natalu ni Dabid ka langun ne sundalu ni Hadadisir, 10 impeendiye din e ka anak din ne si Huram eyew te pegsaye ki Dabid tenged te kapanaluwan te pegpakiggira rin ki Hadadisir. (Si Tuy wey Hadadisir tapey ne talagkuntere.) Ne in-uyanan ni Huram si Dabid te me kasangkapan ne inggimu puun te pelata, bulawan, wey burunsi. 11 Ne inhalad ni Hari Dabid ka sika ne me kasangkapan diye te Magbebaye ne Manama iling te inggimu rin te seeye se me pelata wey me bulawan puun te langun ne nasud ne natalu rin, 12 ne iyan ka me nasud te Idum, Muwab, Amun, Pilistiya, wey Amalik. Ne inhalad din degma ka naahew rin puun te anak ni Rihub ne si Hadadisir ne Hari te Suba.

13  ✡ Sal 60 Uluwan.Ne migmabantug si Dabid te peg-uli din puun te pegpangimatey te sapulu wey walu ne libu (18,000) ne matig-Sirya diye te napu ne egngaranan te Asin. 14 Ne impakekampuwan din ka diye te intiru ne inged te Idum wey nasakup din ka langun ne matig-Idum. Impepanalu sikandin te Magbebaye ne Manama minsan hendei sikandin migbaye.

15 Ne mighari si Dabid te intiru ne Israil wey meupiya ka inggimu rin wey eleg ka peggukum din te langun ne keet-etawan din. 16 Ne si Huwab ne anak ni Siruya ka pangulu te me sundalu rin, wey iyan talagsulat te egkengeyitabu si Hihusapat ne anak ni Ahilud. 17 Ne iyan me talagpanubad si Saduk ne anak ni Ahilud wey si Abimilik ne anak ni Abiyatar. Ne si Sarayas ka sikritari. 18 Si Binayas ne anak ni Huyada ka pangulu te me Kiritihanen wey me Pilitihanen ne me talagbantey ki Dabid. Ne iyan me talagtambag* Te Hibruwanen: me talagpanubad. ka me lukes ne me anak ni Dabid.