1 Ne diyad e mig-ugpe si Dabid te palasyu rin wey warad sikandin palusuri te Magbebaye ne Manama te langun ne egkuntere kandin te minsan hendei. 2 Ne migkahiyan ni Dabid ka prupita ne si Natan, “Kayi ad kuntee mig-ugpe te palasyu ne inggimu puun te kayu ne sidar, piru diye de mule nakatahu ka Tahuanan te Kasabutan te Manama te balungbalung.”

3 Ne migtabak si Natan te Hari, “Himuwa nu ka minsan nekey ne due te suman-suman nu ne igkeupii nu ne eggimuwen su migduma keykew ka Magbebaye ne Manama.” 4 Piru te sika ne marusilem, impanengneng te Magbebaye ne Manama si Natan, 5 “Hendiyei nu ka suluhuanen ku ne si Dabid wey kahii nu te seini ka ingkahi ku, ‘Kene ne sikeykew ka egpasasindeg te baley ne eg-ugpaan ku. 6 Ware e pad nekeugpe te baley bunsud te timpu ne impalihawang ku ka me matig-Israil puun te Ihiptu taman kuntee. Miggalin-halin a te inged wey balungbalung de ka in-ugpaan ku. 7 Te peggalin-halin ku minsan hendei duma te langun ne me matig-Israil, wara a migkahi te me pangulu ran ne impabantey ku te keet-etawan ku te mania te kena a nikaniyu eggimuwan te baley ne puun te kayu ne sidar?’

8 “Purisu kahii nu ka suluhuanen ku ne si Dabid te migkahi a se Amana ne Maresen ne Magbebaye, ‘Talagtameng ka dengan te karniru diye te patabtabanan piru in-alam ku sikeykew ne egkeyimu ne pangulu te keet-etawan ku ne me matig-Israil. 9 Ne indumaan ku sikeykew minsan hendei ka migpabaye wey intalu ku ka langun ne me kuntere nu ne egkabayaan nu. Ne kuntee, eggimuwen ku sikeykew ne mabantug iling te mabantug ne me etew te kalibutan. 10 Egteilan ku te inged ka keet-etawan ku ne matig-Israil wey igpeugpe ku sikandan diye eyew duen e tane dan mismu, wey kenad e sikandan egkahewhew. Ne kenad e egpakareeg-deeg kandan ka me maddeet ne etew iling te inggimu ran dengan 11 bunsud pad te mig-alam a te me pangulu eyew egmandu te keet-etawan ku ne me matig-Israil. Ne kene kud e sikaniyu egpalusuran te langun ne egkuntere kaniyu. Sikeddi se Magbebaye ne Manama, egnangen keykew ne due egkeyimu ne Hari puun te kabuhalan nu. 12  ✡ Sal 89:3-4; 132:11; Huw 7:42; Him 2:30.Ke egpatey kad e wey iglebeng e diye te inlebengan te kabuybuyahan nu, eggimuwen ku ne Hari ka sabeka te anak nu ne me lukes wey eggimuwen ku ne maresen ka migharian din. 13 Sikandin ka eggimu te baley para keddi wey iyan ku iya egpaharien ka me kabuhalan din te ware egtamanan. 14  ✡ Sal 89:26-27; 2Kur 6:18; Hib 1:5.Egkeyimu ad ne amey rin, wey egkeyimu e sikandin ne anak ku. Ne egdisiplineen ku sikandin ke egkaseyyup, iling te pegdisiplina te sabeka ne etew te anak din. 15 Piru kene ku eg-aween ka geyinawa ku ne kene egkabalbalawan kandin, kene ne iling te inggimu ku ki Saul ne impasubalan ku keykew. 16  ✡ Sal 89:36-37.Ne ware katamanan te migharian nu wey igpahari ku te ware egtamanan ka me kabuhalan nu.’ ” 17 Impangguhud ni Natan ki Dabid ka langun ne impakita te Magbebaye ne Manama kandin.

18 Ne migseled si Dabid diye te balungbalung ne in-ugpaan te Manama wey migpinnuu ne mig-ampu diye te tangkaan te Magbebaye ne Manama ne miggenendue, “Magbebaye ne Manama, sikeddi wey ka pamilya ku kene ne eleg te meupiya ne immangimu nu para kanami. 19 Piru deisek pad seini diye te keykew Magbebaye ne Manama su duen pad iya man‑e saad nu ne egpanalanginan nu ka pamilya ku keureme. Iling naa iya due ka ingkalayami nu ne eggimuwen diye te etew? 20 Na, nekey naan pad ka igpakakahi ku keykew Magbebaye ne Manama, te neilaan ad ma nikeykew se suluhuanen nu? 21 Tenged te saad nu wey tenged te igkeupii nu, inggimu nu seini se subla ne meupiya ne me himu eyew igpataha nu keddi te suluhuanen nu. 22 Maresen ka, Magbebaye ne Manama! Ware egpekeiling keykew, wey warad duma ne Manama ne narineg ney ne iling keykew. 23  ✡ Diy 4:34.Ne ware lein ne keet-etawan kayi te ampew te tane ne egpekeiling te keet-etawan nu ne matig-Israil, ka sabeka ne nasud kayi te ampew te tane ne inluwas nu puun te Ihiptu eyew egkeyimu ne keet-etawan nu. Ne nabantug ka tenged te pegluwas nu kandan puun te Ihiptu. Ne migmabantug ka ngaran nu tenged te me kein-inuwan ne inggimu nu te pegdeldel nu te me matig-Kanaan* Te Hibruwanen: nasud. lagkes ka me diyus-diyus dan eyew egpakasubal egpekeugpe diye ka keet-etawan nu. 24 Ne inggimu nu ne keet-etawan nu mismu ka Israil te ware egtamanan. Ne sikeykew, Magbebaye ne Manama, neyimu ne Manama ran.

25 “Ne kuntee, Magbebaye ne Manama, himuwa nu te ware egtamanan ka insaad nu keddi te suluhuanen nu wey te pamilya ku 26 su eyew egmabantug ka te ware egtamanan wey egkahi ka me etew, ‘Ka Amana ne Maresen ne Magbebaye, iyan Manama te Israil!’ Ne egpakapabulus ka pamilya ku te suluhuanen nu diye te tangkaan nu. 27 He Amana ne Maresen ne Magbebaye ne iyan Manama te Israil, due kabagget ku te peg-ampu keykew meyitenged kayi su impanengneng nu ma keddi te suluhuanen nu ne due layun eghari ne sabeka puun te me kabuhalan ku.

28 “He Magbebaye ne Manama! Malehet ka me lalag nu wey meupiya seini se insaad nu keddiey te suluhuanen nu. 29 Purisu meupiya perem ke igkahale nu ka pegpanalangin te kabuhalan ku te suluhuanen nu, eyew egpakapabulus seini diye te tangkaan nu te ware egtamanan tenged su insaad nu ma seini, Magbebaye ne Manama. Ka pegpanalangin nu, keupianan te kabuhalan ku te ware egtamanan.”