1  ✡ 1Har 12:16; 2Kru 10:16.Te seeye ne timpu, due mareet wey ware gulehud ne etew diye te Gilgal. Egngaranan sikandin ki Siyiba wey anak sikandin ni Bikri ne matig-Binhamin. Imparahing din ka trumpita wey migkahi,

2 Purisu mig-engkeran e si Dabid te langun ne matig-Israil wey migsinundul e sikandan ki Siyiba ne anak ni Bikri. Piru migpalunggehaat mule diye te Hari dan ka me matig-Huda wey ware dan en iya pitasi te egduma si Dabid puun te Weyig ne Hurdan taman te Hirusalim.

3  ✡ 2Sam 16:22.Ne miggendiye si Dabid te palasyu rin diye te Hirusalim wey ingkuwa rin ka sapulu ne duwey rin ne inggaat din dengan eyew te pegtanggu te palasyu. Ne diye din sikandan ipeugpe te lein ne baley wey impabantayan din sikandan. Imbehayan din sikandan te keilanganen dan piru ware din sikandan huliri. Purisu mig-ugpe sikandan diye ne iling te me balu taman te migpatey e sikandan.

4 Ne ingkahiyan te Hari si Amasa, “Peendiniya nu te keddi ka me lukes te Huda wey keilangan ne egkaruma nu sikandan kayi te ikatelu ne aldew puun kuntee.” 5 Purisu miggipanew e si Amasa eyew te peg-umew te kaluk-lukesan te Huda. Piru ware sikandin nakalibed te aldew ne ingkerew kandin. 6 Sikan naa ka migkahiyan ni Dabid si Abisay, “Te seini ne timpu, dakel-rakel pad ka egkeyimu ni Siyiba ne karereetan du te neyimu ni Absalum. Dumaa nu seini se me etew ku wey lupuha niyu sikandin su kema ke egpakaahew sikandin te malig‑en ne me siyudad wey egpakapariyu e kanta.” 7 Purisu migligkat e te Hirusalim si Abisay wey si Huwab duma te me talagbantey te Hari ne me Kiritihanen wey Pilitihanen, wey te langun ne sundalu eyew te pegtalukun ki Siyiba. 8 Te nekeume e sikandan diye te dakel ne batu diye te Gibyun, insinug-ung e sikandan ni Amasa. Ne migsaluub si Huwab te kumbale te sundalu wey due insiniket din ne pungyal. Taheed te egparani sikandin ki Amasa, newulabus ka pungyal rin wey neulug seini. 9 Ne ingkahiyan ni Huwab si Amasa, “Kumusta ka suled?” Ne inggen-genan din te kawanan ne belad din ka sumpe ni Amasa eyew kun ubag eggarek kandin. 10 Piru ware nakabantey si Amasa te miggen-gen bes si Huwab te pungyal. Ne insundang e ni Huwab si Amasa diye te getek wey nabusaye e ka bituka rin diye te tane. Ne sahuhune ne migpatey sikandin, purisu, warad e sikandin sundanga abayi ni Huwab.

Ne migpabulus e si Huwab wey ka suled din ne si Abisay te pegtalukun ki Siyiba ne anak ni Bikri. 11 Ne sabeka te me etew ni Huwab ka migsasindeg diye te andang ni Amasa wey migkahi, “Ke eglapig kew ki Huwab wey ki Dabid, ne ikula niyu si Huwab!” 12 Ne nakabahed si Amasa diye te dalan ne narihus te langesa rin. Nakita te etew ni Huwab ne egsanggel ka tagse sabeka eyew te pegpitew kandin, sikan naa ka ingganuy rin e ka lawa ni Amasa puun te dalan peendiye te kamet, wey imbunbunan din seini te manggad. 13 Te naawe e si Amasa diye te dalan, migpabulus e migduma ki Huwab ka langun ne etew te pegtalukun ki Siyiba ne anak ni Bikri.

14 Ne impamayaan ni Siyiba ka langun ne tribu te Israil wey migginguma sikandin diye te Abil Bit-Maaka. Ne miglibulung diye ka langun ne kabuhalan ni Bikri, wey migsinundul e kandin. 15 Te nanengnengan seini ni Huwab wey te me etew rin, miggendiyad e sikandan te Abil Bit-Maaka wey inlingutan dan e seini. Ne migpatetamundu sikandan te tane diye te kilid te matikang wey makepal ne alad ne batu te siyudad eyew egkabayaan dan te egpamaneyik. Ne imbunsuran dan e te egguhus ka alad te siyudad. 16 Ne due matagseb ne malitan diye te seled te siyudad ne migpanguleyi, “Pammineg kew! Pammineg kew! Peendiniya niyu si Huwab su egpakiglalag a kandin.” 17 Ne migparani e si Huwab wey mig-insaan e sikandin te malitan, “Sikeykew si Huwab?”

Ne migtabak si Huwab, “Uya, sikeddi iya.”

Ne migkahiyan te malitan si Huwab, “Pammineg ka ubag te iglalag te suluhuanen nu keykew.”

Ne migtabak sikandin, “Uya, egpammineg a.”

18 Ne migkahi ka malitan, “Te dengan ne timpu, nalayam sikandan ne egkahi, ‘Ke egkeupian kew ne egkasulbad ka prublima niyu, patambag kew re diye te siyudad te Abil.’ 19 Malinawen wey egkasalihan key kayi te Israil. Ne mania te igkeupii nu ne egguhusen seini se egpekeiling te iney ne siyudad kayi te Israil? Mania te igkeupii nu ne egguhusen ka siyudad te Magbebaye ne Manama?”

20 Ne migtabak si Huwab, “Kene! Kene ku iya egguhusen wey ke egdereetan naa ka siyudad niyu! 21 Kene ne sika ka planu ney. Miglusud key tenged ki Siyiba ne anak ni Bikri ne egpuun diye te bubungan te Ipraim. Migribildi sikandin te Hari. Ibehey niyu sikandin kanami su eyew eg-awe key e kayi te siyudad.”

Ne migkahiyan te malitan si Huwab, “Ig-antug ney ka ulu rin due te keykew puun kayi te alad te siyudad.” 22 Ne miggendiye ka malitan te me etew ne nangugpe te siyudad, wey ingguhuran din sikandan meyitenged te planu rin. Ne intempuhan dan e te ulu si Siyiba wey in-antug dan e diye ki Huwab ka ulu rin. Ne imparahing e ni Huwab ka trumpita wey mig-awe e sikandan diye, wey migmanguli e. Ne miglibed e si Huwab diye te Hirusalim wey miggendiyad te Hari.

23 Te seeye ne timpu, si Huwab ka pangulu te langun ne sundalu te Israil. Ne si Binayas ne anak ni Huyada, iyan pangulu te me Kiritihanen wey me Pilitihanen ne talagbantey te Hari. 24 Ne si Aduniram iyan pangulu te seeye se impamehes te egpatrabahu wey si Hihusapat ne anak ni Ahilud ka talagsulat te egkengeyitabu, 25 wey si Siba ka sikritari. Ne si Saduk wey si Abiyatar ka me talagpanubad, 26 wey si Ira ne matig-Hair ka talagpanubad ni Dabid.