1 Ne nabelu e man‑e amana ka Magbebaye ne Manama te me matig-Israil, wey impeparusaan din sikandan ki Dabid. Ne ingkahiyan din si Dabid, “Ipasinsus nu te me upisyal nu ka langun ne matig-Israil wey matig-Huda.” 2 Purisu ingkahiyan ni Dabid si Huwab wey ka me pangulu te me sundalu, “Hendiyei niyu ka langun ne tribu te Israil—puun te Dan peendiye te intiru ne Birsiba* Te Hibruwanen: Dan peendiye te Israil. wey seela niyu ka me lukes ne eleg e ne egkeyimu ne sundalu eyew egkanengnengan ku ka kasulug dan.”

3 Piru migtabak si Huwab, “Meupiya perem ke egpamasuluhen te Magbebaye ne Manama te mahatus (100) ne lupi ka kasulug te keet-etawan nu kuntee, wey meupiya perem ke egkakita nu seini. Piru mahal ne Hari, mania te igkeupii nu ne eggimuwen seini?” 4 Piru impatuman iya te Hari engki Huwab wey te me pangulu te sundalu ka suhu din. Purisu miggipanew e si Huwab wey ka me pangulu te me sundalu eyew te pegsinsus te keet-etawan te Israil.

5 Ne miglapas sikandan te Hurdan wey migbunsud e sikandan ka egsinsus puun te Aruwir wey puun te siyudad ne diye te elat-elat te napu. Ne puun diye, miggendiyad e sikandan te Gad wey diye te Hasir. 6 Ne migginguma sikandan diye te Gilyad wey diye te Kadis diye te tane te Hitihanen. Ne migginguma sikandan diye te Dan, wey migpabulus peendiye te Sidun. 7 Ne miggendiyad sikandan te siyudad ne Tiru ne in-alad te matikang wey makepal ne batu wey diye te langun ne siyudad te me Hibihanen wey me Kanaanen. Ne nataman, miggendiyad sikandan te Birsiba diye te igkakawanan ne balabahan te igsile te Huda. 8 Peglihad te siyam ne bulan wey daruwa ne pulu (20) ne aldew, te nalingut dan e ka intiru ne nasud, mig-uli e sikandan diye te Hirusalim. 9 Ne ingguhud ni Huwab diye te Hari ka kasuluhan te me etew ne eleg e ne egkeyimu ne sundalu: ne due walu ne gatus ne libu (800,000) ne maagsik ne me lukes diye te Israil ne eleg e ne egkeyimu ne sundalu, wey lalimma ne gatus ne libu (500,000) ka diye te Huda.

10 Piru nekegsendit si Dabid te neimpusan din te egpaseel ka me etew. Ne ingkahiyan ni Dabid ka Magbebaye ne Manama, “Dakel ka sale ku tenged te inggimu ku. Ne kuntee egpeyid‑u-hid‑u a ubag ne egpasayluwen a nikeykew se suluhuanen nu su keungelan iya ka neyimu ku.”

11 Te peggimata ni Dabid te seup ne maselem, impanengneng e te Magbebaye ne Manama si Gad ne prupita ni Dabid te miggenendue, 12 “Hendiyei nu si Dabid wey kahii nu, ‘Seini ka ingkahi te Magbebaye ne Manama: egbehayan ku sikeykew te tatelu ne eg-alaman. Alam ka te sabeka kayi wey eggimuwen ku seini due te keykew.’ ” 13 Purisu miggendiyaan e ni Gad si Dabid wey mig-insaan, “Hendei kayi te tatelu ka eg-alamen nu ne igdusa te Magbebaye ne Manama keykew? Tatelu† Te Hibruwanen: pitu. naa ne leg‑un ne bitil kayi te nasud nu, wey ke tatelu naa ne bulan ne egpakapalpallahuy ka puun te pegpanlupug keykew te me kuntere nu, wey ke tatelu naa ne aldew ne karereetan kayi te nasud nu? Na kuntee, sumsumana nu ke nekey ka igtabak ku te migsuhu keddi.”

14 Ne migtabak si Dabid, “Amana a nalaggew. Piru meupiya pad ke egdusaan ki te Magbebaye ne Manama du te etew ka egdusa kanta su hiid‑uwen ma amana sikandin.”

15 Purisu impeuyanan te Magbebaye ne Manama te karereetan ka Israil, puun te maselem taman te ingkerew ne aldew. Ne due pitu ne pulu ne libu (70,000) ne etew ne migpatey puun te Dan peendiye te Birsiba. 16 Te egdereetan e perem te panalihan ka Hirusalim, nekegsendit e ka Magbebaye ne Manama te karereetan ne neyitabu wey migkahiyan din ka panalihan ne migdereet te me etew, “Eleg e! Peen-enengi nud sika se eggimuwen nu.” Te seeye ne timpu, diye te diekanan te trigu ni Arawuna ne kabuhalan ni Hibus ka panalihan te Magbebaye ne Manama.

17 Ne nakita ni Dabid ka panalihan ne migdereet te me etew wey migkahiyan din ka Magbebaye ne Manama, “Sikeddi ka nakasale; sikeddi ka nekeyimu te mareet. Piru nekey ka neyimu te seini se me etew? Ware sale dan iling te me karniru. Sikeddi ka duseyi nu wey ka pamilya ku.”

18 Te seeye ne aldew, miggendiye si Gad ki Dabid wey migkahi, “Takereg ka diye te diekanan te trigu ni Arawuna ne kabuhalan ni Hibus wey himu ka te altar ne tutunganan te igpanubad diye para te Magbebaye ne Manama.” 19 Ne intuman ni Dabid ka insuhu te Magbebaye ne Manama sumale te ingkahi ni Gad kandin. 20 Te pegpantew ni Arawuna, nakita rin si Dabid wey ka me etew rin ne egpeendiye te kandin. Ne migligwang si Arawuna wey miglangkeb diye te tane diye te tangkaan ni Dabid isip pegtahud kandin. 21 Ne migkahi si Arawuna, “Mahal ne Hari, mania te miggendini ka keddi te suluhuanen nu?”

Ne migtabak si Dabid, “Miggendini a eyew te pegbeli te diekanan nu te trigu eyew eggimuwan ku te altar ne tutunganan te igpanubad para te Magbebaye ne Manama, eyew egkasanggel e ka karereetan.”

22 Ne ingkahiyan ni Arawuna ka Hari, “Ahalen ne Hari, kua nu ka minsan nekey ne igkahale nu wey ihalad nu. Due me baka seini para igpanubad ne egtutungen, wey due degma kayu ne kasangkapan te pegdiriek, wey me yuggu te baka ne egkahamit ne igtemeg.” 23 Igbehey re seeye se langun ni Arawuna diye te Hari wey ingkahiyan din sikandin, “Egdawaten perem ka igpanubad nu te Magbebaye ne Manama ne iyan ka Manama nu.”

24 Piru ingkahiyan te Hari si Arawuna, “Kene, egbeliyen ku seini! Kena a egpanubad te Magbebaye ne Manama ne iyan ka Manama ku te igpanubad ne egtutungen ne ware ku bayari.” Purisu imbeli ni Dabid te lalimma ne pulu (50) ne timman ne seleppi ne pelata ka diekanan te trigu wey ka me baka. 25 Ne miggimu en iya si Dabid te altar ne tutunganan te igpanubad diye para te Magbebaye ne Manama. Ne migpanubad e sikandin te igpanubad ne egtutungen wey te me igpanubad para te keupianan. Ne intabak e te Magbebaye ne Manama ka me peg-ampu ni Dabid para te nasud, wey naawe e ka karereetan diye te Israil.