1 Seini ka impakita keddi te Magbebaye ne Manama: Pegpitew ku, iyan kud iya se masulug ne talangas ne inggimu te Magbebaye ne Manama eyew igpeuyan din kayi te tane. Sikan pad iya napenga ka peggalab te pinamula ne baad te Hari wey ka inggalaban, migbunsud e man‑e egtubu. 2 Ne impangeen te me talangas ka langun ne me pinamula, wey warad iya nasame. Ne migkahi a, “Magbebaye ne Manama, pasayluwa nu ka keet-etawan* Te Hibruwanen: Hakub. nu. Egmemenu naan e sikandan eyew kene egpatey? Mahuye wey deisek de sikandan.”

3 Purisu nabalbalawan ka suman-suman te Magbebaye ne Manama wey migkahi sikandin, “Kene egpakabulus ka nakita nu.”

4 Ne duen e man‑e impakita keddi te Magbebaye ne Manama. Nakita ku sikandin ne migpangandam eyew eglegparan ka langun pinaahi te hapuy. Neetiyan ka weyig diye te diralem te tane tenged te hapuy, wey nasilaban e ka katantanaan. 5 Ne migkahi a, “E Magbebaye ne Manama, ipeeneng-eneng nud ubag sika se meinit! Egmemenu naan e sikandan eyew kene egpatey? Mahuye wey deisek de sikandan.”

6 Purisu nabalbalawan ka suman-suman te Magbebaye ne Manama wey migkahi sikandin, “Kene ded iya man‑e egpakapabulus ka nakita nu.”

7 Ne duen e man‑e impakita keddi te Magbebaye ne Manama. Nakita ku ka Magbebaye ne Manama ne migsasindeg lenged te matikang wey makepal ne alad ne miggehen-gen te tuntun. 8 Ne mig-insaan a te Magbebaye ne Manama, “Nekey‑a ka nakita nu, Amus?”

Ne migtabak a, “Tuntun.”

Ne migkahi ka Magbebaye ne Manama, “Eggamiten ku seini ne tuntun eyew igpapitew ku ka seyyup te me Israilita. Ne kenad e egkabalbalawan ka suman-suman ku te pegdusa kandan. 9 Egkallundus ka me panubaran te me kabuhalan ni Isaak, wey egkagguhus ka me matulus ne simbaanan te Israil. Egguleen ku te egpangimatey ka me kabuhalan ni Hirubuwam.”

10 Ne si Amasiyas ne talagpanubad te Bitil migpanaha te lalag diye ki Hirubuwam ne Hari te Israil, ne miggenendue, “Intipu ni Amus ka me etew eyew eggimatayan ka. Egpakarereet te nasud ka me lalag din. 11 Su kahi rin, ‘Eggimatayan si Hirubuwam te kuntere din wey egpandakepen wey egkeuyan e ka me Israilita diye te mariyu-diyu e te inged dan.’ ”

12 Ne migkahiyan ni Amasiyas si Amus, “Eleg e, prupita! Libed kad diye te Huda wey diye kad panagne eyew egpakeenen ka nikandan. 13 Kene kad panagne kayi te Bitil su kayi ka timplu wey ka palasyu te Hari.”

14 Ne migtabak si Amus ki Amasiyas, “Kena a ne prupita wey ke anak naa te prupita. Talagtameng a mule te karniru wey talagtanggu degma te me kayu ne sikumuru. 15 Piru impaawa a te Magbebaye ne Manama puun te pegtameng te me karniru wey ingkahiyan a, ‘Hipanew ka wey panagne ka diye te keet-etawan ku te Israil.’ 16 Purisu pammineha nu ka lalag te Magbebaye ne Manama. Imbalabahan a nikeykew ka egpanagne diye te me Israilita wey ka egwali diye te me kabuhalan ni Isaak. 17 Tenged due, seini ka ingkahi te Magbebaye ne Manama keykew, ‘Ka asawa nu egkeyimu ne egpabaley-baley ne malitan te siyudad, wey ka me anak nu egkeyimatayan. Egsekeren wey egba-baaren te duma ne me etew ka tane nu, wey diye ka egpatey te inged ne ware egpalintutuu te Manama. Ne ka me Israilita, egkaddakep wey egmanguyanen diye te inged ne mariyu te ugpaan dan.’ ”